#السمراء_المستحيلة🖤🌻
#بقلم : موده محمد
#البارت : {4}
صحيت العصر لما اتخلعت انا نمت الزمن ده كلو😳؟! الساعة كانت ٤ قمت اتوضيت و صليت العصر و عملت لي سندوتش و ختيت بسيمة في صحن صغير و اكلت 🤤 ...اتصلت ع متوكل اتونست معاهو و قفلت منو تاني رقدت و بقيت افكر اعمل شنو في حياتي دي ..قعدة البيت مملة شديد و عايزة استثمر وقتي في حاجات مفيدة..فكرت تمامـ قلت اول شي
ح ادخل معهد لغة انجليزية اتعلم الانجليزي كلو...
و عايزة استفيد من التلفون بقدر الامكان ..ما ممكن مواقع تواصل بس ...في تطبيقات كتيرة ممكن استفيد منها ...
« متوكل » :
بعد سمعت صوتها ارتحت نفسياً 💙 طيف دي جزء أساسي من حياتي ..و الله ما عارف بدونها كنت ح اعمل شنو 😔
بالرغم من انو هي قاسية مرات كتيرة لكن ما لقيت و لا ح القى انقى منها.....♡
لما اكون مضايق و زعلان ماف زول بروقني غيرها ...بتحاول معاي بي كل الطرق لحدي تخليني اضحك و انسى السبب المزعلني ..ربنا يحفظها لي و ما تشوف شر في حياتها☹️💛💛
« أحمد » :
كان قاعد مع اصحابو و مضايق شديد إستأذن منهم و ساق عربيتو مشى البحر شاف ليهو مكان ما فيهو ناس و قعد بقى بتكلم مع نفسو
” ياخ انا بحب طيف ليه تعمل فيني كده😣؟!
معقولة ما شايفة حبي ليها ؟! انا عارف انو هي هسي زعلانه مني بسبب تصرفي معاها بس لازم اراضيها و اتكلم معاها ..انا بحبها شديد و ما عايز اخسرها ..ما عايز اخسرها💔
قعد زي نص ساعة لما مزاجو راق حتى رجع البيت اتغدا و ارتاح شوية المغرب اذن مشى الجامع لما جاي راجع دخل السوبر ماركت و اشترى شوكلاتات من كل صنف اتنين ختاهم في ظرف هدايا و جاب ورقة ملونة و كتب فيها
” لها ضحكة تجعلك تؤمن بأن تعاستها جرمٌ بحق هذا الكوكب 🤍🤤- ” I,m Sorry Dear
⓪« نودين » :
طوالي الصباح مشينا انا و راشد نعمل الاجراءات اللازمة للجامعة شِلت معاي كل الاوراق و المستندات البحتاج ليها
غايتو لحدي الساعة 10 و نص حتى خلصنا ..
نودين : راشد ارح نفطر انا جُعتَ شديد🥹
راشد : خلاص ارح الكفتريا ديك
بعد اكلنا رجعنا البيت عمار و محمد كانو مع حبوبتهمـ بي هناك غيرت ملابسي و نمت😴 و راشد كان شغال بي تلفونو و بعد شوية جوهو عمار و محمد قعدو جمبو و بقو يتونسو مع ابوهم🤍
( اهم حاجة تحتوي اطفالك و تحسسهم بالامان و تديهم جزو من وقتك🥺💗 )
حسيت بي يد بتهز فيني
راشد : نودين كفاك قومي صلي الظهر😐
_ قايمة قايمة
و انا بتثائب🥱 عمار قال لي ماما ماما عمتو جابت لينا شوكلاته😄 قلت ليهو كويس 🖤 قلتو ليها شنو ؟! عمار و محمد الاتنين قالو لي قلنا ليها شكراً
بُستهم الاتنين في خدودهم و قلت ليهم حبايب ماما انتو😗💙💙
قمت اتوضيت و صليت كان مزاجي في شاي عملتو بالقُرنفُل ♡ مليت السيرمس و رصيت الكبابي شربنا انا و راشد سوا ...وديت لي ناس خالتو إنعامـ الشاي
منى : نودين مشتاقين والله ☹️ شنو يا زولة اتغيرتي كده ؟!
_ والله بالاكتر ياخ ..وينو التغير ي بت 🌚
منى : كدي تعالي جاي ي مرت اخوي😐 قامت و اشرت لي بي يدها ب معنى تعالي و مشت على غرفتها ..لحقتها و قفلت الباب وراي قعدت في الكرسي قصادها
* ي بت مالك بقيتي ما بتجينا كتير و مالك ضعفتي و اتبهدلتي كده 🙂 ؟!
_ والله م كدة ي منى ..مشغولة و مع الشفع و البيت + عشان كدة ماف وقت اهتم بي نفسي زاتو والله بكون تعبانة و بنومـ اغلب الوقت
* المسؤلية صعبة بالجد...اشتقت ليك والله قلت نودين طولت مِننا مالها ... لكن هلكتي نفسك ياخ ادي نفسك حقها اهتمي بيها ان شاء الله مرة في الاسبوع بس ..كان م قادرة تعالي لي بس و انا بزبطك ..
_ طوالي🖤
❁❁❁❁❁❁❁❁❁❁❁❁❁❁❁❁❁❁❁
« سعاد » :
كنت بنضف في البيت و فرشتو و عملت بخور .. ادوشت و شلت تلفوني و كنت برد ع رسايل " الواتساب "
جاني اتصال من زينب
رديت
- الوو
= سعاد كيفك
- تمام والله وانتي كيف
= بخير الحمدلله ..اسمعيني الليلة الجبنة عند ناس ربيعة تعالي
- كويس
جهزت نفسي و مشيت قعدت الاولاد جمب ايمن ..الليلة قاعد هو ما مشى الشغل اصلا بيت ناس ربيعة ما بعيد خامس بيت مننا ..وصلت و سلمت عليهم كلهم
زينب : طيب ي جماعة مدام عارفين الفكرة و كدة ..انا ح ابدأ ليكم ح اتكلم ليكم الليلة عن " السيدة عائشة رضي الله عنها❤️🌱 "
وُلدت عائشة في مكة المكرمة ابوها ابوبكر الصديق رضي الله عنه و امها ام رومان بنت عامر الكنانية ثالث زوجات الرسول صلى الله عليه وسلم ترعرعت في بيت يُدين بدين الاسلام و تربت على يد ابوين مؤمنين
..اشتهرت بلقب "ام المؤمنين" و "الحُميراء" شاركت السيدة عائشة في غزوة أحد بملء القِرَب بالماء للجنود بجيش المسلمين
و قد ذكر انس بن مالك رضي الله عنه فقال : " و لقد رأيت عائشة بنت أبي بكر و أم سليم و إنهما لمُشَمِّرتان أرى خدم سوقِهِما تًنقِزانِ القِربَ على مُتونِهما ..تُفرِغانِه في افواه القوم ..ثم ترجِعانِ فتملآنها ..ثم تجيئانِ فتُفرِغانِه في افواه القوم "
توفيت السيدة عائشة في مساء يوم الاثنين الذي وافق السابع عشر من شهر رمضان المبارك لعام الثامن و الخمسون من الهجرة و كانت في عُمر 66 عاماً
والجدير بالذكر انه اشتد عليها المرض حتى احست بأنه مرض الموت و قد اوصت : ( بأن لا يتبعو سريرها بنار و لا يجعلون تحتها قطيفة حمراء و أن يصلي عليها ابو هريرة )
ربيعة : بارك الله فيك 💛
سمية :كتر خيرك والله في معلومات كنت ما عارفاها و هسي عرفتها بسببك تسلمي كتير😔💚
زينب : ما على واجب حبيبه💜
كانت قعدة ظريفة و استفدنا منها و طلعنا و نحنا مبسوطين 💗
« طيف » :
تاني يوم المساء الساعة 2:30 كنت بغسل في ملابسي اتصل علي أحمد ما رديت تميت غسيلي تاني لقيت منو مسج قال لي ردي عليك الله ضروري ...قلت خلاص ي طيف اشوف نهايتو وين ..رجعت ليهو
-الوو.....📞
≈ طيف كيفك ؟؟
- تمام الحمدلله
≈ عايز منك طلب ياريت توافقي
- اها
≈ عايز اقول ليك حاجة نمشي.....نتكلم هناك ممكن ؟!
- طيب
انا حاسه نفسي ببادل احمد نفس الشعور بس في نفس الوقت ما حبيت حركتو ديك ☺️ و ما متأكدة من مشاعري اتجاهو ف عشان كده ما عايزة اعشمو فيني ساي 💔
ادوشت سريع كده و لبست لي عباية بُنيـة و طرحة ناعمة بنفس اللون ...عملت بس مرطب للشفاهـ....اسبورت اوف وايت و شنطة يد صغيرة بلون الSport
👋🦋👋
وصلت و بعد سلمت عليهو و كده
أحمد : اول حاجة يا طيف انا اسف بخصوص الموقف الفات و انا ما كان قصدي شي ..
و تاني حاجة انا والله فجأة لقيت نفسي واقع في حبك قلت لالا يا احمد امكن ده اعجاب ساي و ما اتسرع في حاجة ..لكن مع مرور الزمن اكتشفت انو ده حب فعلاً ...و انا م متأكد منك اذا معجبه بي و لا بتحبيني لكن كل العارفو انو انا ح اديك وقتك الكافي لحدي م تتعودي علي و تعرفيني كويس و بعداك حتى اعرف رأيك شنو و هل انا مناسب معاك ولا لا ....و ح تكوني مطمنة على نفسك معاي ؟! و ح تحسي بي الامان تجاهي و لا لا ؟! انا عارف العلاقه الما فيها حب و قبول من الطرفين ما بتستمر ف عشان كده ليك حرية الاختيار❤️❤️❤️🔕
يتبــــع........💛
