မောင့်နှုတ်ခမ်းပါးလေးတွေက ပြေပြေလေးပြုံးလို့။ ပုံမှန်ဆိုတည်ကြည်လွန်းတဲ့မောင်က တချိန်လုံးအပြုံးမသတ်နိုင်ဘဲ အပြုံးတွေနဲ့သတ်နေသည်။ တချက်တချက် တစွန်းတစထွက်လာသည့်ရယ်သံတိုးဖွဖွလေးက နူးနူးညံ့ညံ့။
" ပြတင်းပေါက်နားကကောင်လေးက သိပ်ကြည့်လို့ကောင်းတာပဲ "
မောင့်ကိုတစိမ့်စိမ့်ငေးနေရင်း ကြားလိုက်ရတဲ့တီးတိုးသံဟာ ရုံ့နားပါးပါးလေးထံကို ခပ်မြန်မြန်ပင်ရိုက်ခတ်လာသည်။ စူးစမ်းလေ့လာကြည့်တော့ သူတို့ မောင့်ကိုကြည့်ပြီးပြောနေကြတာအမှန်ပင်။ ဒါတွေကို မောင်က သိမည်မထင်။ကြားမည်မထင်။မောင်ဟာပြုံးမြဲပြုံး၍သာနေသည်။
ရုံ သဝန်တိုပါသည်။မောင့်ကိုအကောင်းဘက်ကပြောနေသည်ပဲဆိုဆို ရုံသဘောမကျပါ။ မောင့်ကိုရုံတစ်ယောက်သာ တစိမ့်စိမ့်ကြည့်ချင်ပါသည်။တမြေ့မြေ့ငေးချင်ပါသည်။တသသလွမ်းချင်ပါသည်။
" ဆက်မာန်ဟိန်း မပြုံးနဲ့ "
ရုံ့ရဲ့ဆူအောင့်အောင့်အသံကြောင့်မောင်ဟာ နားမလည်ဟန်ကြည့်လာသည်။
" ဘာလို့တအားပြုံးနေတာလဲ စောင်ခြုံထားအေးတယ် "
ခရီးသည်တွေအတွက်ပေးထားသောစောင်ကို သဝန်တိုစိတ်အပြည့်နှင့် မောင့်ခေါင်းပေါ်အုပ်တင်လိုက်သည်။ မောင့်ထံမှ " ဘာတွေစိတ်မကြည်သလဲ ရုံ " ဆိုတဲ့ခပ်နွေးနွေးအသံ ထွက်လာသည်။
" မပြုံးနဲ့ သူများတွေ မင်းကိုကြည့်နေတာ မင်းသိရဲ့လား "
မောင်က ခပ်ဖွဖွပြုံးလိုက်ပြီး စောင်ကိုနှစ်ယောက်လုံး၏ပေါင်ထက်ဖြန့်ကာလွှမ်းခြုံလိုက်သည်။
" ဟင့်အင်း ရုံကြည့်နေတာတော့ မောင်သိသားပဲ "
ကိုယ့်ချစ်သူကို လွတ်လွတ်လပ်လပ် ငေးမောခွင့်ရှိတယ်ဆိုသော်ငြားလည်း မောင်သိနေတယ်ဆိုတဲ့ အသိက အပြစ်လုပ်ထားမိသလိုမဝံ့မရဲလူကိုရှက်မိစေသည်။
" ငါ ငါ ဘယ်မှာကြည့်လို့လဲ "
စကားပြိုင်ပြောတတ်တဲ့အကျင့်မရှိသည့်မောင်က ထိုအချင်းအရာနဲ့ပတ်သက်လို့ ဘာမှဆက်ပြီးပြောမလာတော့။
YOU ARE READING
" စေတနာရုံ ခြုံကာလွှမ်းလို့ မောင့်မေတ္တာဝေ"
Romance🤍 In a relationship with Mg's Saydanaryone Start Date - 3. 8. 2021 End Date - 6.11.2022
