شيم

3

لا تبخلون علينا بنجمة وتعليق بي توقعاتكم وتشجيعكم واقتراحاتكم🤭💜

. . .
. . .
.
.
.

رديت عليها مستغربة "شكتيلي؟ شكو؟؟"

حطت اديها على خصرها وكالت بضحكة "مو كتلج لا تنتظري، تاليتها رح يتزوج ويعوفج"

انصدمت من كلامها بس سويت نفسي ما مهتمة "هو منوة؟"

"حسام، رح يعرس هاليومين"

سكتت للحظات "الله يتمملة على خير، شعلينا بالعالم"
ذبيت غراضي وطبيت للغرفة وسديت الباب
فتحت الشباك دا احاول اتنفس زين بعدما خنكتني العبرة وضاگت بية الدنيا
رفعت راسي للسما وكلت "ياربي، صبر گلبي أني جنت على نياتي، ومجنت رايدة غضبك بيوم واذا الي اختاريتة بي صالح الي فساعدني انو اكون كدة "
بجيت هواي وراحت من قلبي فرحة النجاح الي جنت منتظرتها بكل لهفتي وعديتلها الايام يوم بعد يوم

اي أحد جان يدخل للغرفة علية يلكاني نايمة بس بالاصل مجنت نايمة وإنما امثل النوم حتى لحد يشوف عيوني المورمة والبجي الي ما كدرت اوكفة.

كعدت ثاني يوم الصبح من وكت بعد ليل مليان دموع وشهكات ولكيت امي وابوية يتريكون حتى يتوكل بابا لشغلة
"ها باباتي صباح الخير شو ما شفتج البارحة كالو نايمة"

رديت الصباح "صباح النور، ايي"

كعدت بصفة واشرلي حتى اكل ويا بس رفضت وظليت ساكتة
حس علية مو طبيعية "شبيج باباتي اكو شي ببالج؟"

استحيت شوية منه واخذت كسرة خبز بدون ما اباوع علية "بابا أيهم حباب؟"

باوع على أمي وأمي ظلت تبتسم وكالت" والله خوش ولد ودرة مال الله"

ابوية سكتها" انتظري شوية"

التفت علية مرة ثانية بعدما سكتت أمي
"ليش دتسالين علية؟ انتي مو رفضتي وسديتي الموضوع؟"

جذبت على ابوية وكتلة"حاسة انو خوش ولد وشفته البارحة بدربي من رجعت من المدرسة "

سئلتني أمي وأخيراً " صدك شطلعتي؟"

انداريت على أبوية " لهلسبب سألت على أيهم"

بابا سئلني" رسبتي؟! "

ابتسمت بما معناه انو لا جدوى منكم" لا نجحت وبتفوق، بس اريد اتزوج لان محد بيكم ديشجعني أكمل "

عفتهم ورجعت للغرفة
خواتي جانن نايمات فظليت واكفة كدام الشباك اباوع على بيت حسام ومجنت افكر بشي
لحدما صارت ب12 الظهر
بدت الهلاهل ببيتهم وصوت الناس تجي والهوسة
متحملت المنظر وسديت الشباك ورحت شغلت اغاني وعليت الصوت وكعدت اسمع بأخر زاوية بالبيت وجنت اتاضيق اكثر وية كل مقطع بي حب

لحدما راحت الزفة وصار هدوء بالشارع
تعشيت وصعدت لغرفتي وورة شوية صعدت أمي
دخلت وسدت الباب "شيماء أنتي صدك موافقة على أيهم؟"