حب و حرب في حظر التجول

الجزء الثاني

الفصل الثاني
__
(صباح جديد،جده)
الطيار أعلن عن وصول الرحله إلى جده بالسلامه، و لأول مره بنات متعب يشوفون السعوديه.
حور:واو بابا ذي السعوديه.
ترف:it's beautiful ( إنها جميله).
متعب بضحكه:يا بابا ذا مطار جده الجديد.
زين و هي شايله غنى:بس شفناها من الشباك.
مدى:شفنا البحر بس.
متعب:جده تعتبر مدينه ساحليه و تسمى عروس البحر الاحمر.
مها:متغيره عليك؟
متعب:كثييير.
حور:طيب نروح نتفرج عليها.
متعب:لا لا أخاف تفوتنا الطياره و عمو سامر ينتظرنا في المطار حرام، ننتظر الرحله و نتسوق عشان العبايات لازم تلبسونها.
ضحى بفرح:العبايه مثل اللي تلبسها خاله منار.
مها و مدى:ضروري يا بابا.
متعب:ايه يا بابا ضروري، شوفوا ذا السوق ادخلوا و اشتروا منه العبايات اللي تعجبكم و بأجلس مع غنى و غزل، طلع البطاقه و أعطى زين:أنتِ حاسبي.
زين:حاضر.
متعب تنهد و طلع الجوال و أرسل:وصلنا السعوديه يا عم سلامي لك و لأم زين، و قفل الجوال و ناظر في غنى اللي تضحك له و غزل اللي نايمه و بحزن:الله يسامحك يا أم زين.
انتبه لجية زين و بغضب:بابا العبايات هنا غاليه.
متعب:بكم؟
زين:٤٠٠ ريال و قماشها كانها كيس نايلون، أخواتي لو ما سحبتهم من هناك بيعلنون افلاسك للمره الثانيه.
متعب ابتسم:خذوا اللي تبونه يا بابا.
زين:ترا المحل نصاب.
متعب:لا تخافين يا بابا الفلوس واجد و ذي الاسعار.
زين استسلمت:حاضر، و مشت.
متعب إبتسم:أنتي سندي بهالدنيا يا زين.
ضحى جت له و لفت قدامه:حلو اللون يا بابا.
متعب:حلو عاد عشقك هاللون.
ضحى:لا الكحلي لون ترف المفضل أنا الأحمر، بابا عندي طلب؟
متعب:إذا قدرت عليه.
ضحى:أبغا شادو جديد من ذا المحل.
متعب بحلق بعيونه:وش شادوه؟ وقته الحين يا ضحى الله يهديك.
ضحى بترجي:بابا بس شادو.
متعب:بتجلسين ساعه عشان تتسوقين خليها وقت ثاني.
ضحى:بابا بس.....
متعب بحده:خلاص قلت لك مو وقته و لازم تعرفين إن حالنا مو مثل أول.
ضحى بحزن:معك حق، أنا آسفه.
متعب:روحي لزين و اطلبوا لنا قهوه.
ضحى مشت بزعل.
متعب همس:الله يصلحك يا ضحى.
__
(أبها،بيت عبدالعزيز)
هديل تركض لغرفة البنات و فتحت الباب بهدوء و مشت لكرسي ياسمين و هزتها:ياسمين، ياسمين.
ياسمين فتحت عين واحده و بصوت كله نوم:وش هو؟
هديل:قومي يلا بننزل أبها.
ياسمين مسحت على وجهها:ليه؟
هديل:عمو سامر مسوي غدا في بيته عشان اخو عمه منار جاي.
ياسمين عقدت حواجبها:غريبه ما سواه هنا.
هديل:سمعتهم يقولون انه عشان جدي و أخوه حالفين ما يدخلون بيوت بعض، سحبت اللحاف:قومي يلا الكل قام يجهز لازم يصلون الجمعه بأبها.
ياسمين:يلا يلا.
بسمه دقت الباب و دخلت:بشري يا هديل صحت ياسمين، شافتها:صح النوم.
ياسمين جلست:هلا.
بسمه:يلا قومي البسي معزومين عند عمك سامر.
ياسمين ناظرت لساعتها:الساعه عشره.
بسمه جلست جنبها:ايه قمنا و فطرنا و أنتِ باقي نايمه.
ياسمين:ما نمت البارح الا متأخر.
بسمه:ليه شي يوجعك؟
ياسمين:لا لا عشان نمت في السياره.
بسمه:يلا قومي عاد أعرفك تطولين و عمك يقول يصلون الجُمعه هناك.
ياسمين:طيب.
__
(مطـار أبـهـا)
متعب و بناته نزلوا لمطار أبها و انتظروا شناطهم و كل وحده منهم شالت شنطتها.
ضحى بقوه:كأنها دولاب.
ترف:نجيب عربيه مو أحسن.
متعب انتبه للعربيات و اخذ وحده و شال كل الشنط فيها:يلا امشوا معي.
زين:الحين ليه ما هبطنا على طول.
متعب:عشان الجو.
حور:واضح أن الجو هنا يفتح النفس.
متعب ابتسم:هذا عمكم سامر، و أشر له.
سامر ابتسم:مرحباً الف ، و حضنه بقوه:يا جعلها ترحب ملايين يا أبو زين، حياك الله نورت السعوديه، و نزلت دموعه بصمت.
متعب:الله يسلمك بأهلها منوره يا حبيبي.
سامر بعد عنه و مسح دموعه.
متعب:تعالوا سلموا يا بنات، و أشر:ذي زين الكبيره.
زين ابتسمت و تقدمت و مسكت يده و سلمت و سامر باس جبينها و بعدها ضحى ثم ترف ثم حور ثم مدى و مها.
سامر للتوائم:لازم أحط لكم علامه عشان أميز.
البنات ضحكوا.
متعب أشر:و ذولا التوائم الأخير غزل و غنى.
سامر تخرفن:اااه ياربي عالأرانب ماشاء الله، و باسهم.
متعب:تسلم.
سامر بعد عنه:ذا كل عفشكم يا أبو زين.
متعب:ايه بيكفي السياره؟
سامر:ايه ايه يكفي و نص معي جمس أبو يامن، يلا مشينا، وسحب العربه معه و مشوا كلهم.
__
(بيت سامر)
بعد ما رجعوا من صلاة الجمعه، تقلطوا بمجلس الرجال و الجد عبدالله يوقف ويناظر للباب متى ينفتح ،و الكل ملاحظ هالشي.
عبدالعزيز:أقعد يا عبدالله إن شاء الله يوصلون على خير.
عبدالله بتوتر:إن شاء الله بس ما عاد أقدر أصبر.
سلطان:صبرت ٣٠ سنه مو قادر تصبر هالدقايق ياعم.
زيد:ما ألومه جيران عمي سامر عندهم غدا والناس داخلين خارجين و وترونا.
انفتح الباب وناظروا كلهم للباب ويسمعون صوت عند الباب.
زين باستغراب:وين نروح؟
ضحى:وش عرفني؟
ترف:دفوا عربية البنات و ادخلوا و الا نادوا عمه منار.
زين دخلت و دفت العربيه وشافت الرجال بالمجلس وانصدمت.
البنات ناظروا في الرجال وانصدموا مثل زين.
عبدالعزيز باستغراب:من أنتوا يا بنات؟ ضايعين.
فيصل بهمس للعيال:يااالبببيييه.
زين صغرت عيونها لما عرفته:جدو عبدالله.
عبدالله فز:زين أنتِ زين صح.
زين ابتسمت:ايه أنا.
زيد:اسم على مسمى.
متعب دخل و سلم ومشى لابوه وحضنه ويبكي مع أبوه و سلم على راسه ويدينه ونزل لرجوله يسلم عليها.
كل اللي بالمجلس تأثر.
متعب بعد عنه وابتسم:وش أخبارك؟
عبدالله ببحه:طيب لين شفتك و رجعت لي بالسلامه الحمدلله يارب.
متعب باس راسه:الحمدلله، سلم على عمه و سلم عليه مثل ما سلم على أبوه و عبدالعزيز كمان أخذت الدموع نصيب وأكيد بيبكي وهو متربي مع عياله ويعده واحد منهم.
متعب سلم عالكل وجلس وسامر اللي شاف البنات عند الباب دخلهم المجلس يسلمون على جدانهم و أعمامهم وصافحوا الشباب ودخلوا عالحريم اللي قسمهم كان بعيد عن الرجال وما سمعوا أي شي.
منار لما شافتهم نطت وبسرعه:هلا هلا.
زين ابتسمت وحضنتها:كيفك يا عمه؟
منار بعدت عنها:بخير الحمدلله، ناظرت في البنات وحضنت كل وحده فيهم وسلمت.
البنات جلسوا بعد ما سلموا عالكل وتعرفوا عليهم،
الا منار اللي مشت بسرعه للباب بعد مالبست طرحتها و تسلم على أخوها وكان صوت بكاها واصل لهم.
عبير:وين أمكم؟
البنات ساكتين و يناظرون في بعض.
بسمه:تعبانه و ما جت معكم.
زين بكذب:لا بتلحقنا بعدين.
هديل:الحمدلله إنكم كلكم بنات كذا ضمنا الفريق.
البنات مبتسمين لها.
ياسمين حست إنهم ما فهموا على هديل:تتكلمون عربي؟
زين ابتسمت:ايه بس أحياناً ندخل خط بالانجليزي.
ترف:و فاهمين على هديل وش تقول و ان فريق البنات زاد بجيتنا.
منار دخلت لهم و هي تمسح دموعها و شافت التوائم:الله لا يحرمني، هذولا الافراد الجدد.
حور:هذولا بالغلط على قولة أمي.
منار ضحكت:لا ان شاء الله فيهم الخير سامر أنهبل يقول بعد الغدا جيبيهم لي.
عبير:الله يرزقكم إن شاء الله.
الكل:آمين.
منار انتبهت:تبون قهوه؟
مدى و مها:لا.
ضحى:شكراً يا عمه، ما أحد يشربها منا.
منار:لا دام صرتوا خلاص سعوديين رسمي لازم تشربونها.
زين بضحكه:ليه أحنا وش هو من أول.
عبير:بتحبونها صدقوني.
هديل تناظر في التوائم:عادي نشيلهم.
زين:ايه عادي ،و وقفت و دفت العربيه لهديل:خذي راحتك بس انتبهي لا يرجعون عليك.
ياسمين:ما ينكرون الناس؟
ترف:لا بالعكس يحبون الناس.
ياسمين:اذا أعطوني الثانيه.
منار دفتها لياسمين و أمها جنبها:الله يحرسكم يارب.
سامر من الباب:منار.
منار أشرت:شفتوا عمكم نادا، و مشت له:لبيه.
سامر:وصل المطعم بس متأكده يحضرونه جوا و نكون سفره واحده.
منار:أيوه يا عيوني الميز ينحط مكان واحد و بعدين كلنا معارف.
سامر:طيب يمكن حريم أخواني ما يرضون يدخلون على متعب.
منار:سامر تعرف غرفة الطعام واحده وين بأحطهم، و الا تدري أسأل رجالهم.
سامر:تمام، و مشى.
منار رجعت لهم و تسولف مع الكل و تضحك، بعد دقايق سامر ناداها و خبرها وانه قلط الرجال عالغدا و دور الحريم.
منار:يلا تفضلوا عالغدا و البنات البسوا طرحكم لأن سفرتنا وحده، و أشرت على ياسمين هديل.
عبير و بسمه مشوا قبلهم و ياسمين و هديل لبسوا الطرح.
زين:عمه منار نلبس أحنا و الا عادي.
ضحى:ترى تونا نعرف نلبسها في المطار.
منار:لا ما فيه داعي كل لبسكم حلو و مرتب و مافيه اي عُري.
ضحى:أشكالنا حلوه.
منار:تهبلون.
زين دفت عربية أخواتها و سمعوا صوت الجد عبدالله:منار وين بنات متعب؟
منار:هذا هم جايين.
زين و أخواتها دخلوا و بدأيغرفون لهم من الأكل.
ترف اللي طفشت من نظرات العيال همست لأخواتها:أقول ترا في شي في وجيهنا عيوا يبعدون نظرهم أول مره يشوفون بنات.
ضحى بتكشيره:طنشيهم.
الحريم غرفوا لهم كلهم و جلسوا عالطاولات متفرقين.
هديل تناظر للعيال اللي يناظرون لبنات متعب و همست لياسمين:العيال كلهم يناظرون في زين.
ياسمين بضحكه:مهابيل.
هديل:يزيد واضح إنه في عالم آخر من حظه زين جلست بنفس طاولته هو و يامن و عمو سامر.
غرفة الطعام كانت تنسيق جميل و كبير كأنها غرف طعام حفلات، الطاولات دائريه و رخام و على كل طاوله ٤ كراسي قماش و دولاب كبير فيه مواعين البوفيه غير الإكسسوارات اللي مجمله الغرفه.
ياسمين ناظرت و شافت كيف العيال جد متخرفنين على زين و هي تكلم سامر، بعدت نظرها:كأنهم مو شايفين خير.
سكت الكل فجأه، و ترف سمعتها و صوتها عالي شويه:مين اللي مو شايفين خير؟
الرجال و الحريم ناظروا كلهم لطاولتهم و ياسمين سكتت.
هديل ضحكت بخفه.
ترف ابتسمت:آسفه.
ياسمين بابتسامه:عادي.
عند طاولة متعب و الرجال متعب انتبه لروبيان من بين اللي اختاره و سأل:سلطان ذا روبيان؟
سلطان شافه:اي و الله.
متعب:متأكد إني ما أخذت منه.
سلمان:هي الشوربه الوحيده الموجوده في الأصناف.
متعب تذكر و نادا:ضحى، حور.
الكل ناظر له.
ضحى و حور:هنا بابا.
متعب مشى لهم:وش أكلتوا؟
ضحى رفعت صحنها:اللي تشوفه.
حور رفعت صحنها:هذا اللي أخترت.
متعب:انتبهوا ترا لقيت بين السووب روبيان لا تاخذون منه.
ضحى و حور:ok.
متعب جلس يكمل غداه.
فجأه دقت غزل بالصوت و زين ناظرت لها:What؟
غزل تبكي تبي تطلع و غنى نايمه جنبها.
زين كانت تأشر لها:No.
غزل زادت تبكي و سببت إزعاج.
متعب صرخ:جيبيها يا زين.
زين وقفت:ترا تبي تطلع.
سامر:طلعيها و جيبيها لي أنا.
زين ما قدرت تفتح الحزام و دفت العربيه و دقت كاس يزيد اللي انكب على ثوبه و يزيد الكشخه ما يحب يشوف شي وصخ و خصوصاً على ملابسه.
يامن بصدمه:يا ويلي.
سامر:أوب أوب أوب.
ياسمين و هديل شهقوا.
زيد بهمس للعيال:بتموت البنت.
زين وقفت بسرعه و شافته:أنا آسفه أنا و الله آسفه، أخذت المناديل و صارت تمسح:أنا جد جد آسفه.
يزيد ابتسم لها و بهدوء:عادي ما صار شي.
زين رجعت شعرها لورا:I am sorry really sorry.
يزيد مسك يدها مع المنشفه و ناظر في عيونها:قلت لك ما صار شي، it's ok.
زين غمضت عيونها و فتحت بصدمه على حركته و سحبت يدها بهدوء.
سامر فك الحزام و رفع غزل:كان عالق الحزام.
زين لفت لسامر:ايه لأن عيا يفتح لي.
متعب من سمع صوت زين تتأسف وقف بسرعه و مشى لعند طاولتها:وش صار؟ لمين تتأسفين؟
زين أشرت:انسكبت عليه الكولا كلها بعد ما دفعت عربية التوينز بالغلط.
يزيد بابتسامه:عادي يا عم حصل خير.
متعب:أحنا آسفين، ناظر لزين:قولي لعمتك منار تعطيه من ثياب سامر.
زين هزت راسها بايه.
يزيد:لا لا معي غيار بالسياره راح البسه بعد ما أتغدا، روح أنت كمل غداك.
زين توترت و أخذت غزل من سامر:أعطني إياها.
سامر:يا بابا ما أكلتي أنتي إجلسي كملي غداك.
زين شالتها و دفعت العربيه:أنوم غزل و أجيك.
متعب:أعطي ساندي تنومها و هي وش وظيفتها؟
زين:نسيت إن ساندي مريضه، و طلعت من عندهم و جلست بالصاله وهي مكشره و ناظرت في غزل:كذا تحرجيني قدام الكل.
غزل ابتسمت.
زين بنفس التكشيره:أنا زعلانه منك.
غزل ضربت يدينها ببعض و تطلع أصوات كيوت.
زين تنهدت و ناظرت في غنى اللي نايمه، وقفت و أخذت الشنطه و بسرعه عملت رضعه لغزل:وين كنا و فين صرنا؟ و أعطت غزل و انسدحت جنب غنى و صارت زين تهز العربيه الين نامت غزل، انتبهت لمنار:الله جابك.
منار بفرح:نامت.
زين:ايه بس لازم لهم غرفه عشان الازعاج.
منار:جيبيهم جيبيهم، و مشت زين مع عمتها و فتحت الغرفه:ذي نص مظلمه.
زين تهمس:حلو ذا جوهم.
منار بهمس:حطيهم و روحي كملي أكلك.
زين طلعت مع منار بهدوء و تنهدت:ما أقدر ، أحس متفشله من ذا الولد اللي كبيت عليه الكولا.
منار:لا عادي مافيه شي، يلا تعالي.
زين مشت معها و دخلت غرفة الطعام و جلست مكانها من دون ما تناظر لهم.
سامر بصدمه:نامت.
زين هزت راسها بايه:عارفه إن الدلع ذا كله نوم.
سامر:يلا كملي أكلك ما عاد لك عذر الحين.
زين ابتسمت له.
__
بعد الغدا
الجد عبدالله جالس مع بنات متعب و يسولف وهو مبسوط و اذا ما فهموا كلمه يناظرون لمنار تترجمها لهم.
ضحى بهمس لزين:يعني أيش العجوه؟
زين:وش عرفني؟
عبير:عجوة المدينه غير دائماً.
الجد عبدالله:عشان كذا وصى بها الرسول.
الكل:عليه الصلاة و السلام.
ضحى:خاله عبير.
عبير ناظرت لها:نعم.
ضحى:يعني أيش عجوه؟
عبير ابتسمت:العجوه من أنواع التمور.
بنات متعب:اييه.
سامر دق الباب:منار.
منار:تعال.
سامر مشى لهم:السلام عليكم.
الكل:و عليكم السلام.
سامر:أبويامن بيأخذ أبوي و سلمان و متعب بيرجعون البيت، و زيد اللي بيوصلك و أمه و أم يامن و ياسمين و هديل، و منار و بنات متعب معاي و يزيد و يامن و فيصل و هتان مع يزيد.
الجد عبدالله:فين نصلي؟
سامر:في المسجد بس بعد الصلاه بنطلع كلنا.
منار:تكفي السياره كلنا لا تنسى الخدامه و التوائم.
سامر يعد على يدينه ايه صح.
بسمه:خلهم معنا.
سامر:بس صعبه التوائم يكونون منفصلين عن أخواتهم.
الجد عبدالله:لا أنا بأمشي مع الرجال و الحريم خلهم ياخذون راحتهم، و مشى.
سامر يهمس:قلنا نفرقهم عشان نفتك شر ألسنتهم فما فيه فايده.
منار مسكت:سويتوا اللي عليكم حبيبي.
زين:عمو سامر فيه مشكله.
سامر:نحلها إن شاء الله.
زين:غزل و غنى عربياتهم تتحول لكراسي سيارات.
سامر زم على شفايفه.
منار:عادي نصفطها و نحطها معنا و يجلسون بحضنكم.
ضحى:ما فيه مخالفات على كذا.
سامر:معها حق مخالفه.
ياسمين:ايه فيه مخالفات.
ترف:يعني وحده منا تنسحب من سيارة عمو سامر.
بسمه تعد:احنا ٤ بالخدامه يعني اللي تنسحب تجي معنا و ينحل الموضوع.
ضحى:خلاص زين تروح معكم.
زين:لا ما بأروح أنا روحي أنتي.
ضحى بالفرنسي:(و ليه ما تبين تروحين؟)
زين ردت بالفرنسي:(لان هذاك الولد اللي بيوديهم).
ضحى:(قصدك اللي سكبتي عليه العصير)
زين:(ايه و لا أقدر أناظر فيه حتى لاني عرفت إنه يكره اللي يسوون فيه كذا).
ضحى:(و لا أنا أبغا أروح لاني ما أعرف القروب اللي بأروح معه)
زين رفعت أكتافها:(مش مشكلتي)
ضحى:(طيب نضحي بأحد من البنات).
الكل يناظرونهم باستفهام.
سامر صرخ:هيي نحن هنا.
زين و ضحى سكتوا.
سامر ناظر في ترف:وش يقولون؟
ترف ابتسمت و رفعت أكتافها:ما أدري هم الوحيدات اللي درسوا الفرنسي و الباقي انجلش.
زين:قلت لها ان احنا الكبار و كل وحده تركب بسياره.
منار:زين معها حق و كمان أبوكم يتطمن.
مدى رفعت يدها:عشان نحل الموضوع أنا و مها بنمشي مع هديل.
هديل بإبتسامه:حياكم.
مها:و خاله بسمه و خاله عبير معنا و بمقام ماما.
بسمه ابتسمت:حبيبي أنتي.
مدى:و أساساً احنا نبي مع هديل و ساندي خذوها معكم.
سامر:و أنتِ ياسمين موافقه؟
ياسمين:تم.
سامر وقف:دام انحلت المشكله فأنا استئذن.
منار:متى نمشي طيب؟
سامر من دون ما يناظر:بعد صلاة العصر.
__
بعد ما مشى الكل سيارة سامر اخذ منحنى آخر.
منار:وين رايح؟
سامر:نفسي في آيس كريم.
منار بعدم تصديق:من جدك.
سامر:و الله.
ياسمين:باقي تحب الكراميل؟
سامر:و مستحيل أغيره.
ياسمين:يا قدمك يا عمو.
منار:وش نكهتكم المفضله يا بنات؟
زين:ما فيه شي محدد.
ضحى:انا فانيليا ساده وترف كتن كاندي.
حور:أنا مثل ترف و مها و مدى يحبون التوت و الليمون.
زين التفتت:و أنتِ يا ياسمين؟
ياسمين:أنا و زيد نحب التشيز كيك.
منار:انا تشيز كيك مثل ياسمين و كتن كاندي.
سامر:و هديل؟
ياسمين بتفكير:ما أذكر بس هي مثل يامن يحبون نفس النكهه.
سامر بتفكير:دام كل واحد يحب نكهه وش ناخذ طيب؟
منار:خذ كل واحد النكهه اللي يحب.
سامر وصل عند محل الايسكريم و نزل.
زين تهف على نفسها:أفف أحس بحراره.
منار:نزلي قزازك.
زين نزلت للنص و كان فيه شباب واقفين عند السياره اللي واقفه جنبهم ما انتبهت لهم و صارت كل وحده مشغوله بالجوال.
فزوا على صوت تعرفه منار و ياسمين:نزل جوالك يا حيواان.
ياسمين بصدمه:يامن.
منار:وش السالفه؟
زين:They are fighting(يتضاربون).
ياسمين شافت العيال كلهم و شهقت:العيال نزلوا كلهم.
يامن ماسك جوال الولد:و الله إن تمسحها يا حقير.
يزيد بحده:استهدا بالله.
هتان:أترك جواله.
يامن:و الله ما أتركه الين يمسحها.
فيصل:يمسح وش هو؟
يامن:مصور أهلنا.
الولد:و الله ما صورتهم و رب الكعبه ما صورتهم.
يامن:لا تحلف شفتك أنا بعيوني.
سامر طلع من المحل و شافهم و مشى بسرعه للسياره و حط الاغراض:وش فيكم أنتوا؟
يزيد:يامن شاف واحد منهم مصور البنات.
الولد:و الله ما صورت أحد منهم و الله ياخي أنا عندي أخوات.
سامر:حلو اذا عندك أخوات صدق أعطني الجوال أشوف و كلكم أعطوني الجوالات أفتشها.
اللي معه:أبشر و الله، أبشر بسعدك.
سامر فتش في جوالاتهم كلهم ولا لقى شي:تفضلوا.
الولد:تأكدت الحين.
يامن:تأكدنا ايه لكن إن كانت فيه صور مادرينا عنها فالله يردها في نحوركم.
الاولاد كلهم يحلفون:و الله ما عندنا أي صور، و الله بذمتنا لو فيه شي.
سامر:خلاص توكلوا على الله.
الاولاد ركبوا سيارتهم و مشوا.
سامر ضرب كتف يامن:وش كل هالعصبيه هد أنت مو بزين لك العصبيه.
زين سمعت إسمها و طلت من الشباك:نعم عمو سامر.
سامر:و لا شي بس أرفعي الشباك عشان غنى الدنيا برد.
زين بحزن:الدنيا كتمه عشان كذا فتحتها.
يامن أخذ نفس و زفره بقوه.
فيصل لسامر:أخذت أنت آيسكريم و الا ندخل ناخذ.
سامر:أنت! ،عمك أنا مو أنت، ايه أخذت و حسبت حساب الجميع.
يزيد:أجل يلا مشينا.
سامر:تفضلوا.
يامن قرب لشباك زين:عاد انتبهي وش اللي يصير حولك؟
زين تناظر يمين و يسار باستغراب:وش سويت؟
__
بعد ما وصلت السيارتين لبيت الجدين، كانت ذي أول مره البنات يشوفون بيت جدهم.
زين تناظر بإعجاب:ماشاء الله.
ضحى:عاد تصدقين فكرت إنه بيت عادي وسط بيوت مثل بيت خالو سامر.
ترف:واضح ما أحد حولهم و الا عفسوه.
ياسمين اللي سمعت تعليقاتهم:و أحسن شي ما أحد حولهم و الا كان شدوا الرحال.
منار و سامر عرفوا قصدها و ضحكوا.
زين:ليه؟
منار:قصه طويله تعرفونها بعدين.
حور:اللي حلو إلى الحين الليك اللي تتوسط المكان.
ياسمين:لا يسمعك زيد تقولين عنها ليك أو بحيره لانه بيطلعك غلطانه.
زين:أجل وش يسمونها هنا؟
سامر وهو شايل غزل:إسمها العين أو الغدير بس أحس غدير أنسب شي لان المويه ماشاء الله تجري هنا ما توقف.
منار خزرته:غدير يا ابن عجلان.
ياسمين:ههههههه.
سامر تخصر:وش اسمه طيب؟
منار ببرود:عادي عين أو نهر.
ضحى تفكر انهم بيزعلون من بعض:خلاص كل واحد له إسم.
ترف تناظر:حتى الشجر هنا قاسي مع البرد.
حور:ما درستي الفصول الأربعه، اجل احنا اي فصل يا ذكيه.
منار:يلا دخلنا لجدكم.
سامر باس خد غزل و يلعبها.
زين:خلينا نجلس هنا.
منار:لا لا بتبردون تعالوا البيت و فيه قزاز في غرفتكم يطل عالعين، ناظرت لياسمين:نادي هديل و تعالوا.
ياسمين:طيب بس بأكلم أبوي و نجي.
منار و البنات دخلوا للبيت و شافهم الجد عبدالله و إبتسم:هلا هلا حياكم الله ببيت جدكم.
زين:السلام عليكم.
الجد و متعب:و عليكم السلام.
غنى شافت تؤامها و صرخت بفرح.
الكل ضحك عليهم.
منار تخرفنت:يا روحي أنا اللي أشتاقت لأختها.
سامر نزل غزل جنب أبوها و أخذ غنى و باسها:اخخخ يا ناس عالارنبه.
ضحى:الحين من أكثر شي تحبها؟
سامر جلس جنب متعب:كلهم أحبهم و لا تسألين هذا السؤال مره ثانيه.
متعب مبتسم له.
ضحى:دام كذا خذهم ينامون عندك الليله.
متعب رفع حاجبه:ضحى.
سامر:أجمل من ينام معي ،و يحضن غنى بحب.
زين باستغراب:وين التوائم الكبار؟
متعب:عند هديل.
حور بعتب:أشوف بناتك ماخذين راحتهم من أول ما وصلوا.
متعب:نزلي صوتك يا بابا و ليش زعلانه هديل في بيت جدك عبدالعزيز وقت ما تبون تروحون للبنات روحوا.
الجد عبدالله:خلها تصرخ و تزعج و ترفع صوتها لاخر شي، ناظر في البنات:ألعبوا اصرخوا اضحكوا سوو اللي تبونه يابوي البيت بيتكم، خلو الفرحه ترجع لهالبيت.
منار:متعب جهزت غرفكم فوق و البنات حاطتهم كلهم بأكبر غرفه، ما عليش عارفه إنكم مو متعودين تتشاركون الغرف بس الدور الثاني غرفتين نوم و تعرف الباقي مخزن و سطح و غرفة ملابس حولتها للبنات.
متعب:تسلمين يا أختي و كثر خيركم ما قصرتوا، أبوي قال أنتي و سامر اللي تكفلتوا بهالشي و إن شاء الله أقدر أرد لكم جزء من الجميل اللي سويتوه لي و لبناتي.
سامر:ولو يا أبو زين ما فيه شي من قدركم.
منار:و إن كنت تبي ترد المعروف فأنت رديته برجعتك لي و لأبوي و العائله كلها و هالشي يكفينا.
نبيله جت لهم بالقهوه:تفضل يا عمي.
الجد عبدالله:تسلمين يا نبيله.
متعب:نبيله شوفي ذولا بناتي.
نبيله شافتهم:ماشاء الله تبارك الله، و صافحت كل وحده منهم.
متعب:هذي نبيله تشتغل عند جدكم من عمري خمسة عشر سنه.
البنات:تشرفنا يا نبيله.
نبيله:الشرف و الله ليا، وتناظرهم:ما أحد يشبهك يا عمي.
الكل:هههههههه.
متعب بضحكه:اللي يشبهوني ماهم هنا عند عمي عبدالعزيز.
ضحى:يقولون أنا أشبه لك.
منار:لا وين أنتِ و حور نفس بعض بس تشبهون أهل أمكم.
ضحى:نشبه خاله حنان.
منار:ايه تاخذون منها كثير.
نبيله استأذنت و مشت للمطبخ.
الجد عبدالله:اطلعوا يا حبايب جدهم شوفوا لغرفتكم و إن شاء الله لأبني لكل وحده غرفه.
زين:الله لا يحرمنا منك يا جدي، وقفت:شنطنا وين؟
متعب:بجمس عمك سلطان راح أخلي العمال ينزلونها.
ترف:حتى الغيتار.
متعب هز راسه بايه.
منار بابتسامه:تعزفين على الغيتار؟
ترف:yes.
حور:و أنا عالبيانو.
منار:ماشاء الله عليكم، بأخذ منكم دروس.
زين همست بأذن منار و هزت راسها بايه و رجعت همست لزين.
زين وقفت و جرت للدرج:عن اذنكم.
ترف بحلقت عيونها وناظرت لاخواتها:بتطلع الغرفه.
حور وقفت و جرت وراها:و الله مو عدل يا زين.
ترف جرت وراهم:لحظه ذا غش، و صرخت:Girl's.
الكل:هههههههه.
متعب:ليه ما لحقتيهم يا ضحى.
ضحى:لاحقه عالمكان.
منار وقفت:اطلعي معي تشوفين الغرفه.
ضحى وقفت:يلا، أخذت أغراضها و طلعت مع منار.
طلوا من الباب و شافوا كل وحده حاجزه فراش.
ضحى:حجزتوا لكم.
زين:موقعي استراتيجي فيه شباك أطل منه عالعين و شباك اطل منه على بيت جدو عبدالعزيز.
ترف:و أنا هنا مقابله لزين.
ضحى تخصرت:وين أروح أنا التوائم يبون جنب بعض و ما أحب أنام عند الباب.
زين:تعالي جنب ترف.
منار همست لضحى اللي ناظرت لها بعدم تصديق:و الله.
منار هزت راسها بايه.
ضحى مشت للفراش اللي جنب ترف:أحسن ما عندكم فيش يشحن الجوال.
البنات:لااااا.
حور:عادي بنفصل الأبجوره.
منار:من حظكم إن الغرفه ذي جدكم حاط فيها أفياش كثير لانه كان يبنيها ديوانيه فقلت لا و بلاش و من يجيك؟ رجع بناها و خلاها مثل ما تشوفون.
زين بإعجاب:بس ذوقك يا عمه منار يهبل.
ضحى:أي و الله مررره رهيبه.
ترف:يعني الألوان مريحه نفسياً.
منار:مو ذوقي لحالي كمان سامر ساعدني و ما تصدقون لو قلت لكم في مده زمنيه قصيره جداً.
حور:شكراً، و أشرت لها بقلب.
منار:الغرفه اللي جنبكم فيها دولابين ملابس كبار و مرايه اي شي تبونه تغسلونه أو تكوونه أعطوا نبيله تسوي لكم.
ضحى:لو تشوفين أغراض كل واحده فينا بيغمى عليك.
زين:ايه و خصوصاً ضحى.
ضحى:دايماً ضحى مظلومه.
ترف:الا نقول الصدق.
حور:عمه منار في شي بأقوله بس ما تزعلين.
منار:قولي حبيبي عادي.
حور بغمزه:كأنك سمنانه؟
منار:صدق.
ترف:ايه غير عن لما نكلمك بالجوال يعني قلنا في البدايه حاطه فلتر أو اضاءه بس صدق سمنانه.
منار:صديقاتي بالمدرسه قالوا لي كمان سمنانه و عبير و بسمه.
زين:يمكن فيه شي في الاكل يسمنك.
منار:لا و الله بس بردنا يخليكم تاكلون كل شي، و كمان نفسيتي كانت ضاربه شوي عشان جدكم عبدالله و عبدالعزيز و لاحظت و الله نفسي في ملابسي كمان حتى الحلوه مخربطه عندي.
زين:على سيرتهم وش اللي صاير بينهم؟
منار:شي تافه لكن دام صرتوا هنا فإن شاء الله تحلونها معي.
زين:طيب وش صار عالايسكريم؟
منار مسكت راسها:ذاب الحين، و طلعت.
ترف صرخت:كلمي ياسمين و البنات و شوفي وينهم؟
حور:ايه كل ذا استئذان.
زين وقفت بسرعه و فتحت الشباك اللي من ناحية بيت الجد عبدالعزيز:واااو فريش، شافتهم كلهم جالسين بالحوش و أشرت لياسمين.
ياسمين انتبهت وهي تكلم منار بالجوال و رفعت يدها تلوح لزين.
الكل ناظر ناحية الشباك و شافوا زين و فجأه انضمت ترف و حور ويناظرون لورا العين و يأشرون و يتكلمون انجليزي.
ياسمين:أنا رايحه، و باست خد أبوها.
أبو يزيد:الله معك و مثل ما قلت لك أرجعي وقت ما تبين.
ياسمين صرخت:هديل يلا بأمشي أنا.
مدى و مها طلعوا من البيت و شافوا الكبار جالسين:مع السلامه.
الكل:الله معكم.
هديل طلعت:بابا بأروح معهم.
أبو يامن:الله معك.
هديل باست خد أبوها و طلعت معهم.
الجد عبدالعزيز:أقول لمتعب ماشاء الله على هالتربية و الظاهر انكم شفتوا بعيونكم.
سلطان:اي و الله شفنا.
الجد عبدالعزيز:و قبل ما يطيرون البنات كل واحد منكم يخطب لعياله انت يا سلطان ٣وأنت يا سلمان٢ خلاص الى متى بيجلسون عيالكم بلا عرس.
سلطان:و الله يا الغالي عجزنا في الكبير و ذي أمه عندك تشهد إني ما خليت وسيله الا و جربتها معه و كان منه الرفض.
سلمان:و أخوه عندي.
عبير:حتى هتان ياعم رافض الزواج و فيصل.
سلطان:كلهم الله يهديهم يقولون ما يتقدمون عن يزيد و يامن.
الجد عبدالعزيز:عسى يامن حاط عينه على وحده و ما تبونها.
سلطان:و الله ما أدري ما يفضفض لي بشي.
الجدعبدالعزيز ناظر لعبير:و أنتِ.
عبير:لا و الله ما قال لي شي و بغيت له وحده و قال ما يبي الحين بس.
بسمه:و يزيد نفس كلامه.
سلمان:يا أبوسلطان الجيل ذا غير عن جيلي و جيلك ما أحد فاهمهم الا رب العالمين.
الجد عبدالعزيز:أجل بأكلمهم أنا و أشوف وش يقولون؟
زيد سمع كل شي و جرى بسرعه يخبر العيال باللي قاله الجد كله.
يامن رمى كلينكس بإنفعال:خير خير وش يبون هم؟ ذي حياتنا و بكيفنا نعيشها مثل ما نبي أحنا.
هتان ببرود:ترا ما غصبوك و قالوا تزوج الحين.
فيصل و الجوال بيده:أدعوا الحين وقت استجابه و قولوا في الدعاء الله يجعل جدي ينسى الموضوع.
زيد:و الله ما ظنتي من نبرة كلامه انه بينسى.
فيصل:أبغا أهدي الوضع و أنت تزيده.
هتان ناظر ليزيد اللي يناظر لهم بهدوء:أخ يزيد.
يزيد:هلا.
هتان:ما تبي تقول شي.
يزيد هز راسه بلا.
يامن:وش قصتك أنت اليوم؟
يزيد:وش فيني؟
يامن:ساكت و بارد بالكلام و الاجابه و ما منك أي تعليق على اللي قاله أخوك.
زيد غمز له:تخرفن مع البنت.
هتان عقد حواجبه:أي بنت؟
فيصل لزيد:قصدك أم الكولا.
زيد:اسمها زين الزين.
يزيد ببرود:وش لها علاقه بالموضوع؟
زيد:ما أدري عنك.
يزيد:أقول لا يكثر بس.
يامن رفع حاجبه:ليه فيه شي بينكم؟
يزيد:لا وش اللي بيننا و توني قابلتها اليوم.
هتان:و ليه ما تسأل نفسك أنت بعد المهاوش مع الشباب اليوم.
يامن:لا ما فيه شي و اللي سويته اليوم لانه عيب و ما أرضاها عليهم.
زيد:بس واضح أن البنت عادي ما همها.
يامن:اذا تشوفه عادي لانها كانت عايشه بكندا فعندنا هنا عيب و ما يصير.
يزيد:هي أصلاً ما انتبهت ولا كانت قاصده إنها تنزل القزاز عشان يصورونها.
فيصل:و كيف عرفت؟
يزيد ببرود:وش رايك؟
هتان انتبه:ايه ياسمين كانت معهم.
يامن وقف و بحده:قصدها و الا لا قل لأختك تعلمها إن عندنا هالشي ما يصير بكره و الا بعده بتتزوج وش بيقولون عنها؟
يزيد بحده:و أنت وش دخلك؟ أبوها عايش و ماشيه برضاه، و بصراخ:أطلع منها يا أخي ،أخذ جواله و طلع من الصاله للحوش.
يامن بصراخ:الحين أنا وش قلت عشان يصرخ، تأفف و أخذ جواله و طلع.
الشباب يناظرون في بعض.
هتان:وش صار؟
فيصل استوعب و مسك راسه:يلعن شرهم اذا صرخوا على بعض عشان موضوع تافه.
زيد:على قولة جدتي الجوهره الله يرحمها(وقت إبليس).
هتان و فيصل:ههههههه.
__
(بيت الجد عبدالله)
البنات جلسوا بالغرفه الصغيره اللي تحت و منار دخلت لهم:اكتملتوا.
حور:باقي زين.
منار جلست:التوائم نايمين.
ياسمين تناظر في الكيس:عمو سامر كم اشترى نكهه.
منار:كل وحده و نكهتها المفضله و اللي يبقى أرسلوه للعيال.
ياسمين بصدمه:يمززح.
منار:لا ليه؟
ياسمين:كل ذا على حسابه لازم بالقطه.
منار بعدم إهتمام:لا يسمعك فيدفنك مكانك.
زين دخلت:بنات، وين بابا؟
حور:في المسجد.
زين:طيب الشنط، أنا شخص يبغا ياخذ شاور و يغير ملابسه.
ترف:اصبري مثل ما صبرنا.
منار:خلي اللبس و اجلسي.
زين تأففت و جلست و رفعت شعرها لفوق:وش عندك؟
منار:أنا يوم الأحد مو مداومه و بأطلب من أهاليكم تنزلون معي البيت و نصحى الصباح و نروح فندق عندهم فطور يهبل.
ضحى:على حسابك.
منار بابتسامه:على حسابي.
ياسمين رفعت يدها:مو موافقه.
منار اختفت إبتسامتها:ليه؟
ياسمين:أروح ايه بس فطوركم على حسابي أنا.
هديل:و أنا بعد، من جينا و أنتِ كل شي على حسابك و على حساب عمو سامر خلاص.
زين:احنا كمان بندفع.
ياسمين:لا و الله ما تدفعون انتوا معزومين و على حسابي و حساب هديل.
سامر ينادي:منار.
منار:هنا يا سامر.
سامر مشى و شافهم ملتمين:بدأتوا.
منار:أمرني.
سامر بأمر:هديل و ياسمين حطوا طرحكم على رووسكم.
ياسمين و هديل:عممموو.
ضحى:وش فيكم؟
سامر:العيال بيدخلون.
منار:وش جابهم؟
سامر:ابوي و عمي تضاربوا في المسجد.
منار:ليه كانوا وش زينهم؟
سامر:و الله قزاز سيارة عمي مكسور و أبوي يحلف ما سوا هالشي و كانوا بيتضاربون بس مسكنا كل واحد منهم، ناديت العيال بعد ما قلتي إنك بتجمعين البنات و تكلمينهم و ندور حل مره وحده.
بنات متعب:ووووه.
منار:خلاص نادهم و بأقوم أنا أجيب لي كمان، و وقفت.
سامر راح يفتح الباب و زين كشرت:مالت عليهم.
ضحى بهمس:وش فيك؟
زين:إذا جا ذا العله اللي صرخ عليي اليوم فأنا بأقوم من الجلسه.
ترف:خليه المريض ما عليكِ منه.
حور:عمو سامر موجود و ما راح يتكلم.
ضحى:و لا حتى تناظرين فيه.
زين تنفض ملابسها:يوووه ياربي أحس بكتمه من الحين.
البنات:هههههههه.
سامر دخل و معه العيال كلهم و سلموا و ردوا البنات السلام.
سامر جلس:ما قد خلصوا؟
ضحى:الحين بيجون.
زيد يلطف الجو:أكلتوا و تركتونا.
مدى:لا باقي كثير.
سامر وقف و أخذ نكهته و أعطى الشباب.
منار دخلت و جلست جنب سامر و دخلوا وراها ياسمين و هديل و جلسوا جنب بنات متعب.
منار:نبدأ الجلسه، أول شي أفهم بنات متعب السالفه كامله، و ناظرت فيهم:جدكم عبدالله و جدكم عبدالعزيز ورثوا من بعد موت أبوهم ورث كبير و من بينها هالأرض ذي، أعجبهم المكان عشان فيها طبيعه و خضار و العين اللي تشوفونها عكس جو الرياض طبعاً و اتفقوا اثنينهم يقتسمونها بالنص و جابوا مهندس يخطط الأرض خططها كلها و بقى الفرق البسيط نص و خبرهم بانه يقسم النص عالاثنين لكن رفضوا كلهم.
زين:و مين رفض أول؟
منار:ما أعرف؟ ،المهم حاول المهندس بانه يقسمها بينهم من هنا و هنا بس رفضوا اثنينهم و عندوا، من بعد هالمشكله خطط أبو سلطان لأرضه و خطط أبو متعب لأرضه و بنوا هالبيتين لكن النص ذا صار مثل اللقمه الناشبه، عمي بنى جدار عالنص كله و أبوي هده و رجع أبوي بنى جدار و هده و صارت ذا الحرب الين عيال عمي و أنا عملنا جدار بالنص و جبنا المتر و قسناه قدامهم و سكتوا عن هالموضوع بس الحرب أشتعلت أكثر بينهم و عيت لا تنطفي و كانت وصية أمي و خالتي اللي هي أم سامر بإنا نصلح الحال بين أبوي و عمي.
سامر كمل:و احنا سوينا اللي نقدر عليه و ما أفاد فيهم شي فجمعناكم هنا يمكن تكونون من بعد الله عون لنا و نحل هالأزمه كلها و يرجعون أخوان من جديد.
منار:و كلامنا ذا للشباب و البنات.
ترف:سؤال بس اذا سمحتوا.
سامر:تفضلي.
ترف:أحد منهم حاول يقتل الثاني.
منار مسكت قلبها:يمه.
ضحى دقتها:هي أنتِ خيالك واسع.
حور:ما عليك منها ترا ضحى صادقه.
ترف:و أنا وش قلت غير الصدق.
زيد:أذكر مره رموا بعض بالحجار.
زين عقدت حواجبها:و عسى ما كان فيه إصابات.
سامر:كل واحد فتح راس الثاني بس عدت على خير.
زين بحلقت عيونها بصدمه.
ضحى:ذي حرب مو سوء فهم.
ياسمين:و خاله منار وش تقول من اليوم.
زين:طيب ما شكيتوا إن فيه طرف ثالث بالموضوع.
سامر:قصدك مين؟
زين:واحد من العمال.
منار:مستحيل يا زين، العمال عشرة عُمر و هم يتمنون اليوم قبل بكره إن الكابوس ينتهي.
يزيد:أنا كمان قلت نفس الكلام لابوي بس مو العمال.
سامر:مين؟
يزيد:أصدقاء يمكن.
سامر:لا مستحيل كلهم الاثنين خسروا أصدقاءهم بسبب هالعداوه.
منار:حتى معارفنا ما عاد سألوا عنهم بسبب ما نرد عليهم الا بالله يصلح الحال.
مدى:متى ماتت أمك يا خالو سامر؟
سامر:ماتت بعد جدتك ساره بشهر من غبنتهم على رجالهم.
ضحى بحزن:لا تقول ما كانوا يشوفون بعض.
سامر هز راسه بايه:حتى التليفون يكلمون بعض بالخفا.
زين كشرت:الرجال سيئين.
الشباب رفعوا حواجبهم بصدمه.
منار:لا حبيبي مو كلهم.
زين:الا بابا طبعاً.
ياسمين:مع نفسك حتى بابتي أنا.
هديل:و أنا.
منار:و سامر كمان و الشباب الحلوين اللي هنا.
هتان:يا خاله منار يا المعززه.
منار ابتسمت:أقول الحق.
يامن بضحكه:ليه يا بنت ليه تقولين انهم سيئين مريتي بشي بحياتك.
زين ببرود:حتى و أنا بكندا ما أحتك فيهم و اسمي زين.
ضحى شكت بنبرته:كلنا ما نحتك في الرجال من و احنا صغار بابا معلمنا هالشي.
ترف:حتى مدرستنا اللي يدرسونا كلهم حريم.
منار تذكرت اللي صار اليوم و بهدوء:خلاص سامر هذا نقاشنا لليوم، سكتت و وقفت بسرعه و هرولت.
سامر صرخ:منار وش فيك؟
ترف تناظر:يمكن تذكرت شي لانها راحت المطبخ.
ياسمين:خلاص عمو تقدرون تروحون.
سامر ناظر للعيال:تقدرون تروحون.
فيصل:طرده ذي.
سامر:خلص الكلام.
زيد بتريقه:خلص الكلام من تمي و نسيت أصل الوجع و الاه و ليش حكيت.
سامر كشر:خربت أم الأغنيه.
الشباب وقفوا و طلعوا كلهم.
هديل همست:نرفزك يامن، أشرت على نفسها:حقك عليه بس هو غيور مره.
زين:لا عادي.
ياسمين:آيسكريمك ذاب.
منار جتهم و ابتسمت.
سامر:وش فيك؟
منار:ما أدري حسيت فجأه بحموضه في معدتي و غثيان.
هديل:تراك كثرتي اليوم في القهوه.
سامر بعتب:قهوه يا منار و الدكتور قال لك بعدي عنها قدر الامكان.
منار:وش أسوي ما أقاومها، الحين اخذ حبتين حبوب حموضه و تفك عني.
زين:أقول ما فيه هنا ستار بكس أبي قهوه.
سامر بضحكه:أنتي بقرى برا أبها يعني بعيد عنك مره.
ترف:ما فيه توصيل؟
سامر:التوصيل يكلف كثير.
حور:أووووف.
زين:طيب كيف نسوي الصباح متعودين نشربها عالريق.
سامر بضحكه:هنا انسي تشربينها عالريق الا اذا كانت قهوه عربيه، وقف:استئذن بأروح أشوف للشيبان ،و طلع.
البنات ضلوا يكملون سوالف و سهره الين ساعه متأخره و بعدها توجهوا للنوم.
__
صباح جديد
وبين ما الكل نايمين نوم عميق و كل واحد يحلم بمنام حلو و بمنام شين، فز كل اللي بالبيتين على صوت طلق ناري قوي و تكرر مرتين، ففي بيت الجد عبدالله متعب نط من سريره و توجه لغرفة البنات وفتح الباب و شاف البنات كلهم صاحين و مرتاعين:لا تخافون يا بابا سموا بالله.
زين:وش اللي صاير؟
متعب:ما أدري و الله بأنزل أشوف لجدكم و عمتكم تحت.
ترف بحلقت عيونها:لا يكون أبوك و عمك قتلوا بعض.
متعب:وقته هالكلام ياترف، لف متعب و في نفسه:ليه لا.
زين وقفت و فتحت الشباك و البنات تجمعوا عندها:وش تشوفين؟
زين بصوت كله نوم:ما أشوف و لا شي.
ضحى:هذا عمو سلطان و عمو سلمان كمان.
ترف:وين يجرون؟
حور:وش عرفنا؟
مدى و مها:الله يستر.
متعب نزل بسرعه و شاف نبيله:أبوي وينه؟
نبيله:صباح الخير يا عمي.
متعب:صباح النور، أبوي وين؟
نبيله:فوق السطح بيطلق عالقرود عشان الشجر.
متعب تنهد و جلس بتعب:جيبي لي كاس مويه لو سمحتِ.
نبيله:من عيوني ،و مشت للمطبخ بسرعه.
متعب:الله يهديك يابو متعب.
الجد عبدالله نزل من الدرج و إبتسم:صباح الخير.
متعب ابتسم له:صباح النور.
الجد عبدالله:صحيتكم؟
متعب:قصدك أفجعتنا.
الجد عبدالله:وش أسوي يا حبيبي زارعين لنا كم شجره و ما خلوها لنا اللي ما يتسمون و عمك طلق من الناحيه الثانيه.
نبيله جت بالمويه:تفضل يا عم.
متعب أخذها و شرب المويه كلها.
الجد عبدالله:عسى ما خافوا البنات.
متعب أعطى نبيله الكاس:شكراً، دخلت غرفهم و أغطيتهم طايره بالسما.
الجد عبدالله ضحك:يا جعله بعمري عنهم.
متعب يناظر للبندقيه:ممكن يبه تبعد اللي بيدك، و منار ما صحت على هالصوت؟
الجد عبدالله شاله بالدولاب و قفل بالمفتاح:منار مش موجوده، تعبت البارح على سامر و نزلوا المستشفى.
متعب عقد حواجبه:وش فيها؟
الجد عبدالله:لها ثلاثه شهور تشكي من معدتها و كله عشان القهوه و الدكتور يقول لها خليها و تعرف منار ما تصبر.
متعب:الله يشفيها، تذكر التوائم الصغار:عن اذنك بأروح أشوف البنات الصغار.
الجد عبدالله صرخ:و الكبار خلهم يرجعون ينامون.
متعب هز راسه بيأس:إن شاء الله.
__
بيت الجد عبدالعزيز
فزوا كلهم و طلعوا الشباب و الرجال بخوف.
سلطان:وش اللي صاير؟
يامن بنص عين:وش عرفنا؟
سلمان:أبوي و عمي.
يزيد يمسح على شعره.
زيد و كله نوم:لا يكونون قتلوا بعض.
سلطان و سلمان بحلقوا عيونهم في بعض و جروا ينزلون الدرج و يطلعون من البيت و شافوا الزبير:وين أبوي؟
الزبير:عند الشجر ورا، لا تخافوا ذا عشان القرود.
سلطان و سلمان مشوا و شافوا أبوهم و على كتفه البندقيه:يبه أنت بخير؟
الجد عبدالعزيز ابتسم:هلا بعيالي.
سلمان:حرام عليك فكرنا إن فيك شي.
الجد عبدالعزيز:ما فيني الا العافيه بس ذولا أعوان إبليس كانوا بيرجعون عالشجر فأطلقنا أنا و عمك من جهتين.
سلطان حط يده على قلبه:يا لله صباح خير.
الجد عبدالعزيز:أرجعوا ناموا يابوي ،و مشى من بينهم.
سلطان و سلمان ناظروا في بعض و دخلوا البيت.
__
بيت سامر
منار طلعت من دورات المياه و هي ماسكه على راسها.
سامر:منار خلينا نروح لدكتور ثاني.
منار:و البارح وين كنا؟ حتى التحاليل طلعت سليمه.
سامر:اسمعي مني خلينا نروح لدكتور شاطر يمدحونه مرره و يمدحون عيادته.
منار:تعبت يا سامر من الروحه و الجيه.
سامر:أخر مره أطلبك بس عشان نطمن عليك.
منار:تمام رغم إني عارفه إنها بتطلع جرثومة المعده في الاخير.
سامر باس جبينها:إن شاء الله خير، البسي عبايتك و أنا بأسبقك السياره.
منار:تمام.
__
(بيت الجد عبدالله)
زين من الدرج:عمه منار ما قد جت.
ضحى تناظر للمرايه:لا.
زين:وش تسوين؟
ضحى:أعالج حبه طلعت مادري من وين.
زين كشرت:لا تعالجين شي لو سمحتِ.
ضحى بحزن:من جينا و الحبوب ذي تطلع لي بكل مكان في وجهي.
ترف نزلت و بيدها الغيتار:وين غزل و غنى؟
زين التفتت لها:ما أعرف.
ضحى:بابا أخذهم.
ترف:عالمسجد؟
ضحى هزت راسها بايه.
زين:الحين ما أرتاحوا بالصلاه.
ترف:غريبه أخذهم معه.
نبيله طلعت:يا زين.
زين:نعم.
نبيله:العم متعب يقول الصغار أخذهم لبيت عمي عبدالعزيز و طلب مني أقولكم تروحو هناك ضروري.
زين:طيب شكراً نبيله.
نبيله:العفو.
ترف بهمس:تفهمين وش تقول؟
زين:شوي.
ضحى صرخت بقهر.
زين و ترف ضحكوا.
__
طلع الكل من المسجد و انتبهوا لسيارة سامر اللي وقفت قدامهم و نزل بفرح:السلام عليكم.
الكل:وعليكم السلام.
سامر حضن أبوه و عمه:هاتوا البشاره.
منار نزلت من السياره بمهل.
عبدالعزيز و عبدالله بنفس الهمس:عطيناك.
سامر:منار حامل.
الاخوان صرخوا و حضنوا سامر بفرح:مبروك حبيبي.
سامر بعد عنهم:الله يبارك فيكم.
الجد عبدالله و الجدعبدالعزيز حضنوا بعض:بنصير جدان مره ثانيه.
الكل ابتسم بفرح لما شافهم بهالشكل.
الشيبان استوعبوا و بعدوا عن بعض بهدوء و كل واحد كشر في وجه الثاني.
الجدعبدالله راح لبنته و حضنها:مبروك يا حبيبي مبروك.
منار بخجل:الله يبارك فيك.
الجدعبدالعزيز تقدم و باس جبينها:مبروك يا بنتي، صبرتِ و نلتِ.
سامر:مو هي بس أنا كمان.
الكل بارك لسامر و منار.
الجد عبدالعزيز:تفضلوا أقلطوا.
الجد عبدالله بضيق:أنا استئذن.
متعب مسك يده:أبو متعب تعال معنا جالسين بالحوش.
الجد عبدالله بحده:أنا مالي مكان ببيته.
الجدعبدالعزيز:تذكر إنك أنت من حلف عليه بالأول.
سلطان:استهدوا بالله يا جماعه.
الكل:لا اله الا الله.
متعب لمنار:ادخلي لبيت عمي و البنات بأرسل لهم يجون بعد شوي.
منار بحزن:و أبوي؟
متعب:راح أخليه يدخل معنا لو الحوش بس.
منار:تمام، و دخلت.
سلمان:كل ذا ما يصير يابوي و أنت يا عمي، كل واحد ببيت و ما يدخل عالثاني.
متعب:أنتوا اللي ربيتونا و كبرتونا و علمتونا الصح و الغلط.
سلطان:و هذا اللي بينكم ما يصير.
يامن بهمس:يا ليت يحلون الموضوع و نفتك.
هتان:الشيبان بنفسهم رووسهم يابسه.
متعب:تعال يبه و أنت يا عمي خلونا ندخل و نحل الموضوع من جذوره.
الجد عبدالله بحده:و ليه ما يجي عندي؟
الجد عبدالعزيز بحده:أنا الكبير.
متعب:كـلنــا واحـــد.
الشيبان سكتوا و ناظروا في بعض و تذكروا كلمتهم اللي كانت تنقال و تنعاد في جيلهم و جيل غيرهم(كـلنــا واحـــد).
الجد عبدالله بهدوء:صح.
الجد عبدالعزيز:تفضل.
الجد عبدالله:من بعدك.
الكل ناظر له.
الجد عبدالله:أجلس بالحوش لأن علي محلوف ما أدخل البيت.
سلطان ابتسم:تفضل يا عم تفضل.
زيد طلع الجوال و صور سنابة دخول الجد عبدالله.
الجدعبدالله دخل الحوش:بسم الله الرحمن الرحيم.
سلطان:تفضل في بيتك.
سلمان بهمس:الله يهدي النفوس.
متعب:يارب.
جلسوا كلهم بالحوش و الجد عبدالله همس:قول لحسن يكلم نبيله تجيب القهوه هنا.
متعب بإبتسامه:حاضر، رفع جواله و دق على حسن و كلمه.
سامر:الفرحه فرحتين اليوم الحمدلله.
سلطان:يبيلها شي راهي(قصده ذبيحه).
سامر بفرح:أبشر.
سلمان:أنا أشوف الين تنحل المشكله من جذورها أحسن.
يامن:و قريب إن شاء الله.
__
يـــتـــبـــع ______>