حواديت بطعم الحب

حواديت نيران وزين ٢

#حواديت_نيران_وزين

Loka Ahmed

اسكريبت لُقانا صدفه♥..

انا بحب السفر اوي وبالذات لما بيكون في القطر بحس اني عامله زي الفراشه كده.. ليها اجنحه متلونه وجميله..
كنت مسافره في القطر وجه عسكري قعد جنبي باين عليه انو ميعرفش حاجه واول مره يركب قطر ف سألني: لو سمحتِ يا انسه هو انا ممكن اطلب منك طلب.

_اتفضل.

- انا كان معايا صاحبي ومش لاقيه وانا صراحه اول مره اركب قطر ومعرفش اي حاجه ف ممكن تقومي معايا ندور عليه.

مجنون ده ولا ايه.. بس شكلو طيب اقوم معاه ولا مقومش.. فينك يا هاجر كان زمانك قولتيلي اعمل اي دلوقتي.. انا هروح وخلاص هو مش هياكلني يعني قمت وقفت وهو وقف مشيت قدامه كان بيبص علي الركاب زي ما يكون تايه شاف حد راحلو جري وقاله بخضه: كده يا رامي تسيبني.

صاحبه دا ابتسم وقاله بهدوء: معلش بس اللي قطع التذاكر قطعهم الاتنين بعيد عن بعض ف كل واحد فينا هيبقي قاعد لوحده متقلقش محدش هيخطفك.

بصله وقال قبل ما يلف ويمشي: انا اسف اني بدور عليك يا كلب البحر انت وكمان مشحطط الناس معايا ياله يا بنتي خلينا نمشي.

لف ومشي قدامي وانا مشيت من غير ما اتكلم وصلنا مكانه حطيت الهاند فري ف ودني وسندت علي الشباك وغمضت عيوني كنت حاسه بيه وهو قاعد قصادي زهقان مش لاقي حاجه يعملها سمعت صوته وهو بيقولي: انتي اسمك ايه.

فتحت عيوني ملقتش حد قاعد ف قولتله: بتكلمني انا.

- هو فيه حد غيرنا هنا.

- اسمي نيران.

- وانا اسمي زين.

- اهلا يا زين.

كنت راجعه اسند دماغي علي الشباك تاني بس صوته منعني: معلش اتكلمي معايا عشان قاعد لوحدي والطريق طويل وكمان رامي مش معايا ف زهقان.

ابتسمت- هتكلم اقول اي يعني.

- اي حاجه زي مثلا ساكنه فين وبتحبي ايه كده اي مواضيع تعدي يومنا دا علي ما نوصل.

حكينا كتير اوي عرفت عنه حجات كتير زي انه بيحب القهوه وعندو تلاته وعشرين سنه واهلو متوفين ورامي اقرب واحد ليه.. بعد ساعات القطر وقف في استراحه ودي كانت الاستراحه الوحيده في الطريق ده القطر بيقف فيها حوالي ساعه عشان السواق يرتاح من الطريق الطويل اوي اللي مشيه ويجهز للطريق اللي لسه هيمشيه الاستراحه دي كانت قدام البحر انا قعدت علي الشط وبقيت اتفرج علي الامواج وجمالها وجمال القمر وصورته اللي معكوسه في الميه.. كنت بحدف حجاره صغيره ومع كل حجر اتمني امنيه بس لقيت حد جاي يقعد جنبي ف بصيت لقيته زين قولتله: كده هدومك هتتوسخ.

- مش مهم شكل كده مكتوبلي ادايقك طول السفريه دي اصل الواد رامي سابني لوحدي وقالي جاي ف معرفش حد غيرك.