DI SCAMMA BWOY: A Jamaican Love Story

CHAPTER 48

BADZ POV

A did ten inna di morning and mi deh pon mi way a drive guh up a Dacia fi go look fi her and mi baby.

Mi did diwn a mi lounge last night and mi good fren Kaeila *(pronounced ka-ai-la) come back from foreign fi di holiday. A couple years well mi nuh see her so we link up down a mi club last night.

She did a mi best fren inna high school. A she a di only girl weh mi see weh mi neva yet put chat to and she did a juss mi chargie.

Wen mi reach up deh mi see di benz inna di driveway so mi know she deh home.

Mi park di car weh mi normally park it den come out. Mi walk guh a di trunk guh tek up di bag a things weh mi buy fi Dacia, Devonae and her parents dem.

Mi lock di trunk and lock di car den walk guh to di gate. Mi open it and walk go up to di varendah step dem.

Mi knock di grill and mi see Nicki walk out wid mi daughter inna her hands.

"Oh a u cause mi a wonda a who a knock pon mi grill." Nicki laugh and mi laugh along wid har.

She open mi grill and mi walk in. Mi put di bag pon di seat pon di varendah and tek Devonae from her.

Mi siddun pon one a di chair pon di veranda did a play wid Devonae and a talk to Nicki. She did a say a ready she ago ready fi go down a har madda a Christmas Dinner.

How mi nuh hear Dacia inna di house?

"Weh Dacia deh?" Mi ask her.

"Dacia nuh go a party wid Nana last night and no come back. She mussi stay down a dem apartment last night." Nicki seh and mi nod.

"Oh." Mi seh. "Mi neva know she gone a party." Mi seh and Nicki laugh.

"She seh she ago enjoy herself becuase from she have baby she nuh go out go enjoy harself." Nicki explain. "She need it still cause mi see seh she a stress. She have the baby a worry bout and she hardly a go work. Right now she seh she a retire and juss focus pon her online business."

"Mi tell her dat long time but she naa listen to mi." Mi seh. Same time mi see a silver Axio a speed come up di road.

Wen it near fi reach di gate it slow down and stop a di gate. Mi see Dacia come out a smile and wave to di driver. She did inna dis likkle yellow two piece weh barely cova har body and waa white slippers. She did have on waa locs lace wig wid some pretty edges and she have waa white purse and har white airforce inna har hand.

She juss pretty suh G.

Di car turn and mi see seh a waa young bwoy a drive it. Him smile and kiss afta har and Dacia smile. Him blow di horn and drive off.

A wah di pussyclaat a gwaan dehso?

Yuh nuh see. Dacia find harself a man. Mi subconcious seh.

She cyaa have nuh man. A mi a har man.

Yuh did a har man. Yuh fuck dat up wen yuh gi har bun. Mi subconcious seh.

Mi watch Dacia as she walk up inna di yard wid di same big smile pon her face.

Wen she reach di veranda and see mi she frighten. Yuh coulda see seh she frighten from the expression pon har face.

"Morning." She seh as she try hide wah she have on and a use har hair hide her neck.

Why she a hide har neck?

Hmmm. Jesas take di wheel take it from my hand. Mi subconscious hum.

Wah yuh have fi seh.