ام البنات

1

#أم_البنات

المرأه القويه تعطيها النصف تعطيك أضعافه

💕💕

كلنا نعرف بعض العشائر وتقاليدهم الخاصه ..هنا نتحدث عن واحده من العادات والتقاليد وهيه الزواج المبكر .......

كنت طفله جالسه ألعب بلعابتي الجميله المصنوعه من القصب .
فأسمع خواتي يشكن همومهن لامي وكيف يتعامل معهن أزواجهن
بالضرب وعدم المبالاه

فيحااء : يمه هاج شوفي جسمي زورگه
ام تحسين : حسبي الله ونعمه الوكيل شچاه .. شسوين يايمه أصبري

خيريه أنا بطله قصتكم .. كان عمري ٨ سنوات .. كنت أنظر لأخواتي وعذابهن مع ازواجهن .... حيل كنت أخاف من مسأله الزواج .. ولكن لا مهرب هذه هيه عاداتنه وتقاليدينه

راح تبدي قصتي ...
١٩٨٥تبدأ مشوار حياتي .. اني خيريه  من محافظه ميسان ( العماره)
ساكنه بمنطقه ريفيه زراعيه تابعه الجدي ابو ابويه . وكل عمامي
وعماتي بهاي المزرعه ساكنين ...واحنه متكونين من٢ويلاد تحسين وماجد و 5بنات واني أصغرهم مثل ما نگول بزر الگعده . احنه عادتنه
البنت بس تبلغ يزوجوها حته مدرسه ماكوو . فجنت اسمع اخواتي
بيوم يجن دومهن متعاركات وي زلمهن واسمع يسولفن الامي شلون
يضربوهن جنت حيل اخاف من الزواج ... عندي صديقتي بنت عمتي
بگد عمري جان عمرنه ٨سنوات نطلع بالمزرعه نلعب لحد مايصير غروب نرجع للبيت .
ام تحسين : والله شلعت گلبي هاي البنيه ولج وينج
خيريه : هايمه شتردين
ام تحسين : يله تعالي ضمي هذه المسواك وكتري المطبخ
خيريه : اهوووو يمه مااگدر اريد اروح ألعب
ام تحسين : ولج يغمه شتلعبين تعالي تعلميلج شغله تفيدج شوف
دلالج وين وصلنه كله من وره ابوج
تحسين : هايمه شبيها خيريه
ام تحسين : ولك يمه شلعت گلبي انطيها بس تفتر وتلعب مدلله
خيريه :  هاي شبيج يمه راح اعزل يله
تحسين : ولج خيريه لزمها من اذانها بعد شتگلج امج تسوين خوش
خيريه: اي خوش . كملت وعزلت رحت طلعت العابه مالتي مسويتها
من الگصب
ثاني يوم . سمعت أبويه يحاجي امي يگلها عله صديقه يريدله مره
وهوه شيخ معروف .
ام تحسين : مرته موجوده
ابو تحسين : هاا منيه هاي المره
ام تحسين : خيريه بنتك .عاد تكبر عله ايده وهيه ما بقالها شي سنه
سنتين تبلغ والشيخ مزعل خوش شيخ ميتفوت وتضمن مستقبل بنيتك
ابو تحسين : بس هذه متزوج وشيخ والخطاطير تروح وترد عليهم وخيريه خاف مدبرها يا مره .. وتفشلنه
ام تحسين : احسن واذا متزوج عاد تلگه التساعدها يابو تحسين
خيريه : أني أسمعهم بس مااريد أتزوج خاف هم يكتلني مثل ازواج اختي رحت ختلت بالبوفيه
ام تحسين : خيريه ولج خيريه وينج تعالي . وين ولت هاي
ماجد : ها يالوالده خيرج تصيحين
ام تحسين : يايمه ادور عله أخيتك ماهيه
خيريه : أني أسمعهن يدورون عليه بس مااطلع خليت الملابس عليه
ام تحسين : ولكم الحگولي بنيتي انخطفت يبوووي
تحسين : يالوالده طولي بالج وين تروح المزرعه وكلها حلالنه ومحد غريب بيها
طلعوو يدورون عله خيريه ماخلو نهر ماخلو شجره بكل مكان وخيريه بالبوفيه تخاف تطلع ويزوجوها ويكتلها .
سمعت صوت بنت عمتها بالغرفه فتحت الباب مال بوفيه وطلعتلها ( عله فطاريتها ) اسم بنت عمتها سميه . هاي شعندج هنا واهلج خبصو
الدنيه راح اروح أگللهم
سميه : هاي خيريه لگيتها
تحسين : وينها
سميه : تعالوووو بالغرفه . جانت خاتله بالبوفيه
خيريه : أجوي گطعوني تگطع .. وابجي وأگول اني اعلمج سميه بعد مالعب وياج مزاعلتج
ابوتحسين : تعالي بويه خيريه ليش ختلتي بالبوفيه
خيريه : ( گاعده ابجي واناشغ ) بويه سمعت اتكول الامي اريد ازوجها للشيخ بويه اني اخاف يضربني مثل اخواتي
ابو تحسين : لابويه اكسر ايده الي يضربج اذا جنتي حبابه مايضربج اخواتج يصيرن وكيحات لذلك زوجهن يضربهن
خيريه : بس اني مااريد أعوفكم اريد أبقى يمكم
ام تحسين : كافي تتبجبجين ظل علمها على الدلال لحد ما يطيح حظها وكل خير مايصير براسها
ابو تحسين : عله كيفج وياهه يامره تره طفله واحد يحجي بأسلوب مو صياح وگلي البناتج مو يجن يحجن يمها معشعشات براسها الخوف يله بويه روحي غسلي وجهج
خيريه : اي بويه رايحه .......ثاني يوم اني گاعده هم العب بالمزرعه وحدي لان سميه زاعلتها . صاحتني امي
ام تحسين : ولج تعالي يمدهوره .
خيريه : هايمه خيرج
ام تحسين : تعالي اسبحي بدلي راح يجونه ناس حته يشوفونج حلوه
خيريه : منو  ذوله الناس  .
ام تحسين : هسه روحي بدلي وبعدين تعرفيهم
خيريه : رحت سبحت ولبست الثوب يمه تعاي مشطيلي
ام تحسين : مشطي انتي اني مفاضيتلج
خيريه : اني بشرتي حنطاويه وشعري ميال للشگار .مشطت سمعت ابويه وابويه ياهلا بالشيخ اتفضل اتفضل زارتنه البركه
الشيخ مزعل : رحم الله والديكم .
ابو تحسين : بسرعه يامره جيبيلنه الچاي والماي
ام تحسين : اي رايحه ..... رحت سويت الچاي وقدمت الماي .
الشيخ مزعل : اني يابو تحسين والكلام متوجهه لام تحسين ايضاا
رايدلي مره . زوجتي مامقصره وياي بس تعرفون ما انرزقت من عدها بطفل . واني اريد اطفال فتناقشنه اني وياهه لحد ما وصلنه الحل ان اتزوج
ام تحسين : شعجب ياشيخ