روايه : أمل

حلقه الاولى ( امل )

امل : كان الدم في كل مكان وجسمي كله ينزف مش قادره نتحرك بكل وعيني اليمين مش قادره نشوف بها كويس بردانه وخايفه من الظلام انا وين ......

_______\\__\\_______

قبل تلاته شهور  من الحادثه

امل : بوي نبي نحكي معاك في موضوع
الاب فوزي : ان شاءالله خير
امل : احم بوي الحق نبي نكمل قرايتي
سامي : شني قرايتك تحلمي
امل : اسكت انت اني نكمل في بوي
فوزي عدل جلسته وقال : اني ما عنديش بنات يقرو ولا يخدمو سادك هبال
امل : بوي اني عندي طموح واهداف خاطري نكون دكتوره
سامي : دكتوره ؟ أنتي بتجيبيلنا العار يابوي هادي طالع من لعبلها في راسها قال دكتوره قال
امل : علاش به اعطيني سبب واحد يخليني بدون قرايه ولا مستقبل
فوزي : لانك بنت البنت تقعد في حوش بوها لين يجي راجلها وياخذها
سامي : يا فرخه اسمعي كلام بوي ونوضي ديريلي حاجه ناكلها
ناضت امل ومشت للمطبخ لحقتها اختها
ايه : يا مهبوله شن جاك توا وقت قريه ؟
امل : وان شاء الله امتى وقتها القراية في نظرك !!
ايه : امل بالله فكينا من طموح انتي تعرفي حياتنا كويس
امل : ايه هدا علاش نبي نغير حياتنا عاجبك الوضع انتي مرتاحه !!
ايه : شن عجبني لا قرايه لا شهاده لا شي قول خدامه
امل : هدا علاش اني نبي نغير الروتين نبي نكون انسانه مهمه وطموحه نبي ناس تتكلم علي ثقفتنا وامي تفرح بينا
ايه : امل بالله فكينا سامي لو يسمعنا بيقتلنا
امل : علاش قلت شي عيب اني ترا فكيني منكم
_________\\______\______

امل انسانه طيبه وذكيه وجميله طولها 163 جسمها زي ساعه الرمليه شعرها لي نص ظهرها لونه عسلي ووجها بيضاوي عيونها متوسطه الحجم وخشمها واقف وشوربها الكرزيه الحمره علي شكل قلب مقلوب انسانه جميله جدا عمرها 23 سنه .....

الاب فوزي
الام خيريه
الاخت ايه والاخ سامي
طبعا اهل امل عندهم قوانين غريبه لدرجه معقدين الاخ حارم خواته من كل شي حتي القريه خدو شهاده الثانويه وقال سادهم انسان مستفز والاب  عاجبه الجو وتسلط ولده علي خواته اما الام لا حول لها ولا قوه مسكينه ......

______\\\\\______\\\\______\______

شهد : نبي قفطان جديد عرس نهى بعد اسبوعين معاش فيه وقت بكل ونبي نقص حتي شعري
نور : البسي قفطانك الاسود قاعد جديد
شهد : مصحك فاطمه بنت عمي عندها منه
نور : شهد مبردك البسيه ح يطلع عليك يجنن حرام جديد
شهد : خوديه انتي مالا اني نبي جديد
نور : لالا صحيتي  راجلي قالي بنطلعك غدوا
شهد : سعدودك متجوزه
نور : شدي روحك فالعرس مراتٍ تصدف فوحده بتاخد لولدها هههههه
شهد : واااك حماااس هههه اسمعي خلي نكلم وليد يطلعنا نشرو الحجات ونكملو بسرعه
نور : هي خلي نكلم راجلي ونستاذن منه...

وليد كان يتدرب 🏋🏻في صاله رياضه في القبو تحب البيت كان منسجم في الموسيقى ويتدرب لين سمع صوت شهد جايه تجري وصوتها عاليه ازعجه

شهد : وليد وليد وخييي حبيبي
وليد  صكر الموسيقى : ايوا ؟
شهد : وليد حبيبي وخييي الغالي تقاش نحبك
وليد : شن تبي ؟؟؟ بسرعه
شهد : احم زي ما تعرف عرس نهى قريب نبي قفطان جديد
وليد : تبي نخطيلك قفطان ولا شني ؟ههههه
شهد : مبردك قصدك هههه دمك خفيف شن رايك اطلعني اني ونور اليوم نبي نكمل بسرعه بالله عليك
وليد : شوفي مصعب اني مش فاضي
شهد : مصعب طالع من امبكري
وليد : تمام نص ساعه ونطلعك خلي ندوش الاول لو فاتت نص ساعه دبري روحك مش مطلعك
شهد : وااي فديتك سلم خوي الغالي من عيوني نص ساعه نص ساعه هي

شهد مشت تجري فرحانه تلبس هيا ونور

وليد حتي هوا ليه نصيب كبير من الروايه ودوره جميل
موصفات وليد طويل هلبا وعريض رياضي فديته بشرته سمراء انسان عقلاني وهادئ اغلب الاوقات لكن ما يحبش الغلط يتعصب ويتغير وليد الكبير في خوته وقد المسؤليه و معنداش الريح وين ادور لكن  ما تمنعاش شخصيه الصعبه لي يكون كوميدي ولطيف مع ناس لقريبه عليه عمره 29 سنه

_____\\\____\\\____

كاتبه : ملاك الحراري
حبيت تكون الحلقه الاولى قصيره لسبب معين وحبيت نوضع حياه امل الصعبه ومحرومه من ابسط حقوقها وهيا التعليم  وشفنا اسلوب سامي معها
وخوف اختها

وشفنا وليد انسان في حاله رياضي وحياته شبه روتينيه ..

استنوني لي الحلقات الجايه ح نركز علي امل اكتر شي نحب نوع القصص لمركزه علي بطل معين لانه قصتي حقيقيه نبي نعمق في امل هلبا ونشوفو كيف حياتها الصعبه .....

___\\\\\_____|\\\\

حسابي علي الانستاغرام مرحبتين بيكم &mks21.0