قصة سماره ﴿ اليتيمه وصراع الاخوه ﴾

بارت 14

يوم زفافي ..... من الايام الي ما انساها بحياتي
يمكن تگولون ومنو ينسى يوم زفافه ... لكن الوضع بالنسبه الي كان  يختلف ...  والذكريات الي بي تختلف
ايمان: گومي ماما كومي
سماره: فزيت ليش شكد الساعة
ايمان: لج مو الساعة ابراهيم ... اجى 
سماره: فزيت شكو
ايمان: حلف گلي جاي اسلمها لرجلها حتى يعرف وراها زلم ...
سماره: انقبض قلبي ... يوم اخاف يريد يسوي شي بمنذر
ايمان: والله هو الولد مو شراني ... بس اني هم خايفه من جيته
وعمج ماعنده علم بجيته ... امه اختارتله بت خالته ... وهو ورا
ما عرف عقدتي ... وافق .. بس يربطون كلام .. لان وضعهم  ميرهم يخطب ويتزوج واخو بالسجن ..
سماره: خليت ايدي على راسي ... استغفر الله ... اني شوكت راح اخلص من الهم والهبطات ...
خلي انزل احجي وياه واشوفه
ايمان: اكعدي واسكتي هنا ...
سماره: شلون اكعد ... غير افتهم سبب جيته ... انوب اني ما اكدر انزل واحجي وياه منذر ميقبل ... ومحذرني  من اول يوم
ممنوع التقي بأحد منهم لان يعرف جانوا رايديني ...
وانت تعرفي ميحتاج اگلج على سوالفه
ايمان: اني هم شكد احبه بس قلبي لاعب من جيته
دخلي انزل لتنزلين انت ِ
سماره: يوم عفيه رديلي خبر فدوه مو تخلين بالي
ايمان: ميخالف ....
سماره ورا عشر دقايق صعدتلي امي گلتلي ... لتخافين يگول
لو اريد اسوي شي جان سويته قبل اشهر من اول ما عرفتها عقدت ... والقصد من جيتي  ... ردت اسوي الواجب من عرفت لا ابويه ولا واحد من عمامي راح يحضر  اجيت اسلمها
لزوجها حتى يعرف وراها زلم ... واذا سماره ممرتاحه لجيتي
بس اسلم عليها واروح
بداخلي اسمع ومقهوره عليه ... هذا جاي يشوفني قبل ما اتزوج
اعرف منذر محذرني التقي بيهم لكن بهاللحظه مكدرت... افشله
واقهره وهو گطع كل هالمسافه ردت التقي بي ... وانهي اخر امل اله ويايه ... واحنا مابيناتنا زعل ...
بداخلي ما اريده يبقى ويشوفني انزف لغيره ... وارجع اگول لا خلي يبقى حتى يگطع الامل وينساني ويلتفت لنفسه لخطيبته
نزلت ....ومثل كل مره .. اشوف نظره الحب واللهفه .. وهالمره وياها ابتسامه ..شكد شفتها صعبه ادري بقلبه محروگ ويبتسم
لشوفتي ... يا ربي اغسل قلبه من هالحب وعوضه بالاحسن
سبحانك ياربي لان رجال مستقيم ويحبني بأخلاص وقلبه طيب
ما صرت من نصيبه ... بسبب امه واخو ...
الحمد لله على اختياره يمكن خلى منذر بطريقي ...
لان ما الي خير بزواجي من ابراهيم
شلونك ابراهيم
ابراهيم : شلونج سماره ... ان شاء الله بخير
سماره: الحمد لله ... على الخير سمعت راح تخطب
ابراهيم : الخير يصيبج ان شاء الله
سماره: حسيته من تنهيدته و اجابته مقهور
تعبتك ويايه انت اخويه .. وسندي واترف اذا احتاج شي انت اول واحد يوگفلي ... ان شاء الله يكتبلك السعاده وينطيك على گد نيتك الطيبه ...
ابراهيم : ان شاء الله .. وانتِ ميحتاج اوصيج اي شي تريدي ...
صارتلج مشكله لاسامح الله ... بس اتصلي على امي ...
تلگيني يمج ... انتِ بت عمي واخت اخوتي
سماره: كل الي ذكرهن مو هن السبب السبب الي مكدر يذكره
انتِ حبيبتي ..ما نطقها لسانه بس شفتها بعيونه .. هالنظره
تخليني احس بتأنيب الظمير .. وبالحقيقه اني ما الي ذنب
لو امه قابله جان وافقت عليه ... بس مترهم حتى لو امه قابله اخذه واخو دخل السجن بسببي
تريك ويانا ...
الاتفاق جان خالد يمر عليه وعلى امي وهمسه ويايه ... لان
رؤى رادت تجي ويايه ... والصدك گتله لمنذر عفيه...
ما اريد اروح وياها لان راح ارتبك  ورؤى تحب تدخل وتفرض رآيها مثل خاله واني بالي شي لتروح تزعل لو تصير مشكله ..اريد بس امي ويايه ...
منذر : حبيبتي راح يصير عليه الطريق طريقين ... اوديج  لصالون وارجع اودي امي والبنات .. لغير صالون ولازم ارجعلكم
زين دقيقه خلي ارتب ويا خالد ....
سماره: يله براحتك ... عادي اروح وياهم .... الاتفاق صار اروح وياهم ... وراها بنص ساعة  اتصل عليه
منذر : حبيبتي وحي على الصالون الي تريدي ...وهمسه رادت تجي وياج  ...  فخالد راح يوصلكم
واني اوصل امي والبنات حتى اطلع عندي كم شغله بالشقه
اريد اكملها ...بس اذا تريدين اني اوصلج ... امرلج بدل خالد
سماره: الصدك ارتاحيت خالد راح يوصلني ... جنت شايله هم
شلون منذر راح يشوف ابراهيم ... واخاف تصيرلي مشكله ...
من الصبح ... كلت خلي بالزفه يشوفه ... بلكت يعبرها
جاوبته لا اخذ راحتك خلي خالد يمر عليه ....
رحت ويا همسه وامي للصالون ... كلتلي رفاه... من عرفت متريدين تروحين على الصالون الي اختاروا تخبلت گلتله لمنذر لعد انت توصلنا وخالد يوصلها
جاوبتها ... خلي يعدي اليوم شلون مجان ... طول فتره وجودي بالصالون افكر منذر من راح يشوف ابراهيم شلون ... وبنفس الوكت ما اكدر اكسر ابراهيم اكثر واگله روحوهو الولد يريد ... يطمئن عليه
البدله جانت بوقتنا موديلها سمبل مو نفس لا مقسمه على الجسم
وتنزل منجوه اعرض وبيها ذيل بسيط وچتفها عاري ... من اختاريتها منذر گلي لعد ما اسوي بالقاعه ... بس زفه ...
اذا تختارين وحده ثانيه ... مقبطه اسوي بالقاعه
اني بوكتها حبيت هالبدله ... ومردت العرس بالقاعه بالعكس شفت الزفه اريح لان وراها نرجع للشقتنا  ...
من خلصت من الصالون ولبست بدلتي خليت شال ...
ستن ابيض حسب تعليمات منذر ...  والتسريحه جانت بسيطه
بيها اختاريتها من رحت احجز الصالون ... وگتله لمنذر اريد اطلع اخذ ورد مال شعر ابيض ( صناعي ) گلي اني اجيبلج   ورد طبيعي ابيض ... من محلات الزهور ... والصبح طلع جايبه و دزه  ويا بيت خالد وياها مسكه هم ورد طبيعي
جانت التسريحه شكد بسيطه بس الورد انطاها شكل حلو