بعد اسبوع ....
خيريه : نوضو بسرعه وقت ع الجمعه هيا انتي وياها
امل : باهي يا امي علاش تعيطي شويه بس
خيريه : اي هيا نوضي انتي وياها وقت بسرعه يا خامرات
ايه : وراسكم خلوني نرقد كيف راقده
خيريه : هذا لي فالحه فيه انتي ماكله ونوم قول قطوسه
خش سامي : تي هيا انتي وياها نوضو وتو الفطور وحددي سوريتي يا فرخه ايه بسرعه معاش فيه وقت
ايه وهيا نايضه تنفخ : واااك من عيشه الكلاب هاذي
امل وهيا نايضه تساوي في سريرها : ارقدي او نحددله وسوريته هوا وبوي
ايه بعتت لي امل بوسه بيدها : سلمها يارب الناشطه
خيريه وهيا طالعه من الدار : ايه اي دلعها خميره نوم هاذي
ناضت امل دارت الفطور والعيله فطرت وحددت السوريات ومشو لصلاه
خشت امل المطبخ تنظف زي العاده كملت وهيا قاعده تبخر في الحوش تسمع في امها تتكلم في تلفون مع وحده
خيريه : ايه ايه ان ان ان شاءلله يارب وربي يسعدها
.....: وعقبال لي بناتك يارب ونشوفهم عرايس
خيريه : سلمك يا حنه بارك الله فيك
......: ما تنسيش باش تفضلو
خيريه : ان شاء الله صحيتي حبيبه وبارك الله فيك
...... : يلا في امان الله مع سلامه
خيريه : مع سلامه
خيريه وهيا تكلم في امل : هاذي عمتك سالمه مرت صاحبه بوك كلمتني وعزمتنا علي عرس بنتها بعد اسبوعين بزبط
امل : ايه قصدك بتمشي ؟؟
خيريه : ايه كلنا بنمشو
ايه سمعت عرس جت تجري : عرس ؟ عرس مني ؟ وامتي ؟
امل : ارزني يا بنت علي اساس عندك قفطان توا
خيريه : او نكلم سامي يطلعنا اسبوع الجاي خودو شن تبو
ايه : الله حماااس والله خاطري فعرس من زمان
امل : ايه حقا شن نوضك توا ؟؟
ايه 🥱: والله نعسانه هي سلام
امل شافت امها سرحانه : يام في شني سرحانه لطف
خيريه : سرحانه في الغدي مش عارفه شن ندير
امل : ولا يهمك اليوم الغدي خليه عليا بندير كسكسي
خيريه : سلم بنتي الفالحه
امل خشت للمطبخ وهيا كيف باديه اطيب دق الباب
امل : هيا هيا جايه
والباب يدق بزياده وامل تعصبت : تي باهي قلت جايه لحظه
فتحت الباب وكان محمد ولد عمها
محمد : السلام عليكم وين سامي
امل : وعليكم السلام سامي في الجامع مع بابا
محمد : اه تمام اني نستنى فيهم في المربوعه الخارجيه تمام
امل : تمام اكيد مسافه الطريق ويوصلو
محمد : بالله امل بدون كلافه ممكن طاسه شاهي من تحت يدياتك
امل : ان شاءالله هي
محمد خش المربوعه وقعمز وهوا قلبه بيطلع منه حط يده عقلبه
محمد : اخخخخ علي جمالها وصوتها اخخخ يا قلبي
علي خشه سامي : مني لي واخده قلبك
محمد عدل جلسته: يا هلا بولد العم جمعتك مباركه
سامي : وجمعتك يا برو ايه امتى وصلت
محمد : والله قبل دقايق جاي نبيك في موضوع
سامي : ان شاءالله خير
محمد : خير خير والله صاحبي خالد بيفتح مشروع قلت نقولك شن رايك تكون شريك معه بيجيب بضاعه من ايطاليا والمشروع هذا مربح
سامي : الحق ليا فترا نفكر نفتح موضوع لكن متردد شويه
محمد : تي خيرك يا راجل اهو الفكره جاتك لعندك توكل علي الله
سامي : خلي نكلم بوي في الموضوع وبعدين ساهل
محمد : ان شاء الله خير
سامي : ايه كيف حال العيله
محمد : والله بخير المهم كلمتك في الموضوع توا خليني نمشي ولو صار منه كلمني نتلاقو في القهوه وخالد يفهمك علي كل شي
سامي : والله ما طلع بدون غذي اني حلفت
خش سامي للحوش : يا بنات يابنات
امل : نعم
سامي : احسبو محمد ولد عمي علي الغدي
امل : تمام
______\\_____\\\_____
أنت تقرأ
روايه : أمل
Contoروايتي مقتبسه من قصه حقيقيه عن بنت تعاني هلبا في حياتها عايشه في بيئه معقده ومحرومه من حقوقها .. امل .. صاحبه القصه تبي توصل صوتها لكل العالم تبي نصحصح الناس من الغفله تبي توقف مع كل بنت مظلومه زيها ... روايتي لا تخلي علي سرد لطيف ونصوص رومنسيه وقصه...
