سماره : من اجى ناطق امي صاحتني اكعد وياهم... اول مره انتبه على شكله ...رجولي ومرتب ..طويل وحتى نظراته مريحه ما خفت منه بالعكس ارتاحيتله ... سلمت عليه ردلي السلام
ايمان : ابني اني صحتك ... اريد احجي وياك مصار فرصه انت تتعرف على سماره ولا هي تتعرف عليك وتحجون ... اول شغله اريدها منك تخليها تكمل مدرسه ... هي باقيلها سنتين واذا خليتها تكمل كليه بعد تصير صاحب فضل
ناطق: عادي خليها تكمل اذا هي رايده بس انه اوديها واجيبها
ايمان: والله يمه تسوي فضل عليه ... بس الموضوع الي اني رايدتك بي.. غير
انت محد گلك منو رايد سماره قبلك ....
ناطق: ادري گرابتكم
ايمان : ولد حجي عيسى الاخوه ولد ضرتي ... واني ما نطيتهم
وخايفه لا يأذوها لان بيوم الي دزيت امك جاسم الچبير ضربها وانت مثل ما شايف محمد صغير يعني ماعدها سند غير عمها وعمها اكيد مينطي بولده ... ويعاديهم ... وترى راح نگول لولده
انتوا عقدتوا ... حتى بعد يشيلون الموضوع من راسهم
ناطق: اعقد عليها اسبوع الجاي اذا تقبلين
ايمان : لا يمه ... بالاول خلي تفهمك وانتَ تفهمها اني اعرف الله
وبنفس الوقت ما اريد بنتي تزوج على طريقتكم اريدك تجي ..
يمنا للبيت كل ميصير عندك مجال ... اني ابقى وياكم بنفس المكان ... وانتوا سولفوا وواحد يتعرف على الثاني ... هاي عشره
وعمر ... اذا ما عرفتها وعرفتك ... بهالايام ...ورا الزواج يجوز متتوالمون ... تالي ينكسر بختها الها انت رجال ... تشوف حياتك هي تنظلم
ناطق: لا يمه والله اشيلها بعيوني الله لا يجيب مشاكل ولا طلاگ الي تردي يصير والي تريده سماره يجرالها ...
وماطولها... كدام الناس صارت الي ... محد يكدر يمسها بحجايه مو عاد يمد ايده ... عليها اني سندها من اليوم ... وانتِ واخوتها بعيوني ... اني ابنج من تحتاجيني تلگيني يمج
ايمان: ونعم منك ... بس ماريد منك شي غير تخليها تكمل ...وتحميها ...
ناطق: ان شاء الله ... وگفت
ايمان: وين رايح ميصير ابقى على الغدا ويانا ...
سماره: شفته أبتسم وفرح گلها لامي غير وكت ان شاء الله
امي بقت مچلبه بي ... اندار عليه يتشاقى ويايه ترديني ابقى
ابتسمتله ... ابقى ...
ايمان : ابقى وسولف وياها ... وهاي محمد يبقى وياكم ... بين ما اخلي الغدا ...
سماره : من طلعت امي اجى كعد بصفي ... ومحمد قريب علينا
ناطق: شلونج سماره
سماره: الحمد لله بخير
ناطق: ليش تردين تكملين شسوين بالشهاده
سماره: شو من راحت امي غيرت كلامك ... ابتسم
ناطق : لا مو غيرت بس اسأل ليش حتى اعرف شلون تفكرين
سماره: فكرت مترهم اگله امي تگول الشهاده سلاح الره جاوبته ... وصية ابويه ...
ناطق: الله يرحمه... الي تردي يجرالج ... وهذا الي اسمه جاسم واخو من يجوكم بعد ما تطلعيلهم وهسه ابلغ خالتي
سماره: امي هم متخليني اطلع من جاسم يجي بس ابراهيم خوش ولد ...
ناطق: ابديها وياج بزعل
سماره : ليش
ناطق: يصير تمدحين رجال رايدج قبلي كدامي
سماره: ناطق والله احبه مثل اخويه ...من مدحته دا امدح اخويه
ناطق: لكن هو مو اخوج وماطول ... رادج يعني ما حاسبج اخت ... يعني ما تطلعين من يجيكم ماشي
سماره: ماشي .... جنت احجي وياه وبالي يم جاسم عمي گال اليوم يجي لتفتحون الباب ...
ومن بديت ارتاح لناطق ... اجى بالي ليروح جاسم يأذي ... من يعرفه هو العريس ...
گتله ناطق دير بالك ترى جاسم شراني ...
ناطق: ليش انه مبين فقير ...
سماره: لا مو قصدي بس ردت انبهك منه
ناطق: يا حلوه تخافين عَلَي
سماره: خجلت منه ... گتله راح اروح اساعد امي انت ابقى ويا محمد ...
ناطق: وانه شسوي بمحمد ... انه رايد اخت محمد
سماره: شويه وارجعلك ... بس اشوف امي اخاف تحتاجني
ناطق: لا طولين ...
سماره ... سألتني امي عليه گتلها مبين حباب وياخذ وينطي بالحجي ... ويحب يتشاقى ... الحد هسه .. الحمد لله متفاهمين
گلتلي ان شاء الله ...
بقى يمنا الى ورا الغدا ...اسلوبه خلاني الين واخذ عليه ...
بداخلي فرحانه ... هالشخص صار سندي ... وشغلت المدرسه
انحلت هو يوديني ويجيبني بس ... ان شاء الله تعدي ويا جاسم على خير
لليل اجى عمي سولف لامي على جاسم متخبل من گله عقدت
باقي يعيط ويصيح ... لان افتهم عمي جبرني ... گايللهم هسه اروح اقتله للولد...امه باقيه تلطم ... ومجلبه بي ... وگايلتله ازوجك احلى منها ... واحسن منها ... ما قابل گايللهم لو هي لو ما اخذ
عمي جار عليه سلاح من رايد يطلع يروح لناطق گايله بس تروحلهم يكتلوك ذولي مو عبالك يخافون ... ذولي اذا واحد منهم تعرضله احد تلگاهم كلهم فوگ راسه ... يصگطوك... باقي يتعارك ويا عمي ... وامه باقيه تعيط وتهد عليه ...لحد ما ساكت )صح اسمع واقنع نفسي ... هاهيه فضت بس بداخلي ... خايفه من سكته ... گلت بعد ما اطلع من البيت ... والمدرسه ناطق يوديني ويجيبني ... وغرفتي اخلي امي تخليلي قفل اضافي
مرت كم يوم ماكو شي ... بديت ارتاح ... الى ان نزل ابراهيم ... بيومها طگيت بچي عليه ... لان اجى قلبه محروگ ...مني ...
بقى واگف بالطرمه مقبل يدخل اسمعه يگلها لامي ... بيتج يمه ما اخطي بعد ... ماطول انطيتوها لغيري ...
من سمعته طلعت ... من شافني
ابراهيم : وسفه عليج يا بت عمي تقبلين بالغريب ... وانطيتيني وعد متصيرين لغيري
حسافه قلبي حبج ورادج بالحلال ... عاديت اخويه علمودج ...
ولو ادريج راح تبيعيني ... وتضحكي عليه ... خليتي يگلي ما خليتني اخذها .... اخذها الغريب ...
سماره: اني اسمعه وابچي لان حسيت كلامه طالع من قلبه ومقهور مني ... وحسيته شكد يحبني خطيه حتى ما أذاني ولا تقرب مني ... بقى يحجي ويايه من بعيد ... وانقهرت عليه من گلي
ابراهيم : هيج اني بعينج صغير وتضحكين عليه وتأمنين على نفسج عند الغريب وتقبلين بي زوج واني من دمج ولحمج ما صخيتي تأمنين على نفسج عندي وتصيرين مرتي ...
سماره: ابراهيم والله انت غالي عليه ولو ... رايدني بغير ظرف والله ما اقبل بغيرك بس اخوك ... وگف بيناتنا ... وبعد صرت على ذمة رجال ... الله يعوضك بالاحسن مني ان شاء الله
ابراهيم: غالي وهيج رخصتيني لو مو غالي سشوين ...الله لا يخليني بعد الي سويتوا بيه
سماره: بقت امي تتوسل بي ... يدخل ... مقبل گلها يحرم عليه بيتج ماطول شاركتي بكسرة قلبي ... وطلع من يومها صدك ما شفته ومن اتذكره اموت قهر عليه .... واحس بتأنيب الظمير ..
لان حرگت قلبه ... بدت المدرسه وناطق يوديني ويجيبني ...مرت تقريبا ٤ شهور ... تعلقت بناطق ... وبديت احس نفسي حره وورايه رجال حباب وابن اوادم ....وبيوم خلصت دوامي بالمدرسه بقيت انتظر ناطق يرجعني للبيت ....ماكو تأخر عليه والدنيا دتمطر والجو مغيم .....
شفت محمد اخويه وامي ... من بعيد ... رحت عليهم.... وقلبي مقبوض من ركضتهم ...... من وصلوا يمي ....
شگو ...امي سكتت... وعيونها مورمه من البچي
محمد: جاسم ضارب ناطق طلقه
يتبع....
أنت تقرأ
قصة سماره ﴿ اليتيمه وصراع الاخوه ﴾
Mystery / Thrillerقصة سماره ﴿ اليتيمه وصراع الاخوه ﴾ حقيقيه 🚫- شاركو القصه مع اصدقائكم
