Light Of The 'YuLong' [Complete]

-4-

Uni
/

"မနှင်းဆီ မနှင်းဆီ
ပြုံးပြုံးကလေးနေတတ်သည်
မနှင်းဆီဘာတွေရေး
ကကြီး၊ခကွေးရေး
လက်ရေးလေးကဝိုင်းလို့ညီ
ပန်းကလေးလိုသီ
မနှင်းဆီပါးအို့လေး
ပန်းကလေးလိုမွှေး"

ကျောက်သင်ပုန်းမှာရေးထားတဲ့ကဗျာကိုကလေးတွေကသံပြိုင်လိုက်ဆိုကြတယ်။ သင်ရိုးညွှန်းတမ်းအရကဗျာတစ်ပုဒ်စ၊နှစ်ပုဒ်စပါတာမို့ ရှောင်းကျန့်ကဗျာသင်နေရတယ်။

"ဆရာလေး မနှင်းဆီဆိုတော့ပန်းကလေးပေါ့နော်"

ရှေ့မှာရေးပြထားတဲ့ကဗျာကိုဖတ်ပြပြီးကူးခိုင်းထားတုန်း ဟွားဟွားကထမေးလာတာမို့ ရှောင်းကျန့်ခေါင်းညိမ့်ပြလိုက်တယ်။

"ဟုတ်တယ်လေ ဟွားဟွားရဲ့"

ရှောင်းကျန့်ကပြောတော့ ဟွားဟွားကသဘောပေါက်သလိုတဟီးဟီးရယ်တယ်။

"ဒါဆိုသမီးနဲ့တူတာပေါ့နော် ဆရာလေး"

ဟွားဟွား(ပန်းပန်း)ဆိုတဲ့နာမည်အရ မနှင်းဆီကသူနဲ့တူတယ်ဆိုတယ်ဆိုပြီး ဟွားဟွားကသဘောတကျပြောနေတာမို့ရှောင်းကျန့်ပြုံးလိုက်တယ်။

"အင်း ဟုတ်တယ် ဒီကဗျာကဟွားဟွားအတွက်"

ရှောင်းကျန့်အပြောကြောင့် ဟွားဟွားကကျေနပ်သလိုပြုံးပြီးစာငုံ့ရေးနေတော့တယ်။ ကလေးတွေကငြိမ်ငြိမ်သက်သက်စာရေးနေကြတာမို့ ရှောင်းကျန့်လည်း ဆရာကိုင်ကျောင်းသုံးစာအုပ်ကိုထိုင်ဖတ်နေလိုက်တယ်။

"ဆရာလေးရှောင်းကျန့် နေ့လည်စာ"

အသံလာရာဆီကြည့်မိတော့ စာသင်ခန်းဝမှာတိုင်းရင်းသားငဂျစ်ဝမ်ရိပေါ်။ လက်ထဲကစာအုပ်ကိုချပြီးအနားသွားတော့ ထမင်းချိုင့်ကိုလက်ထဲထည့်ပေးလာတယ်။

"ရိပေါ်ရောစားပြီးပြီလား"

ထမင်းချိုင့်လေးကိုနီးရာစာရေးခုံပေါ်တင်ထားခဲ့ပြီး စာသင်ခန်းအပြင်ကိုလျှောက်လာရင်းရှောင်းကျန့်မေးတဲ့အခါရိပေါ်ကချက်ချင်းခေါင်းယမ်းတယ်။

"ကျွန်တော်မစားရသေးဘူး ဆရာလေးဗိုက်ဆာနေမှာစိုးလို့အရင်လာတာ"