أمي جنة (رواية ليبية )

أمي جنة 3

#أمي_جنة
الحلقة 3

يارب اجعلنا نعيش أيام نقول فيها هجم السرور عليَّ حتى أنه من فرط ماقد سرّني أبكاني

لو شغلنا أنفسنا بأشياء تفيدنا بما يرضي الله لكنا بأحسن حال

فيه للأسف هلبا أولاد يعتبروا الاهتمام بأمهم حكراً عالبنات فقط وهما ماعندهمش واجب عليهم وهذا الحال سوى زمان أو توا ياما سمعنا قصص وحكايات عالأمهات شن صار فيهم وشن وراهم من حكايات

طلع سعد :من عند أمه وهو خايف لو مايوافقش أمه الطلعه من الحوش لأنه بانيع بوه مكتوب باسم أخته ولتحت باسم أمه على أساس بيتزوج ويكون روحه ويطلع لكن هو خلاص لصق ماعاد يبي يطلع

راضية: أمي أنا ماعاد نبي نتزوج مانبيش عداوة بينا وبين خوتي في الأخير يقعدوا أهم من أي راجل في الدنيا أكيد فيه سبب عشان رافضينه تبي تقنعها عشان ترفض أمها
عائشة: أنا اليوم نزيد نبي نعطيك لعمر هما أمهم مالقت فيهم خير بتلقيه أنتي يابنيتي بعدي
راضية: حضنت أمها بعد عمر طويل يأمي
عائشة: ان شاء الله أنا ماتخافيش عليه أنا أمهم مش حيديرولي شي

اتصلت عائشة: بخوها وتكلمه انه عطت راضية لولد أختها عمر مش طامعة في أولادها يزوجوها

سعد: ركب فوق واستلماته فاطمة: خيرها أمك شن تبيك
سعد: قالت عطت الفرخة لعمر الكلب دارها وكلم أمي
فاطمة: بتفكير عميق أنت مش تبي الحوش ياسعد وتبي حتى حوش أمك والأوراق
سعد: ياريت اليوم هددتني بيهم قالت لو مانعطيش أختي بالطلعنا
فاطمة: عندي خطة أنت كون في طوعها ورضيها ودير زي ماتبي تو تشوف الكلام الصح بعد بنتها تقعد بعيد عليها تو تعرف إنّ الله حق

لو تعرف الله وحقه ماكانت دارت هكي لكن لما الإنسان يخش الجشع في قلبه ودماغه وكل تفكيره ينسى كل ومايفكر إلا في نفسه

العائلة الثانية: لحتكون موجودة معانا
عمر: ولد خالة راضية خريج من العلوم الإسلامية والشريعة محامي عارف مكانه وعارف حقوق الناس
أمه ولهي خالة راضية اسمها: الحاجة مبروكة وراجلها خليفة
عندها ثلاثة أولاد حسن وحسين متزوجين ومازال عمر: لتراجي في عرسه وبنتين خديجة وحنان متزوجات
عمر: أمي أنا نبي نخطب
مبروكة :هذا النهار المبروك من بتخطب
عمر: راضية بنت خالتي عائشة
مبروكة: مش زمان قالولك مخطوبة شن بتخطبها هبلت أنت
عمر: خوتها هما مايبوش يعطوها اليوم كلمتني خالتي وقالت مانعلمش بيه الموضوع ولو تبي البنت تعال أخطبها
مبروكة: أمتى مايبوك يقولولك تعالى وأمتى مش عاجبهم يلزوك لا والله ماني راضية بيها هالزواجة هذي
عمر: يأمي صلي عالنبي
مبروكة: عليه الصلاة والسلام لكن بنت خالتك عائشة لا
عمر :طارتله منهم من جهة خوتها وتوا أمه من وين بيلقاها بالله وين الدوروني ماعاد تلقوني قولي مش موافقة عليها أنا دورتها السماء القيتها في الوطاء وتقوليلي مش موافقة وطلع وسيبها وهي فكرة ترفعها وفكرة تجيبها ... هكي ياعمورة على خاطر بنت عائشة تهزب أمك بارك الله فيك