= طب ده سابع عريس ترفضيه .. ممكن أعرف الخطط اللي في دماغك ؟
- مفيش خطط ولا حاجة يا بابا
= يعني انتي مثلا مفيش شاب معين في دماغك ؟
- لا
= مستنية خليجي مثلا يجيلك من سلطنة عمان ؟!
- مببصش للمادة
= طب قررتي تضربي عرض الحائط بالحياة الإستريت وطرقتي طرق المثلية ؟
- إيه ده لأ طبعا
= عندك توحد ؟! .. متلازمة انعزال ؟ خوف من حياة البالغين وحابة تفضلي طفلة ؟
- انا كويسة مفيش أى حاجة .. مجرد إني مش حاسة حد من العرسان اللى شوفتهم
= انتي عارفه إن أنا وأمك واخدين بعض عن حب
- عارفة
= عافرنا كتير وواجهنا أزمات وتعنت أهلنا وحاربنا كتير عشان بعض وفي النهاية نجحنا وإتجوزنا للأسف
- عارفة
= جدك زمان كان بيرسم في ضهر أمك بالحزام الجلد بتاعه
- ماما حكيتلي
= وانا مش حابب أبقي شخص منافق أحلل لنفسي الأشياء وأحرمها علي غيري .. فلو بتحبي حد معين صارحيني عادي
- ولو صارحتك هتقف معانا يعني وتفهم وجهة نظري وتقدر مشاعرنا؟
= لا هتحاربوني بقي .. ندخل بقي دايرة الحرب دي وأضغط عليه وأبعدكوا عن بعض .. آخد منك تليفونك .. أحبسك .. أجلدك بالحزام بتاعي اللى زي بتاع جدك .. أقعدك من الجامعة .. أخطبك لمؤمن إبن عمك أبو شنب وحش ده اللى مبتحبيهوش وتصارعوا تعنتي معاكوا لحد ما تقنعوني وتاخدوا بعض رغما عني
- وليه بقي
= واشمعني أنا يعني .. مش أنا حاربت ؟! .. يبقي أتحارب بقي .. لازم تحسوا بمعاناة الرحلة .. المتعة مش فى الوصول .. المتعة فى الرحلة
- مهو انا مش عاوزة ده يحصل
= يعني في حد ؟
- هتضرب ؟
= والله لأ بس أطمن
- في أيوة
= زميلك فى الجامعة ؟! .. قابلك في السكشن وقع كتابك نزلتوا جبتوه سوا وحبيتوا بعض ؟
- إيه الأفلام دي ؟! .. عرفته أونلاين عادي
= أشوفه طيب ؟
- هو كان حابب ياخد الخطوة دي فعلا وعايز ييجي يقابلك
= صورته كده عشان آخد فكرة عامة عنه ؟
- آه تمام .. هو ده
= هو ده ؟
- هو ده
= هو ده ؟
- والله هو ده
= ده اللى انتي رافضة دكتور طارق ومهندس هشام عشانه ؟
- هو ده
= يعني ده زوقك متأكده ؟ مش ماسك عليكي صور ؟! .. مش مهددك ؟! .. ساحرلك .. مش مجبرة علي حاجة ؟
- بكامل إرادتي
= ده يلعن ميتـ ين دي إرادة يا شيخة .. سواق إيه ده ؟
- أرجوك بلاش تنمر .. الحياة أزواق .. والراجل مش بشكله .. عارفه إنه مش وسيم .. بس الراجل عمره ما كان بوسامته .. وانت مش حماقي يعني وماما إختارتك عادي وإتجلدت عشانك
= إنت ؟!
- حضرتك مش حماقي يعني
= أيوة كده تمام .. فعلا هي الحياة أزواق وانتي وارثة زوق أمك
- بالظبط
= وده بيفسر المشاهد العجيبه اللى بشوفها فى الشارع من بنات زي القمر ومأنكشه فى سواقين تكاتك
- مش بالشكل
= ولا بالمضمون والله .. ولا ليها تفسير
- رغبتي وحضرتك قولت هتحترمها
= هحترمها طبعا
- أخليه ييجي يقابلك إمتي بقي عشان ترفضه ونبدأ نحارب
= لا أنا مش هحارب ده .. ده هيعورني
- أومال ايه ؟
= أنا كان قصدي الحرب العادية بتاع يكلمني من أرقام غريبة وينطلي فى الشغل يعرض عليا نفسه وأطرده ويرجعلي .. ده لو طردته هيفرد عليا قرن غزال
- والعمل ؟
= هحاربك إنتي بقي وخلاص .. هاتيلي الحزام اللى في بنطلوني من أوضتي جوه
- معنديش مشكلة .. وأنا إقتنعت بوجهة نظرك ولازم أحس بالمعاناه فى الرحلة .. المتعة في الرحلة مش فى الوصول
= هتقوليله ؟
- لا والله
= يبقي هاتي الحزام ماشي
أنت تقرأ
انتِ بجانبي
Poesiaالكتاب دا بلا اي هدف بس اي حاجه هتعجبني هنزلها هنا اغنيه، شعر، ميمز اي حاجه وخلاص🕊 عملت الكتاب دا بحيث لو مشيت يبقالي ذِكره هناا
