خلصت جيش ومرت أيامه الصعبه وحاولت أنساها وأبدأ حياه جديده
كنت متعرف علي صحاب علي الفيس وعمرنا ما إتقابلنا قبل كده وكنت بحكيلهم عن حياتي بكل تفاصيلها
والمتاهات اللي بعيشها وبشوفها وبسمعها
وفجأوني برحله بحريه في مركب تبعهم لمده إسبوع وأن أنا لازم أكون موجود معاهم
طبعا فرصه أبدأ حياه جديده وأتعرف علي صحاب أكتر فمترددتش ووافقت علطول وخصوصا إني بحب الصيد كانوا حاجزين شقه إيجار كانت كبيره جداً وكل واحد في غرفه ووصلنا الشقه كانت الساعه 12 بالليل وكل واحد دخل غرفته كنا مرهقين وقررنا ننام
طبعا كعادتي كل يوم قبل النوم ومقاومه خيالاتي والأصوات والعالم التاني اللي داير في راسي وفي وسط كل ده خبط باب الغرفه
مين
___أنا طارق إفتح يعم كلنا صاحيين بره
"كان قايلي إن إسمه روقائيل علي إسم جده وإلاسم مش مصرى لأنه أصله تركي وأنه مش بيحب الاسم ده وممكن أناديه طارق عادي "
فتحت الباب وفي الصاله كان النور شبه مش شغال
وبدأنا نتكلم وكل واحد يحكي أكتر موقف مرعب مر عليه في حياته
وجه الدور عليا وبما إن حياتي كلها مواقف مرعبه قررت أحكيلهم من البدايه إني دخلت بيت مهجور وأنا طفل وحكيتلهم اللي حصل ومن ساعتها واللعنه ملازماني
رد طارق وقالي وريني كتفك كده مكان العلامه مش يمكن تكون كداب
وأول ما حط إيديه مكان العلامه
بدأت أحس بتنميل في كامل جسمي ومش قادر أتحرك ولا أتكلم ولا أتنفس ثابت في مكاني وبدأوا كلهم يتحولوا لمسوخ وكل واحد فيهم يقطع بأيديه جلد وشه ويبان شكله الحقيقي عباره عن نصف وشوش مشوهه كنت شايف وسامع لكن كأني متخدر مش قادر أتكلم وفجأه المكان كله إتملي مسوخ
وكأنهم في حفله وكلهم بيقربوا مني ومركزين نظرهم عليا وصوت ضحكات مرعبه وفجأه الباب خبط
صحيت من النوم
كل ده كان حلم الحمد لله يارب
صحيت بحمد ربنا إنه كان حلم
وضربات قلبي كانت سريعه جداً وخايف أفتح الباب يحصل اللي تخيلته
مين بيخبط
__أنا طارق إفتح ياعم كلنا صاحيين بره !!!!!!
للمره التانيه الموقف بيتكرر
بس أنا أكيد صاحي المرادي
كنت متردد أفتح الباب لكن في النهايه فتحت مفيش حد موجود
جريت علي باب الشقه ولسه بفتح الباب وهطلع بره ظهروا كلهم مع صوت ضحكات غريبه
إنت طلعت جبان إحنا بنعمل فيك مقلب
كنت متردد أرجعلهم ولا أجرى علي الشارع
وخصوصاً إن فيه ألم غريب في كتفي مكان العلامه
كأن محطوط علي كتفي ماده كاويه وأنا فعلا بشك في أي حد في حياتي بسبب كثره الاحلام والخيالات حتي وأنا صاحي وكنت قريت كتاب إزاي أقدر أفرق بين الشخصيه الحقيقيه والجن وقررت أفتح كاميرا التليفون وأتأكد
فتحت كاميرا التليفون ولسه هرفع التليفون لمحت التصوير فاضي ومفيش حد معايا كان لازم أهرب بسرعه
لكن التليفون وقع من إيديا علي الارض وشاشته إتكسرت وفجأه إختفوا كلهم
نزلت جرى في الشارع الساعه تقريبا 5 الفجر وكان شكل البيت الحقيقي ظاهر قدامي إنه بيت قديم جداً ومهجور
نزلت لقيت الباب الخارجي مقفول طلعت علي السور بسرعه وحاسس أن فيه حد مراقبني وصوت نفس بيجرى ورايا
وأول ما طلعت للشارع شافني واحد وأنا بنط من علي السور قالي إنت بتعمل إيه هنا يا ابني إنت متعرفش حكايه عماره شهدي أشهر عماره مسكونه في إسكندريه طبعا سمعته ومتكلمتش كانت ضربات قلبي بتزيد ومش قادر أتحرك ولا قادر أتنفس ولا أتكلم
جريت بسرعه لأقرب مكان وركبت مواصله ترجعني لبيتي بأعجوبة رجعت البيت طلعت شقتي فتحت جوجل
عماره شهدي بحث ....
وفعلا طلعت عماره مسكونه وفي نفس الوقت ده من كل سنه فيه قربان بيتقدم للشيطان عن طريق طقوس معينه والقربان ده ليه علامه محدده خاصه بيه نفس العلامه اللي في كتفي واللي بيحضر القربان ده بيكون ليه مكانه خاصه وبيترقي لدرجه أعلي في عشيرته
إتصدمت جداً وخوفي زاد لما عرفت إن أنا جزء من طقوس لمجموعه من المسوخ أو الجن ومعاد تقديمي قريب جداً
وفي نفس الوقت كنت تعبان ومرهق جداً
أخدت مهدئات كالمعتاد وشغلت الانوار وشغلت القرآن ونمت
وصحيت علي صوت حد بيخبط علي الباب
مين بيخبط
__أنا طارق إفتح ياعم كلنا صاحيين بره !!!!!!!! ........
أنت تقرأ
موسم حصاد القربان
Horrorمستوحاة من قصه مأساوايه حدثت علي أرض الواقع ..... جارى تعديلها من العاميه إلي اللغه العربيه وشكراً.....
