حواديت بطعم الحب

إسكريبت 5

- الملك بيؤمرك تفضل في القصر.
- أنا مش عاوز أمر من الملك.
- عاوز ايه يا غيث.
- عاوز أمر من قلب بنت الملك.

__________

- مولاتي، الملك طلب حضرتك عشان يبلغك بالجديد، هو دلوقتي مستنيكي في غرفته.

قومت بكسل من السرير، حركت دراعاتي في الهوا بشكل عشوائي وبعدين بصيت ليها وقولت بهدوء:
- طيب يا كريمة، قولي له إني جاية.
بعد ما اخدت شاور ولبست لبس يليق ب الاميرة التعيسة، نزلت بخطوات هادية على السلم، لغاية ما وصلت للغرفة بتاعه الملك، الحُراس إنحنوا قصادي وفتحوا ليا الباب، دخلت لقيت الملك قاعد بهدوء، إنحنيت له وعرفت إن هو حاليا مش عاوزني ك سلمى بنته، عاوزني ك الاميرة سلمى، أميرة مملكة السلام واللي هتستلم العرش بعد كام يوم بس، قولت بنبرة هادية مخالفة لطبيعتي:
- تحت امرك مولاي.
- إقعدي هنا يا سلمى، معادش معانا وقت لحفلة التتويج، ولسه محددناش اي تفاصيل ليها.
- متقلقش، هبدأ اشتغل بكل جد عشان الحفلة تليق بمقامك.
إبتسم- النهاردة هيجي المسؤول عن التحضيرات، عاوزك تساعديه وتاخدي بالك من كل تفصيلة.
حركت راسي بهدوء وإستنيته يكمل كلامه لكنه سكت ف إستأذنت ومشيت.
____
مر وقت مش كتير، ووصلت عربية مختلفة عننا، باين كده إن المسؤول ده مش من المملكة، وقفت في إستقبالهم بكل شموخ، شاب، وسيم، باين عليه انه تمانية وعشرين سنه ميزدش عن كده، طويل شوية و....
فوقت على صوته لقيته مادد ايده ليا وبيقول ببسمه بسيطة:
-أهلا بيكِ يا أستاذة، ممكن تنهدي والد حضرتك والاميرة سلمى، قوليلهم إن المهندس غيث وصل..

محطتش ايدي في ايده، قولت بنبرة تليق ب أميرة هتستلم عرشها وتكون ملكة بعد كام يوم:
لما تقف قدام الاميرة، متمدش ايدك، تنحني بهدوء.

حاجبه إترفع وبسمة سخرية ظهرت على شفايفه وقال:
-كلامهم عنك صح، مغرورة ومبتحترمش ضيوفها، ثم إن انا مش من المملكة عشان أنحني، انا حر، مش بيقيدني ملك ونظام ديكتاتوري.

نظره التحدي والثقة اللي في عيونه نرفزوني، لكن حاولت اكون هادية، وقولت بتحدي:
- رأي الناس مش مهم، ومادام إنت في مملكتي والقصر بتاعي يبقى تتبع نظامي، مش تتواقح قدامي.

- انا وقح؟!
-ومعندكش ذوق كمان.
-يمكن، رأيك ده ميهمنيش، في أقرب باسكت وأرميه فيه، انا هنا عشان انفذ إتفاقية بيني وبين الملك، مش بيني وبين بنته المتكبرة المغرورة.
إبتسامة ظهرت- عارف يا غريب إنت انا المفروض اعمل فيك ايه على وقاحتك دي؟
- مش مهم، وهفكرك تاني يا سمو الأميرة، انا مش من مملكتك، انا من بلد بعيد عنكم، جاي هنا عشان شغل ف مش فاضي اضيع وقتي في نقاش تافه مع واحدة زيك.
- إتفضل في غرفة الضيوف، هبلغ جلالة الملك إنك وصلت.
مشيت من قدامه، وغد ووقح، إزاي يتعامل مع الاميرة كده، حتى لو مش من المملكة انا ليا إحترامي.
- مهندس الديكور اللي جلالتك طلبته في إنتظار جنابك.
- انزلي ورتبي كل حاجة خاصة بالحفلة معاه، انا عندي شغل حاليا هخلص واقابله.
- انا اقعد مع الوقح ده، مستحيل..