بقلمي#اسراء_السعدي
حسابي انستكرام: aass_736
كمت من يمهم بدون كلام ورحت الغرفتي حطيت راسي ع المخده وحسيت بدوخه غمظت عيني وما حسيت بشي بعد
فزيت ع قطرات ماي ع وجهي
ام زيد: ولج خوفتيني من العصر انتي نايمه ع نومه وحده
همس: لا تخافين مابيه شي
كمت من مكاني وراسي يفتر حاولت اسيطر وما اوكع بس ما كدرت دوخه كلش قويه رجعت كعدت ع الجربايه ونمت ع المخده ودموعي نزلت
ام زيد: ليش تبجين يا بعد روحي والله همه خسرانين ويجي يوم ويتندمون ويردوج بس سامحيهم والله راح تفتر عليهم الدنيا مو هينه دموع اليتيم كومي غسلي
همس: بيش الساعه خاله
ام زيد: 6:00 الصبح بعد ساعتين الدوامج واني ستغربت شلون هيج نمتي واتوقع جنتي مغمى عليج
همس: ما ادري صايره هواي افقد الوعي
ام زيد: كومي غسلي وتعي بدلي راح تأخرين ومن ترجعين نروح للدكتور
هزيت راسي وكمت بدون كلام طلعت من الغرفه غسلت واحاول اصحصح رجعت للغرفه لكيت ام زيد طالعه طلعت ملابس شلون ما جان ولبستهن مالي خلك كل شي
وكفت ع المرايه اسوي شالي بس ما يصير عدل عتيته من راسي هوه وشعري وشمرته بالكاع
همس: فوك قهري نوبه انته ياربي شكاعد يصير وياي نطيني صبر وعيني
تنفست قوي وشلته من الكاع رتبت شعري ورجعت سويته صار احسن من قبل شويه زفرت قوي وطلعت من الغرفه
لكيت ام زيد مسويه ريوك كعدنه اكلنه
همس: عاشت ايدج خاله
ام زيد: الف عافيه
همس: يله اني راح اروح
ام زيد: ديري بالج ع نفسج وع كيفج من سوقين ترى اعرفج ضايجه لا طلعين قهرج بالسرعه والله اطيح حظج
همس: هههه خاله والله ما اسوق سريع قابل اني زيد
ام زيد: والله ما تفرقين عنه بشي هم مخبله مثله
همس: يله بيباي
طلعت صعدت بالسياره ورحت الدوامي وبقيت هناك اروح هيج واجي هيج وتعب مو طبيعي متعبه اكثر من جنت ضابط جنت ما اتحرك هوايه نادر اطلع واجبات اله اكو نسوان بالقضيه وجنت بس كاعده بمكتبي وادوني واحقق وارجع البيتي وين هسه جيبي ملف ودي ملف وهاذا خلي يوقع وذاك يختم ومن غرفه الغرفه وهيه مو شركه صغيره وعاديه كلش متعب
رجعت للبيت تعبانه وهلكانه فد مره وصلت للشقه صعدت ع الدرج عباك عجوز عمره 70 سنه
فتحت الباب ودخلت
همس: خاله وينج
ام زيد: هياني بالمطبخ تعاي
همس: شنو كاعده سوين
دخلت ام زيد للصاله وهيه تحجي
ام زيد: جنت اسوي اكل
همس: ليش تعبتي نفسج جان كتيلي اجيب من بره واني هم نسيت
ام زيد: انتي مريضه بيج فقر دم مو مال جيبين من بره يرادلج اكل صحي مال بيت
همس: تمام سويتي اكل
ام زيد: سويت تمن دجاج وخضروات وسويت زلاطه
همس: اروح ابدل لعد واجي جوعانه
