موسم حصاد القربان

part 4

قربت عشان أفتح الباب بقلق وتردد وخوف وقدام السرير كان فيه مرايه وإستغربت لما شفت شكلي كأني بقالي شهور مبصتش لنفسي شعرى طول جداً ودقني كمان وآثار السواد تحت العين ووزني خس جداً وبقيت نحيف
وكأني إتحولت لحد تاني حاولت أفتكر ايه اللي حصلي الفتره اللي فاتت مش فاكر وكأني كنت فاقد الذاكره أو متخدر لفتره طويله
وفجأه الباب إتكسر ودخل 3 مسوخ أحجامهم قد البشر 4 أضعاف ولابسين ماسكات
وخدوني لنفق تحت الأرض لمكان يشبه المتاهه
وكانوا بيسحبوني من إيدي ورجلي بتزحف علي الأرض من الخوف والتعب والإرهاق وبعد مسافه وصلنا لغرفه كبيره فيها حوالي 20 شخص مقيدين بالسلاسل من إيديهم ورجليهم بالترتيب وكلهم نفس الجسم والوزن ونفس العلامه علي الكتف
إتحطيت جنبهم بالسلاسل والقيود وآثار التعذيب واضحه عليهم ولكن الغريب إن مفيش أي صوت منهم
إستنيت لما الحراس طلعوا بره وحاولت أتكلم مع حد فيهم شاورلي بإيده بصعوبه وكان بيترعش وفهمت إنه مش بيتكلم وعرفت إن محدش فيهم بيتكلم وفي اللحظه دي دخل الحراس مع شخص جديد نفس الهيئه والجسم والعلامه وبدأ يصرخ بشكل هستيرى ولما زاد صراخه الحراس قيدوه وقطعوله لسانه
وبعدها دخل شخص غريب رأسه أقرب للحيوان ووشه عباره عن عين واحده وفم عريض وأنف شبه مكسورة
ومعاه طبق جمع فيه أثار نزيف الدم مكان اللسان المقطوع وبدأ يشرب فيه وقبل ما يطلع بصلي بنظرات غريبه وكأنه بيوصلي رساله إن الدور عليا
وبعدها دقت الأجراس تشبه أجراس المعابد بصوت عالي جداً مكنتش متحمل الصوت علي عكس كل السجناء لأن من الواضح إنهم فقدوا السمع بطريقه مشابهه فجأه إنتهي الصوت أو إني بقيت أصم زي الجميع
وبدأت المراسم وإتشال الستار وكإننا في مسرح كبير
وظهر صاحب العين الواحده علي كرسي ذهب يشبه كراسي الملوك وحواليه الحراس وسحبوا الضحيه الأولي
مقيد بالسلاسل ومقطوع اللسان وفمه متخيط والحراس ثبتوه قدام الملك وقطع راسه بكل سهوله وبدأ يشرب الدم من واحد واتنين وتلاته بنفس الطريقه وبعد ساعات بدأ جسمه يكتمل وكأنه بيتغذي عليهم بعدها الرؤيه بدأت تختفي من عيني بسبب العرق والخوف والتعب وكل ما صوت خطوات الحراس يقرب مني جسمي يرتجف وأفتكر إن الدور عليا وإن حياتي هتنتهي في مشهد بشع زي اللي قبلي
وبعدها بشويه بدأت الأصوات تختفي تدريجي فعرفت إن اليوم إنتهي ولسه دورى مجاش
مرت أول وتاني ليله وكل يوم مستني دورى مستني رصاصه الرحمه اللي تخلصني من العذاب والألم فجأة صوت الحراس بدأ يقرب مني وتم سحبي إلي المنصه
ومش قادر أدافع عن نفسي ولا أتكلم والرؤيه مشوشه
قام الملك طلع خنجر وبدأ يخلع في عيني اليمين بكل قوه ويشرب نزيف الدم كل ده حصل وأنا شبه مخدر
مش قادر أدافع عن نفسي وبعدها صوت حد بيسحبني من رجلي وإترميت لمكان يشبه المخزن عباره عن جثث ميته ومتحلله وروايح كريهه منتشره في المكان حسيت بالتعب وفقدت الوعي وفوقت علي صوت حد بيخبط علي الباب لرابع مره بس المرادي صحيت بصيت في المرايه وكنت بعين واحده بس وسألت بتردد مين بيخبط
__أنا طارق إفتح ياعم كلنا صاحيين بره !!!!!!!!!!!
فتحت الباب بتردد مفيش حد وفجأه ظهرت واحده
تشبه البشر ولكنها شديده الجمال قالتلي إسمها أم النور
وأنها مطروده من العشيره وأسلمت ومطارده منهم
وعرفتني إن أنا في حلقه زمنيه متفاوتة وإن الموقف بيتعاد لتنفيذ الطقوس بطريقه صحيحه وأنها أنقذتني من الأعور بصعوبه والفرصه الأخيرة ليا للنجاه هيا التركيز علي الزمن والوقت لتشتيت الأحداث إفتكر تاريخ اليوم كويس 7/6/2030  أوعى تنساه طول مانت فاكره محدش هيقربلك ولو إحتاجتني هتردد التعويذه هظهرلك في الوقت المناسب وأوعا تفتح الباب لأي حد يخبط
بدأت أدور علي قلم وكتبت علي الحائط التاريخ وكلت بواقي أكل كان معايا في الشنطه وفضلت أدور علي مخرج مفيش المكان مقفل مفيش طريقه للخروج
وقفت قدام المرايه ببص لعنيا المخلوعه وجسمي اللي أصبح هيكل عظمي شبه متهالك
أنا ليه يحصل فيا كل ده أنا عملت إيه ظهرت أم النور تاني وقالتلي ده سحر أسود مشروب وجن مسخر لأذيتك
وأنت كان عمرك 6 سنين والحل في الوقت والزمن
أوعي تنساق ورا الحلقه الزمنيه المتفاوته لف عكس الإتجاه
الباب إتكسر وظهروا الحراس مره تانيه وخدوني لنفس المتاهه والغريب الغرفه موجوده ونفس الأشخاص بعدها بشويه دخل شخص جديد وبدأ يصرخ كالعاده وقطعوا لسانه وبدأت الأحداث تتعاد وأنا مش قادر أخرج من الأحداث وخدوني الحراس للأعور لخلع عيني للمره التانيه وقتها سمعت صوت أم النور في ودني بتقولي
التاريخ والوقت أوعى تلف في الحلقه الزمنيه المتفاوته
وقتها صرخت بصوت عالي 7/6/2030 في نفس اللحظه رجعت للسرير والغرفه وعيني رجعت سليمه لكن لسه جسمي مرهق ومتهالك والباب بيخبط بطريقه رهيبه
والألم بيزيد ....