كُنت لابس أشيك بدلة عندي، وفي إيدي بوكية ورد وبضرب الجرس وخايف كإني داخل علي امتحان ثانوية عامة، لحد ما الباب اتفتح.
- أتفضل يابني.
= يزيد فضلك يا عمي.
"دخلت قعدت وعمال أهز رجلي من التوتر"
- إشمعنا جاي لوحدك هو الحاج تعبان ولا ايه؟
= لا الحاج والحاجة متوفيين.
- ربنا يرحمهم يارب، وأنت ماعندكش أخوات؟
= عندي إسلام أكبر مني.
- شكله مش راضي عن الخطوبة، علشان كدة ماجاش.
= لا لا والله، حصله ظروف بس والمرة الجاية هنجيلك سوا.
- ماشي يا سيدي، ندخل بقي في الموضوع؟
= اه ياريت.
- قولتلي في المكالمة إن اسمك أحمد صح؟
= بالضبط ياعمي.
- وشغال ايه بقي يا أحمد؟
= أنا مُعيد في كلية هندسة، وميكانيكي.
- درست هندسة ميكانيكا يعني؟
= لا ميكانيكي في ورشة عربيات.
- مُعيد في الجامعة وميكانيكي، ده ازاي ده؟
= ليا ورشة أنا وإسلام ورثناها من أبويا الله يرحمه، وشغالين فيها سوا من وأنا لسه عندي ٧ سنين، فمعايا الصنعة يعني ولسه ماسبتهاش.
"ملامح وشه اتغيرت"
- ومابتتكسفش لو طالب من طُلابك جه يصلح العربية عندك؟
= لا
- شقتك جاهزة علي كدة؟
= اه الحمد لله البيت بتاعنا شقتين، والعروسة تختار منهم اللي تعجبها.
- أكيد الشقة قديمة، مش أنت وارثها من الحاج الله يرحمه؟
= لا والدي ووالدتي ماتوا في حادثة ووقتها كنا متأجرين شقة، والشقتين دول جبناهم قُريب مِن تعبنا.
- ده أنت أسطي شاطر من زمان بقي.
= من وانا عندي ٧ سنين.
- بسم الله ما شاء الله، وأخوك كان كبير وقتها صح!
= لا كان عنده ١٣ سنة بس.
- أنت بتتكلم بجد؟
= والله بجد.
- طب احكيلي كدة يابني قدرتوا تعملوا كدة ازاي.
= بعد ما أبونا وأمنا ماتوا بـ أسبوع إسلام أخدني في حضنه، وقالي:
ماحدش هينفعنا ولا هيقف حمبنا غير ربنا، ولو فضلنا كدة مش هنلاقي ناكل وهنعيش علي الصدقة، هنفضل قاعدين كدة مستنيين الناس تجيبلنا أكل ولا ننزل نشتغل زي الرجالة ونصرف علي نفسنا من الصنعة اللي علمهالنا أبونا!
ساعتها قررنا نفتح الورشة تاني، في الأول الناس كانت بتجيلنا علشان عيال صغيرة ومالهمش حد ويعطفوا علينا، بس شُغل الأسطي إسلام كان الله ينور، فاللي ييجي مرة بيرجع أتنين وتلاتة وأربعة.
الورشة بدأت تكبر وزباينها تكتر، وجبنا ناس يشتغلوا معانا والأسطي إسلام أول ما جمع مبلغ كويس أخدني من ايدي ورُحنا اشترينا حتة أرض، ومع الوقت والشغل ربنا كرم لحد ما بنينا شقتين كُبار وكتب واحدة بـ اسمه والتانية بـ اسمي.
أنت تقرأ
انتِ بجانبي
Poesíaالكتاب دا بلا اي هدف بس اي حاجه هتعجبني هنزلها هنا اغنيه، شعر، ميمز اي حاجه وخلاص🕊 عملت الكتاب دا بحيث لو مشيت يبقالي ذِكره هناا
