The Villain Dressed As a Little Mermaid

Chapter 8

  "ခေါင်းဆောင်ရဲ့ညွှန်ကြားချက်အရ ဥယျာဉ်တစ်ဝက်ကို ငါးကန်ဆောက်ဖို့အတွက်တူးဖော်နေတာပါ"

  စစ်သားကထိုသို့ပြော‌ပြီးနောက် လင်ရှီးအပေါ်ကြည့်တဲ့အကြည့်တွေက တဖြည်းဖြည်းပြောင်းလဲလာ၏။ သူ့မှန်းဆချက်အရဆို သူ့ရှေ့ရှိချောမောသည့်ကောင်လေးက ရေသူလေးဖြစ်‌နိုင်ကြောင်းအတည်ပြုနိုင်လုနီးပါးပင်။

   ထိုအချက်ကိုသတိထားမိလိုက်သော စစ်သားသည် သူ့အံ့ဩမှုကိုမဖုံးကွယ်နိုင်ပဲလင်ရှီးကိုစိုက်ကြည့်နေသည်။

   ငါးကန်တကယ်ဆောက်နေတာကို သိလိုက်ရတော့ လင်ရှီးနှလုံးသားထဲမှာမပြုံးပဲမနေနိုင်။ သူထိုဖြစ်နိုင်ချေကိုတွေးခဲ့ပေမယ့် သူ့‌အတွေးတွေကအမှန်မဟုတ်လောက်ဘူးဟုပဲထင်ခဲ့တာ။ မမျှော်လင့်ပဲ ချင်ရှောင်းကတကယ်ကြီးသူ့အတွက် ငါးကန်ဆောက်ပေးတယ်။

   ငါးကန်၏အရွယ်အစားက ပြင်ဆင်ပြီးရေအပြည့်ထည့်ထားသည့် ရေကူးကန်ကြီးနှင့်ပင်တူညီလေသည်။ ရေသူများအတွက်တော့ ထိုမျှလောက်အရွယ်အစားကြီးမားသည့် ငါးကန်သည် တန်ဖိုးကြီးအိမ်ကြီးတစ်လုံးနှင့်ညီမျှသည်။

   ထိုအမျိုးသားအပေါ် လင်ရှီး၏မျက်နှာသာပေးမှုရာခိုင်နှုန်းက ငါးမှတ်ထပ်တိုးလာပြန်၏။ အေးမြသောလေပြေကတိုက်ခတ်လာသည်။ လင်ရှီးအဝတ်တွေကပါးပေမယ့် သူလုံးဝမအေးပေ။ သို့သော်သတိမထားမိခင်မှာပဲနှာချေလိုက်၏။

   "မင်း၊ အိမ်ထဲဝင်ချင်လား၊ အပြင်မှာလေတိုက်နေလို့အေးတယ်"

  စစ်သားကရေသူလေးအေးပြီးနှာချေနေတာကိုမြင်တော့ သူချက်ချင်းဂရုတစိုက်မေးလိုက်သည်။ လူတွေက အားနည်းတဲ့သူ‌ကိုဂရုစိုက်တတ်တာ သဘာဝပဲဖြစ်သည်။ အထူးသဖြင့်လှတဲ့သူတွေကိုပေါ့။

   လင်ရှီးမူလက ဥယျာဉ်ထဲတွင်ဆက်နေချင်သော်လည်း ပတ်ပတ်လည်မှတိုက်ခတ်နေသော လေများကသူ့ကိုမသက်မသာဖြစ်စေသည်။

  မနေ့ည သူဒီကိုရောက်တဲ့အချိန်တုန်းကတောင် ဒီလိုမခံစားခဲ့ရပေ။ မနေ့ညကအကြောင်းပြန်ပြောရလျှင် လင်ရှီးထိုအချိန်တုန်းက ယာဉ်ပျံပေါ်မှဆင်းလာသည့် ချင်ရှောင်းကိုပြန်လည်သတိရမိ၏။သူ့တစ်ကိုယ်လုံးကို ချင်ရှောင်းကပွေ့ချီထားပြီး မြေကြီးကို သူလုံးဝမထိလိုက်ရပေ။ ထိူလူရဲ့ခန္ဓာကိုယ်ကကျယ်ပြန့်ပြီး ထိုအချိန်ကသူ့ခန္ဓာကိုယ်နှင့် လင်ရှီးကိုလေတိုက်မခံရအောင် ကာထားခဲ့တာဖြစ်နိုင်သည်။ အဲ့တာကြောင့် လင်ရှီးဘာမှမခံစားခဲ့ရခြင်းပင်။