أمي جنة (رواية ليبية )

أمي جنة 4

#أمي_جنة
الحلقة 4

أنا معك في حب العشرين ، وعشق الثلاثين ، وأنا معك حتى ضحكة الأربعين ،ومرض الخمسين ووحدة الستين ، ويأس السبعين ، أنا معك إلى أن يقولوا :"رحمة الله علينا "
ماأجمل الانتظار الذي نهايته تحقيق المراد
عسى الله أن يبدل أحزانكم فرحاً قريباً

في اليوم التالي؛
نزللهم سعد ويطلع عالأخبار هذا كله تحت أوامر فاطمة
كثيرا مانفعل الأشياء من أجل هدفنا ولكن قد تؤدي بنا للهاوية

خش للحوش وباس راس أمه واستسمح منها
عائشة: اليوم بيجوا أهل خالتك في الليل وبيفضوا في أختك مانبيك الدير شي اقعد حتى منظر قدام الناس
سعد: عيب يأمي هالكلام شن ناقصكم
عائشة: امشي لأختكم وأنت عارف شن يطلعوا شن من طلعونا للناس نعرفوا شنو
سعد: باهي تو نمشي ونجيب شن بتحطولهم

جي الليل ونزلت فاطمة طبعا جاية بطولها ومشت قعمزت لأنه هذا الشي الوحيد لتعرف الديره ونعيمة وخالد كانوا حالفين ماهو حاضرينها
أما راضية حاصلة في المطبخ بين شاهي وقهوة وعصير ومرت خوها مبردة ولا كأنه حد متقطع وقاعد بروحه
عائشة: هي مسكينة ماعندها جهد حتى الدير حاجة نوضي يافاطمة شوفي البنت
فاطمة: بتتزوج تتحمل المسؤولية مش مايقولوش عليها بايرة عربها ونقولولهم قامت الفضانية على راسها
عائشة :والله ثم والله غير مانبيش مشاكل مضاله لازاتك لحوشك وأنتي شن بنقولوا عليك يابايرة وناضت بشوي لعند وصلت للمطبخ والقت حايسة تحفر وتعور هذاكا المطبخ هاتي يابنتي خلى ندير معاك حاجة
راضية: التفتت لأمها ضحكت اميمة وشدتها من يدها وحطتها عالكرسي أنتي هذا مكانك مش ليك التعب
عائشة: نزعل منك هذا فوق مادرناش حاجة مقومة في فضانيتك
راضية: عادي المهم أنتي بصحتك وعافيتك

*اللهم رضا فيما أعطانا ورزقنا من نعمة العطاء والحب والحنان
عائشة: باهي جيبيلي حتى وأنا مقعمزة
راضية: وينها فاطمة
عائشة: ضحكت قالت نخلوها تتحمل المسؤولية مش مايقولوش عليك بايرة
راضية: عيب أمي تسمعك وهي قاعدة هنا
عائشة: ان شاء الله تنحرق ماعاد تلزمني
راضية :أمي والله فاطمة كويسة غير خايفة على صغارها
عائشة: كويسة أنتي مش هي تو تشوفي والله لو كان هالسعد نديرله توكيل ماضال إلا باين ومقشع الدنيا كلها وحادفنا في الشارع من وراء هالفاطمة متاع لفلوس
راضية: ربك يستر وخلاص

وصلوا الخال وراجل الخالة والجماعة لعازمينهم وقدموا ضيافتهم وتمت الخطبة على خير مافيش حد تكلم عكس لنقال

في صباح اليوم التالي:
مبروكة: حنان اتصلي بخالتك نبوا نلبسوا الخميس
حنان: ليش مستعجلين
عمر: خش عليهم لبسوها حتى غدوا 
مبروكة: ان شاء الله تكلب
حنان: عادي من حقه يبي يكمل موضوعه
عمر: والله خايف من خالد أمس ماهناش وسعد موضوعه مش مطمن يرحب وحالته حالة وهو لكان مايحبش يشوف حتى وجهي
حنان: موضوعهم مايطمن
مبروكة: ان شاء الله غير مش ناوية عمتك فاطمة الدير حاجة
حنان: بكل كنتها فاطمة وقسما بالله حتى لما تهدرزي معاها ماتطمنيش تتوقعي تقلب الدوة عليك وترفعها لمولاها
مبروكة: ديما نقوللكم هدرزوا سلامتك سلمك وليقرم في عباد الله فوتيه