حب و حرب في حظر التجول

الجزء الاخير

الفصل الاخير
__
(بعد خمسه أيام)
زين:يعني ننزل الصباح.
منار:الصباح أحسن و يكون فاضي كمان.
ياسمين ماسكه راسها و تناظر في الجوال:أنا اللي رحت فيها.
ضحى:ليه؟
ياسمين تنهدت:أبوي و أمي يبون أنزل معهم السوق.
منار:خوفتيني فكرت فيه شي.
ياسمين تراسل يزيد:مو وقتك يزيد خلها لين نرجع الرياض.
يزيد:يجي العيد و أنا ما أهديتها شي نسيتِ حتى الملكه ما أعطيناها شي لا الشبكه و لا الساعه و لا هدايا و لا شي بس الدبل و المهر.
ياسمين:ما أحد يتزوج بالظروف ذي غيرك، تنهدت بصمت:طيب خصص لك يوم لحالك بس الصباح أبغا مع البنات تكفى.
يزيد:طيب بس اوعديني.
ياسمين:وعد مني أختك اخصص لك يوم.
يزيد:فديتك يا أجمل أخت.
ياسمين ابتسمت بخفه.
منار:وين وصلتِ يا ياسمين؟
ياسمين:مع يزيد.
زين فز قلبها:وش فيه؟ شي يوجعه؟
ياسمين بصدمه:اخترعت ذي ، لا لا بخير بس يستشيرني في شي.
منار ابتسمت:يا زينها اللي تخاف على خطيبها.
زين:من حقي أخاف لان صار له يومين يشتكي من صداع في راسه.
منار:من قلة النوم فيه أحد ينام مرتاح في هالبيت.
يامن دخل:سلام، عمه منار وين نبيله؟!
منار:طلعت حبيبي لبيتها، وش تبي فيها؟
يامن:عمي متعب كان يبيها، و كشر و مسك راسه بألم.
ياسمين:يامن وش فيك؟
يامن:شوية صداع خفيف.
ياسمين وقفت:لحظه أدور لك مسكن.
يامن:ياسو اذا لقيتِ حبتين أكون شاكر لك.
ياسمين:تاخذهم أنت.
يامن:لا يزيد.
زين:لا ،لا تجيبين ليزيد يومين ورا بعض ماخذ مسكن و كثرته ماهو بزين.
يزيد دخل بهدوء:سلام.
الكل:وعليكم السلام.
يزيد دق كتف يامن:وين رحت أنت؟
يامن بألم:أدور مسكن ياخي راسي بينفجر ،و يمسك راسه بقوه.
يزيد مسك يده:طيب خذ المسكن و نام و لا عاد تصحى الا للصلاه.
يامن بحزن:يا ليت.
زين وقفت:افتح لك الغرفه ذي ماحد ينام فيها.
منار:و أنتوا الله يهديكم ناموا بدال السهر.
يامن و يزيد سكتوا.
(ما أحد يعرف ان العيال و الرجال متفقين بالمراقبه و على مناوبتين من بعد ما شافوا الاثيوبي يجول بين البيوت و بالايام اللي راحت كان ظله يطلع بالكاميرات و زاد خوف الرجال على الحريم و خبروا الشرطه بالموضوع، و اتفقوا معهم إن فيه دوريه بتتواجد في المكان مرتين كل يوم).
يامن تنهد و دخل الغرفه و انسدح عالسرير باهمال.
منار وقفت و طلعت الديوانيه بعد ما سألت عن مكان سامر.
ياسمين جت و بيدها مسكن:وين يامن؟
يزيد:دخل الغرفه ادخلي عنده.
ياسمين بخوف:تــ تمام.
زين وقفت و مسكت يد يزيد و سحبته لفوق:تعال ابيك.
يزيد يمثل الزعل:توك الحين.
زين ابتسمت:اشتقت لك.
يزيد:وين ساحبتني؟
زين:نطلع السطوح، ابي أكون لوحدنا.
يزيد ابتسم:فيه أحد؟
زين:لا كلهم تحت، فتحت باب السطح و فتحت اللمبات الصفراء الصغيره و جلست و حطت وساده صغيره في حضنها:حط راسك هنا و مدد جسمك.
يزيد مدد جسمه و حط راسه بحضنها بهدوء.
زين بأمر:غمض عيونك، و من دون نقاش قفل عيونه مبتسم، قربت منه و باست جبينه بهدوء ثلاث مرات و صارت تمسح على راسه بهدوء و تعمل له مساج خفيف.
زين تنهدت بصمت و بهدوء:أعمل لك مساج لراسك لاني خفت عليك اليومين اللي راحت صرت ترهق نفسك بزياده.
يزيد بابتسامه:تدرين إني أحبك.
زين ابتسمت و مستمره:أعرف بس لا تغير الموضوع صحتك أهم شي بالدنيا.
يزيد مسك يدها و باسها:الله يخليك لي.
زين بابتسامه:و يخليك لي يارب.
يزيد فتح عيونه و رفع يده لوجهها و صار يمسح على خدها و ينزل لذقنها وعلى رقبتها:زيـن.
زين بابتسامه:عيونـها.
يزيد:أنتِ مبسوطه؟
زين بإستغراب:وش مناسبة هالسؤال؟
يزيد:جاوبي بليز.
زين بهمس:أكيد مبسوطه و انبسطت اكثر لما صرت لك و حلالك و الله لا يذوقني فراقك و فقدك.
يزيد قام من على حضنها و واجهها و ابتسم.
زين بابتسامه:وش فيك ترا الى الحين ما خلصت المساج.
يزيد قرب منها أكثر و حضنها و بهمس:و الله لا يذوقني فراقك يا روحي أنتِ صرتِ الروح يا زين، وشدد عالكلمه:الـروح.
زين رفعت يدها و حضنته:يا روح زين، تذكرت:طيب ارجع لحالك الاول عشان أخلص.
يزيد شدها له:لا خلاص ابي أكون كذا بقربك و بس مابي شي يبعدني عنك.
زين ضحكت بخفه:اوكيه.
__
(الدور السفلي)
عند ياسمين دخلت وبيدها الحبوب و همست:يامن.
يامن عدل نفسه و جلس:هلا.
ياسمين بابتسامه ناولته الحبوب:تفضل.
يامن:شكراً، اخذها و شربها.
ياسمين عدلت حجابها و جلست على كرسي قريب منه:يامن إلى متى بتضلون كذا؟ و الشرطه ليه ما تصرفت إلى الحين.
يامن نزل الكوب:اول شي تسلم يدك و ثاني شي الى الحين ما وضح إنه القاتل.
ياسمين:طيب يزيد قال انه هو لما شافه و تأكد كل ليله الحركه اللي حول المسجد.
يامن من دون شعور:حبيبي نزلي صوتك لا أحد يسمعنا بالغلط.
ياسمين:أنا آسفه، و بتفكير:يامن الوضع صار يخوف أنا بس لو أعرف وش يبي باقي من هنا، أنتوا ما سألتوا أنفسكم وش باقي يرجع له؟
يامن:حاجه وحده، باقي يخلص على يزيد و زين.
ياسمين شهقت:أعوذ بالله.
يامن رفع أكتافه:هذا الشي الوحيد اللي باقي.
ياسمين مسكت قلبها:لا مو كذا عاد ،سكتوا فتره و هم يناظرون لبعض بس نظرات تفكير.
ياسمين:طيب يمكن يا يامن طاح منه شي في بيت جدي و يبي يرجع ياخذه او نفسها الاداه اللي قالت عنها زين او مخبي شي و بياخذه فكروا أنتوا.
يامن بحلق عيونه:يمكن ليه لا.
ياسمين بحزن:كنت بأقول لكم هالسببين بس خفت أحد يسمع.
يامن تنهد:أنا بأخبر عمي متعب و إن شاء الله خير.
ياسمين وقفت:تبي شي يامن؟
يامن انسدح و بابتسامه:تسلمين يا قلبي بس قفلي الباب وراك ولا تصحوني للسحور.
ياسمين:تمام، طلعت و هي تحس بنار في وجهها من الكلمه هفت على نفسها و طلعت الديوانيه و انتبهت لضحى واقفه عند الباب و متردده تدخل:أنتِ باقي هنا.
ضحى ابتسمت:كنت امشي في الحوش و كنت بأدخل.
ياسمين:ادخلي معي طيب.
ضحى من صارت السالفه مع هتان وهي ما تناظر في وجهه و لا تخانقه و لا حتى تكلمه او تبدي اي رأي في أي موضوع و الجلوس صار وقت الوجبه.
ضحى دخلت بهدوء مع ياسمين و انتبهت له انه على جواله و نزلت عيونها و جلست مع البنات بس المشكله كانت دقات قلبها اللي كل مره تزيد و كأنها تنسمع.
بسمه ناظرت في الكل وحست المجلس ناقص و باستغراب:وين يامن و يزيد؟
منار:يامن مصدع و بينام و يزيد أكيد عنده أو مع زين.
فيصل همس للشباب:هذا اللي اتفقنا  عليه عشان هدايا العيد.
هتان بهمس:عادي وين بيروحون يعني اخرتهم بينامون هنا، انتبه لدخولها من ريحة عطرها اللي ما نساها و حافظها  لكن ما قدر يرفع راسه لانه يحس بشي ملخبط جواته، انتبه لتصرفاتها معه ما احتكت فيه بعد اللي صار حتى الجرح كانت توصي زيد هو اللي يغير عليه بما ان عنده شهادة إسعافات اوليه، تمنى بهاللحظه لو ترجع تتكلم معه مو تسكت او تهمس او تصد.
متعب ابتسم للمسج اللي جايه و ناظر في عمه:أبشرك يا عم سمينا العيال خلاص.
الجد عبدالعزيز:ماشاء الله ربي يعقل عليك و يحفظهم لك.
متعب:آمين.
ترف بابتسامه:خلاص نقول لك يا أبو.....
متعب قاطعها:أنا أبو زين الى عزوز.
زيد:وش سميتهم يا عمي؟
متعب:عبدالله و عبدالعزيز.
عبدالعزيز بصدمه:تقولها صادق.
متعب بابتسامه:أي و الله.
عبدالعزيز بزعل:ليه تسمي فيني و عيالي مانعهم من هالشي اختار اسم غيره من هالاسامي اللي الحين.
متعب:أنت أبوي مو عمي و مو خساره فيك هالاسم و ابوي كمان، يشهد الله يا عم اني ما راح انسى وقفتك معي و مع بناتي لا أنت و لا عيالك طول ما أنا عايش بهالدنيا و لا حتى اصحابي المقربين، و لولا الله ثم أنتم كان أنا و بناتي ما يندرا عن حالنا لكن الحمدلله اللي عنده أهل مثلكم.
بناته ساكتين و مبتسمين بحزن لابوهم، تذكروا تعبه اللي تعبه كل هالسنين و راح بغمضة عين تذكروا همه اللي كان بوجهه بسبب ان بناته ما عاد يعيشون بنفس العيشه و الرفاهيه اللي مثل قبل بس لا بسبب العائله اللي قلبها و يدها مع بعض متكاتفه اللي قلوبهم على بعض و يدهم بيد بعض في السراء و الضراء ما حسوا بهالشي ابداً ورغم انهم خافوا ان الحرب اللي بين الجدين تزيد اكثر بس بسبب خططهم اللي بين بعض الجدين رجعوا يتقربون لبعض أكثر  و مصيبتهم الكبيره اللي صارت عرف الجد عبدالعزيز ان الدنيا ما تستاهل ان الاخ يعادي أخوه بسبب شي تافه.
سلطان تذكر:خبرت البنات بالخبر الحلو.
متعب ابتسم:لا و الله كل ما اقول أجمعهم تنقص وحده، البارحه ضحى و الليله زين.
ضحى اللي اخيراً تكلمت:خبر ايش يا بابا؟
ترف:اذا مُفرح فياليت و الله تقول.
حور:ايــه لاننا محتاجين صراحه الاخبار الحلوه.
متعب:انسوا أقول لكم و زين مو موجوده.
مدى بطفش:بابا زين ما راح تفضا لنا و هي مع يزيد.
مها:وقتها صار ليزيد و بس و ما عليك منها قول و تعرف بعدين.
"افــا بـس"
زين دخلت مع يزيد و ماسكين يدين بعض، و سمعوا كل اللي قالوا التوائم و التفت لهم:أنتوا مصيبة.
مدى و مها:لـيـه؟
يزيد جلس مع زين:مين قال ان وقت زين كله معي أنا ما أشوفها و هي معي بنفس البيت.
ياسمين تذكرت سالفتها مع البنات:أنا متوقعه من مدى الكذب بس ذي لا، و تأشر على مها.
حور:ابشرك نسخ لصق.
زين بزعل:و بعدين أنا أختكم ماسرع نسيتوني.
ضحى بالفرنسي:ممكن تقولين لبابا يخلص عالموضوع لان فيه واحد حرقني بنظراته.
زين ابتسمت و ردت بالفرنسي:خليه يشبع نظراته صار لك كم يوم ما تجلسين بنفس المكان.
ضحى تنهدت و تكلمت بالفرنسي:ترا حدي متوتره فاخلصي عليه.
هتان نظراته مركزه على ضحى اللي كل مره تسلب عقله بلوك، في البدايه كان يشوفها أنانيه و تحب نفسها و كل يوم لبس يختلف عن الثاني و لا تكلم أحد و فوق كذا تحب ترادد و لسانها طويل بس من بعد ما سكنوا معهم وضح له شخصيتها الحقيقيه.
زيد بفضول:منايا أعرف وش تقولون؟
زين تصرف:بابا وش الموضوع؟
متعب:جدكم عبدالله باع بيته اللي في الرياض و كم أرض يملكها هناك و اشترى بيت جديد و قريب من عمكم سلطان و عمكم سلمان و بعد الحظر بننقل معهم للرياض.
هديل بفرح:الله و نااااسه.
مدى و مها ضربوا يدينهم ببعض و البنات ابتسموا له، و ياسمين صرخت:الحمدلله الحين أحب أبلغ أمي و أبوي بنتكم ما عاد بتجلس في البيت اللي يبيني أنا عند عمو متعب.
هديل:و أنا كمان يا بابا.
سلمان:الا بيهجون مساااكين.
سلطان بضحكه:خلوهم يشبعون ببيتهم أول.
ترف:الصراحه اني اتمنى كلكم تبيعون بيوتكم و نعيش كلنا في بيت واحد.
الكل صار يقول كلمه:الله يا ليته، الله يا زينها من لمه، ياليييت، يا زين الحظر اللي خلانا نعرف قيمة الاهل.
متعب:الله يديم المحبه و لا يفرقنا عن بعض.
الكل:آمين.
ضحى وقفت:استئذن، و طلعت.
هتان يبي يعرف وش اللي فيها و ناظر في امه:يمه باقي فيه عصير؟
عبير:ايه حبيبي في الثلاجه.
هتان وقف بسرعه و طلع للحوش و شافها مو فيه و دخل الباب و شاف الصاله فاضيه، سمع صوت في المطبخ و شك انها هي و طل براسه شافها لافه بظهرها و تسوي شي بيدها، دخل بهدوء و فتح الثلاجه و طلع العصير و انتبه لصدمتها يوم شافته و ابتسم لها بخفه.
ضحى بعدت عينها و مشت عنه تشغل نفسها باي شي.
هتان شاف صحن فيه مكرونه بشاميل:سخني لي معك ممكن؟
ضحى نقلت نظرها بين الصحن و بينه و أشرت:ما فيه غير هالقطعه اذا تبي خذها انت و انا باخذ لي شوربه و سمبوسه.
هتان:لا و الله بالعافيه عليك، خاطري في عصير و بس، سحب كاس من الدولاب و راح للطاوله و سكب له نص و رجع العصير بالثلاجه و جلس.
ضحى من لما شافته في المطبخ معها خافت و توترت و تحاول ما تبين له و انهبلت زود يوم شافته جالس عالطاوله و يشرب ببرود و تناظر حول المطبخ وين بتجلس؟
بلعت ريقها و مشت للصحن و لفت بظهرها للدولاب و تمسكت بيدينها و رفعت نفسها و جلست بهدوء و اخذت الصحن و حطته بحضنها و تاكل بصمت.
هتان انهبل على حركتها و يقول في نفسه هو جاي يسأل عنها مو تحقره و تطنشه و بهدوء:ضحى فيه شي مضايقك؟
ضحى ناظرت له و هي تاكل و هزت راسها بلا.
هتان وقف:أجل ليه الأيام اللي راحت ما كنت أشوفك مع البنات في الحوش، مشى لها بهدوء:او تغيرين على الجرح اللي براسي و زيد هو اللي يغير عليه ليه كل ما أكلمك تردين بصمت و تطنشين.
ضحى بلعت الاكل بسرعه و هي تشوفه يمشي لها، خافت توترت و نزلت الصحن من حضنها و حطت يدها على فمها لما قرب لها و بسرعه:كنت أسابق بختم القران لاني متأخره مررره.
هتان ابتسم داخله لما شاف حركتها و سند بيدينه يحجزها:و انا راح أصدق هالكلام.
ضحى برفعة حاجب:عفواً.
هتان قرب منها أكثر و ضحى رجعت بظهرها شوي و شافت ابتسامته اللي ارتسمت على وجهه و بهمس:صدق هالكلام و الا امورك ملخبطه بعد، و قرب لاذنها و همس:البوسه اللي للحين حلاتها بشفايفي.
ضحى ولع وجهها من جرأته و بحلقت عيونها و ناظرت فيه و بنفس الهمس:انهبلت أنت.
هتان بعد عنها و ابتسم:يمكن.
ضحى بلعت ريقها بخوف:ممكن تبعد عني لاحد يشوفنا بهالشكل لو سمحت.
هتان:لا تخافين، و رجع نفسه لورا:شعرك يهبل اليوم ممكن تخلينه كذا على طول.
ضحى ساكته و مستغربه صراحته ذي ما تدري وش اللي غيره؟ أما هتان غمز لها و طلع.
ضحى حست ان قلبها بيوقف من كثر ما دق و كشرت:أعوذ بالله منك، اسكت يالمهبول.
تنهدت من قلب و أخذت الصحن و رجعت تاكل.
__
(أول أيام العيد )
الرجال صلوا العيد بحوش البيت و مع الحرم المكي و الحريم صلوا وراهم و بعد الصلاه وقفوا الرجال يعيدون الجد و دموعه تنزل و يمسحها و كل هالدموع بسبب أخوه اللي نايم بالمشفى.
متعب يمسح دموع عمه:دموعك غاليه ياعم الله يخليك لنا و طلبتك اليوم مافيه دموع اليوم عيد.
عبدالعزيز هز راسه بايه.
سلطان:العيد الاكبر ان شاء الله صحية عمي.
الكل عيدوا على بعض و باقي البنات يعيدون عليهم و طلبوا منهم يدخلون مجلس الرجال يوزعون العيديات اللي كانت من كل عائله.
منار دخلت و وراها البنات سلموا عالجد وعيدوا عليه و بدأوا يسلمون عالباقي و يعيدون عليهم.
الجد عبدالعزيز أشر لسلطان اللي أعطاه الظرف الكبير و طلع منها ظروف:كل عام و أنتم بخير، تفضل يا متعب ذي عيديه مني.
متعب ابتسم:كبرنا يا عمي عالعيديات.
الجد عبدالعزيز:اول مره تعيد معنا بعد عمر طويل، ناول سلطان و سلمان و سامر و بعدها عبير و بسمه و منار كانت عيديتهم فلوس و لكم تتخيلون الرقم و لا تقولون اقل من ٥٠٠ ريال.
الجد عبدالعزيز بدأ يعطي الاحفاد العيديات و رمى الظرف:ذي عيديتي و عيدية جدكم عبدالله و أنتهت.
الكل صار يرد:الله يعطيك العافيه، ربي يخليكم لنا.
زين همست لياسمين:نقوم نصب قهوه.
ياسمين تعدل حجابها:يلا.
وقفوا ثنتينهم و متجهين لطاولة القهوه و الحلا و زين اخذت الدلة و بدأت بالجد الين وصلت ليزيد اللي ابتسم لها بحب و همست:وش فيك؟
يزيد همس:أجمل عيد بالسنه لانك موجوده.
زين بخجل:شكراً.
ياسمين تعبت من شيل الصحن:يزيد بلا غزل بسرعه الصحن ثقيل.
كل اللي في المجلس ضحك.
عبدالعزيز:خليه و أنا جدك يتغزل في زوجته.
ياسمين:مو على حسابي مع الصحن الثقيل ماشاء الله.
يامن أخذ فنجان القهوه من زين:امشي بسرعه.
زين مشت و سكبت لهتان.
يامن وقف و أخذ الصحن من يد ياسمين:هاتي عنك.
ياسمين:لا عادي بدأ يخف.
يامن سحبه:هاتي ، و همس:كل شي الا تعبك.
ياسمين بخجل:تسلم.
يامن:عدلي حجابك لا يطيح.
ياسمين ابتسمت بخجل و عدلت حجابها.
يزيد وقف و أخذ الدلة من زين:خلاص ارتاحوا أنتِ و ياسمين.
زين:طيب انتبه لا تحرق نفسك.
زين بهمس:تامرين.
زيد:يابو الشباب خل التغزل و صب لي قهوه انتظر من اليوم يوصل الدور.
يزيد:أبشر يابو يزيد.
زيد:فديتك و الله بس ابي خلفتي بنات.
يزيد:الله يعطيك، ناوله:سَمّ.
هتان يخطف نظره لضحى و يناظر لهم:هذا ثاني غلط يا يزيد انتبه.
يزيد:وش عليه منكم؟
فيصل تنهد:الله يرزقنا.
زيد رفع يده:آمين.
عبدالعزيز بضحكه:سبحانه اللي يغير الحال الى حال ثاني.
هتان ابتسم:اي و الله.
عبدالعزيز:بس يامن هو اللي بيسبقكم.
فيصل:عز الله أعرسنا.
ضحى عقدت حواجبها:لذا الدرجه مشفوحين عالعرس.
الكل ضحكوا من كلمتها.
متعب:يا بابا ذي سنة الحياه.
ضحى:مو بهالشكل عاد و بعدين دايم الرجال ____، سكتت نست انها عند العائله و كان بيزل لسانها بكلام عيب انها تقوله.
هتان حب يناكفها:وش فيهم الرجال، مصيرك تتزوجين و تروحين لبيت زوجك.
ضحى رفعت حواجبها:خير.
عبدالعزيز:هتان و ضحى لا تبدأون و الا تروا صدق أزوجكم لبعض.
هتان بجديه:ما عندي مانع اذا كان هذا اللي تبيه.
الكل انصدم من كلمته و مو مصدقين.
عبدالعزيز ابتسم يفكر انه يكذب:و أنتِ يا ضحى؟
ضحى تناظر هتان بصدمه مو مصدقه اللي قاله.
ترف دقتها بخفه:جاوبي جدي.
ضحى ناظرت له:لا يا جدي مو مفكره ابداً.
عبدالعزيز ناظر ليامن:و أنت يامن خلاص تبي تخطب.
يامن يقلب عيونه:من العايدين يا جدي.
الجد عبدالعزيز:من الفايزين و جاوب على سؤالي.
يامن ناظر لياسمين اللي تسولف مع زين بهمس و جاوب:ان شاء الله قريب.
فيصل:الحمدلله ضمنا عمرنا.
الكل بلا زين و ياسمين:هههههههههه.
يامن يناظر لياسمين مبتسم.
سلطان و عبير انتبهوا لوين يناظر و مبتسم و شافوا ياسمين، انبسطوا لما عرفوا انه يبيها و هم بخاطرهم من زمان ان ياسمين ليامن.
زين وقفت و طلعت و شوي الا رجعت:يلا جدي الفطور و عمامي الشباب و الحلوين.
زيد ركض للباب:قبل قبل، أخذ باقتين ورد و اهداها لامه و خالته عبير و شكروه.
زيد:ذي منا يا الشباب و عمو سامر و الله يكتب أجركم على كل شي سويتوه لنا بشهر رمضان و غير شهر رمضان.
الرجال:آمين.
ياسمين بحزن:طيب أنا ما تعطوني، كل شهر رمضان بالمطبخ.
ضحى:و أنا بعد.
زين ضحكت عليهم.
زيد:آسف أمهاتنا فقط و خاله منار كمان فيه لها باقه بس عمو سامر رفض يأجلها للحين و أعطاها أمس.
زين:طيب ممكن نلحق الفطور قبل لا يبرد.
طلعوا كلهم للصاله و انصدموا من جمال المنظر و كيف زين مغيره ملامح الصاله كلها.
عبير:زين لو رجعنا الرياض و رجعت المدارس ابيك أنتِ اللي تمسكين مناسبات التوجيه.
بسمه:لها ذوق بسم الله عليها.
يزيد:خاله عبير ما فيه أمل بأقفل عليها.
عبير بضحكه:من الحين.
متعب اللي يعرف ابداع زين بهالاشياء:هذي زين و هذي حركاتها.
زين بابتسامه:بالعافيه عليكم.