رسالة لكل البنات اللي بتدعي بِـ اسم شخص معين يكون من نصيبهَا ..
اقرؤُوا البوست هتفهمُوا أكتر !
- كَتبت كتابى على الشخص اللى قعدت طول عمرى أدعى بيه ، كنت دايما بدعى بأسمه وبقول إنه هو ده سعادتى وفرحة قلبى ومرضتش أطول فى الخطوبة غير شهر بس كنت خايفة يضيع منى ، مكنش بيصلى الحقيقة لكن كنت بقول عادى هخليه يصلى بعد الجواز ومكنتش حقيقى شايفة قدامى غير إنى بحبه وبس !!
بعد كتب الكتاب ابتدى يزورنى كتير طبعاً وبدأ مع الوقت يتحكم فى تصرفاتى بحكم انه جوزى وإن الوضع اتغير مش زى الخطوبة وانا كنت مبسوطة جدا ، جه فى مرة قالى انا عازمك على العشا النهاردة إلبسى أحلى حاجة عندك عشان هنقابل اصحابنا ، أنا الفرحة مكنتش سيعانى وقمت قعدت ساعة بدور ع أحلى لبس عندى وبالفعل لبست طقم كان جايبهولى بابا الله يرحمه ، انا مكنتش ملتزمة الحقيقة لكن كان جوايا حياء فطرى مكنتش بحب جزء من جسمى يبقى متفصل او متحدد فكنت بطول طرحتى شوية وبلبس جيبات ....
اول ما جه وشافنى عشان ننزل قالى ايه اللى انتى لابساه ده ! أنا ف الاول افتكرته منبهر لقيته بيقولى ايه الهلاهيل دى ما تلفى الطرحة عدل وتلبسى بنطلون شيك كده زى البنات !
انا حقيقى اتصدمت وحسيت بكسرة نِفس وخاطر أول مرة أضايق منه كده وأول مرة يعلق على لبسى كده !
قولتله اول مرة تقولى كده ! قالى الاول مكنتش أقدر اقولك حاجه لكن دلوقتى انتى مراتى وكلامى لازم تنفذيه !
حبست دموعى فى عنيا وقولتله لا مش هغيره عايزنى انزل معاك كده ماشى مش عايزنى خلاص مش نازلة !!
قالى خلاص انجزى بس عشان اتأخرنا على الناس ، ونزلت معاه وانا حقيقى ببكى من جوايا 💔
وصلنا المطعم وبالفعل لقينا طرابيزة مليانه شباب وبنات أنا أعرف معظمهم لأنه كان بيحكيلى عنهم ، أينعم مكانتش بتعجبنى تصرفاتهم لكن كنت بقول انا هخليه يبعد عنهم بعد الجواز !
المهم قربنا منهم وأول ما شافونى قعدوا يضحكوا ويقولولى مالك يا بنتى انتى لابسة لبس مامتك ليه للدرجادى كنتى مستعجلة عشان تشوفينا ! انا ابتسمت ابتسامة صفرا كده وتوقعت ان جوزى يرد عليهم لكن للأسف بصيت عليه حسيت إنه مكسوف منى !!!!!
قعدت معاهم وقولت فى بالى أعدى الليلة دى على خير وخلاص لما أروح هبقى أعاتبه على اللى حصل ، لقيت القعدة كلها هزار بالأيد وشتايم على سبيل الروشنة يعنى ؛! انا حسيت إنى مضايقة جدا فاستئذنت وقومت طلعت بره على الكورنيش أشم هوا لحسن كنت هنفجر من العياط 💔
وأنا واقفة شوفت شاب وبنت قاعدين على طرابيزة بعيد شوية يعنى واخدين جنب بعيد عن الناس معرفش ليه شكلهم جذبنى جداً البنت كانت لابسة خمار وفستان جميل والشاب كان واضح عليه سمت الالتزام ، غصب عنى لقيتنى بقرب شوية منهم ولاحظت انه الشاب ماسك مصحف وتقريبا بيسمعلها او بيعلمها القُرآن وهى كانت مبتسمة وباصاله بأطمئنان وكأنها غرقانه معاه هو وبس وكل شوية كان يرفع ايده يظبطلها الخمار لانه بيطير من الهوا عشان مفيش حاجخ منها تبان !
فاللحظة دى انفجرت حرفياً فى العياط معرفش ليه حسيت إنى مش فى آمان ، حسيت ان الشخص اللى بحبه وبدعى بيه طول عمرى مش هو حقيقى الشخص اللى بتمناه حسيت بكسرة نفس غير طبيعية جريت على جوزى قولتله يلا نروح قالى خلينا لسه شوية قولتله هتروحنى ولا أروح وحدى !!
قالى خلاص هنروح واعتذر من اصحابه وقالهم معلش الجواز والنكد بقى زى ما انتو عارفين ، انا سمعت الكلمة دى منه واتقهرت اقسم بالله قولتله واحنا ف الطريق " إنت مش بتحبنى ولا إيه يا خالد " قالى ايه لازمته السؤال ده دلوقتى قولتله جاوبنى راح قالى " لا بحبك طبعا بس لما تكونى فرفوشة كده ومدققيش ع كل حاجة وتبطلى تزنى ع حاجات كتير ومنهم الصلاة اللى علطول قرفتينى بيها " قولتله بس انت قولتلى انك هتصلى بعد ما نتجوز قالى ملكيش دعوة دى حاجه بينى وبين ربنا محدش له دخل بيها !!
هنا فضلت ساكته طول الطريق لحد ما وصلنا البيت ودخلت بدون كلام على اوضتى واتفلقت من العياط على سريرى لحد ما روحت فى النوم ، وحلمت إن بابا جه حضنى وطبطب عليا وقالى يا بنتى اللى ميخافش من ربنا ويحاول يوصلك ليه مش هيخاف عليكى ومش هيكونلك خِير !
صحيت من النوم وكلمة بابا فى ودانى طول الوقت " مش هيكونلك خير " فضلت طول اليوم بفكر ف الكلمة دى وقولت انا هكلم خالد أطمن عليه وأقوله لو متغيرش معايا مش هكمل معاه ...!
رنيت عليه كتير مردش عليا ، فضلت ارن ارن لحد ما رد عليا لكن صوت بنت ! بقولها إنتى مين قالتلى إنتى اللى مين !!!
قولتلها انا مرات خالد إنتى مين بقى ؟!
قعدت تضحك وقالت خد يا خالد الحكومه على التلفون !
كلمنى فبيقولى ايه يا بنتى فينك من امبارح مرنتيش انا سهرت مع الشلة بعد ما روحتك فاتك نص عمرك !
هنا حسيت انى بكلم حد غريب عنى ، معرفوش ، لا مش هو ده سعادتى ولا فرحتى لا انا أستحق انسان يحبنى انا ويخاف على مشاعرى وميجرحنيش ، أستحق انسان يطيب خاطرى وميظلمنيش استحق الآمان 💔
هنا بدون تفكير قلعت الدبلة وبعتله كل حاجه على بيته وطلبت منه الطلاق ، طبعا قعد يقاوح واتبهدلت كتير لحد ما سابنى لكن اتعلمت درس عمرى ما هنساه فى حياتى ....
اتعلمت لما ادعى ربنا أدعى دايما بالخير ليا " يارب ارزقنى الزوج الصالح اللى يكون خير ليا بدون ما احدد اشخاص لأن انا كبشر نظرتى قاصرة على اللى قدامى لكن ربنا علام الغيوب عالم اللى هيفرحنى ويراضينى "
اتعلمت ان لازم قبل ما اوافق على اى عريس اشوف اساس الدين عنده ادثابت ولا لأ وان مفيش حاجه اسمها هخليه يتغير بعد الجواز !
اتعلمت ان الاحترام والمحافظة مع مشاعرى وقلبى أهم من مشاعر الحب والغرام ، وآخيرا اتعلمت زى ما بابا قالى إن " اللى ميخافش من ربنا ويحاول يوصلك بيه عمره ما هيكون خير ليا "💚
#ادعي_بالخير
