أمي جنة (رواية ليبية )

أمي جنة

في السماء جنة وفي الأرض أمي
الجنة تحت أقدام الأمهات

نحن عندنا في البيت جنة ولكن نحن لانريد الجنة نريد الدنيا فلهذا نركض وراء الدنيا وننسى رضاها والإحسان إليها
ماذا فعلت لي أم لكي أجازيها بالنفور ماذا فعلت لي أمي لأتركها وأذهب ماذا فعلت لي أمي لكي أرميها في دار المسنين ولا اسأل عليها وأنساها من أجل إنها تزعج أبنائي أو لاتريدها زوجتي 
قصتي اليوم بنخليها على معناة الأمهات وإهمال الأبناء الأبناء لناسيين جنتهم
حيكون عندنا فئتين من الرواية الحسن والسيء والسوي والغير سوي

عيلتنا لليوم تحكي عن أم عندها بنت وحدة وزوز أولاد الأولاد متزوجين وعندهم أولاد وبنات
بنتها لتخدم فيها وتعاند في أمها مافيش يوم جي من يساعد فيها بس كله يهون لما تشوف أمها سعيدة وشكلها كيف مهتمة بيها وتدعيلها من كل قلبها كله عند يهون التعب والشقاء
أنا اسمي: راضية وربي يجعلني راضية أمي لآخر العمر وأمي اسمها: عائشة امرأة كبيرة في العمر تبي من يرفع ويجيب ويهتم ويطيب ماعاد عندها جهد للخدمة لخدماته فينا ساد
خوتي: سعد ومرته فاطمة يسكنوا فوق منا وعندهم زوز أولاد وزوز بنات محمد ومعتز ورنا وجنى
وخوي الثاني اسمه خالد: مرته نعيمة يسكن بجنبهم  عنده ثلاثة أولاد وبنت علي ومحمد وعمر والبنت نهى

راضية: كانت تجهز في الغداء لأمها سمعت دق الباب ابتسمت عرفت من كان يدق مشت فتحت الباب بابتسامة عريضة اهلا جنى ورنا :خشوا
جنى: كانوا كيف مروحين من المدرسة  شميت غداكم من بداية الشارع
رنا: أكيدة أمي مش مدايرة غداء اليوم بوي عمل
راضية: ضحكت عليهم اركبوا غيروا حوايجكم وتعالوا تغدوا باهي
جنى: حضنت عمتها حاضر عمتي
رنا :حاضر وركبن يجرن لبسن وبيطلعن
فاطمة: وين ماشيات 😡
جنى: بنمشوا لجداي تحت
رنا :عمتي نادت علينا
فاطمة: خشوا داخل تو نتصرف معاها عمتكم
قعدت عمتكم فاطمة تسحن فوق تستنى في سعد أمتى يروح عشان تنشر الشر
تحت راضية" غدت أمها وقعدت تستنى في بنات خوها أمتى ينزلوا ومانزلوش
عائشة: تغدي يابنت وأرفعي هالماعين أكيد أمهن شدتهن علينا وماخلتهنش ينزلن
راضية: مسكينات يبوا يتغدوا معاي وأنا قلتلهن أركبن بدلن وانزلن
عائشة: ليهم فوق من ساعة كان بينزلن اهو غداك صقع ونقع

راضية: نرفعلهن حرام شبن فيه
عائشة: ديري رايك أنا بنرقد طفي عليه الضي والتلفزيون
راضية: حاضر
ركبت فوق ودقت الباب وفتحتلها رنا
رنا :عمتي أمي ماخلتناش ننزلوا
راضية: ابتسمت كانت تحب صغار خوها بشكل وتعامل فيهم كأنها صغارها عادي رنو اهو جبتلكم مش ماتقعدوش من غير غداء مدتهلها ونزلت

عندما تكون عندك حسن نية وفي من ناس تنوي الشر وتقلبها عليك ساهل منه

خشت رنا: وفرحانة ونادت جنى تعالي عمتي بعتتلنا من الغداء
فاطمة: تعالي ماسمعتش عاودي شن قلتي
رنا: قعدت ترعش من منظر أمها ااا عمتي بعتتلنا غداء لأنه قلنالها بنتغدوا معاها ومانزلناش
فاطمة: خدت الصونية ورمتها في الكناسة هكي تبوا أنتم هكي بطيرولي راسي وقعدت تحلف فيهن مازال نسمعكم ماشيين ونازلين تحت نهاركم أسود
جنى ورنا :خشوا لدارهم يبكوا وهما مش فاهمين كره أمهم لعمتهم وجداهم

وياهل ترى الكره هذا ناتج عن قصة قديمة أو ماشي في عروق هلبا ناس مايحبوش العزوز والحماة لحد اليوم مافهمتش ليش يكرهوهم رغم أنها تلقيهن طيبات لين خلاص

روح سعد المغرب
لاقاته راضية: تحت سعد كيف الحال
سعد: الحمدلله كيف حال أمي
راضية: تنشد عليك خش شوفها ونبي دواء هذا جيبهلي
سعد: باهي وخش سلم على أمه
وفرحت عمتكم عائشة: تقول ولدها كان في الحج مش فوق منها كيف حالك وكيف حال خدمتك
سعد: والله الحمدلله كيف حالك أنتي يأمي
عائشة: الحمد لله الحمدلله بشوفتكم صحيحين قدام عيني
سعد: المهم رضاك علينا
عائشة: راضية عليكم دنيا وآخرة
سعد: هيا السلام عليك
عائشة: وعليك السلام برا ان شاء الله تلقاها مفتوحة قدامك وين ماتمشي
سعد: طلع وركب لحوشه ولقي فاطمة مستلماته
سعد: خير ان شاء الله
فاطمة: بناتك أختك بتفسدهم أربعة وعشرين ساعة وهي شادتهم وتعبيلهم في روسهم عليه
سعد: ماعاد تخليهم يمشوا وتمت ماعندي ماندير
فاطمة: كيف ماعندك مالدير لما بناتكم ماعاد تقدر تحكم فيهم يقعدوا زي عمتهم بعدين قول ماعاد تخليهم يمشوا
سعد: شن تبي ندير قولي نمشي نضربها نعيط في الشارع نلم الناس عليه
فاطمة: شبحتله بنظره تقتل ومشت طاحت في بناتها ضرب
رنا: ياماما احني شن درنا
فاطمة: مازال تمشوا لعمتكم نهاركم الأحرف لدوروا فيه
جنى: شن فيها كان مشينا
فاطمة: بنت نعيمة داسينها وخايفين عليها وأنتزا لما تمشوا تخدم فيكم زي البنقلة خايفين منها نعيمة لكن أمكم عادي تتحمل
رنا: عمتي ماتخدمش فينا
فاطمة: بدت تضرب في رنا تكدبي فيا وأنا نشوف فيهن بعيوني
سعد: خش للدار ليش تضربي في البنات
ومشن البنات لبدوا وراء بوهن
فاطمة: يكدبوا فيا قالولي عمتي ماتخدمش فينا وهي كل مرة تنادي فيهم يغسلن ويمسحن وخيره بنت نعيمة: مايحركوش فيها
سعد: تو أنا شن دخلني في بنت نعيمة وهذي عمتهن مافيها شي كان حركن حاجة أو مدن حاجة
فاطمة: بناويتي مالقيتهن أنا  بيلقاهم غيري
سعد: وابدي حركيهن المشاكل هذي مادخلنيش فيها

فاطمة: طلعت من الدار وهي تحلف فيهم وأياماتهم سود نود حرف
عائشة: ياراضية تعالي شوفي عيت خوك خيرهم
راضية: مشاكل عائلية شن بنديرلهم يأمي
عائشة: قلتلك أمشي شوفيهم
شوي والقوا سعد نازل وخاشلهم
عائشة: شن فيه ياوليدي
سعد: البنات ماعاد تحركوهن زي ماتكلموش في بنات التانيين حتى هما مايتحركوش يخشوا يلعبوا ويديروا ومايمسوا شي وقال هالكلمتين وطلع

عائشة: خيرك شن مدايرة للبنات ياراضية
راضية: قعدت تبكي أنا والله مادرتلهن حاجة بنيات خوي شن بنودهن أنا
عائشة: لا حول ولا قوة إلا بالله الله يرعشها زي مارعشتنا خلاص ياراضية نوضي اغسلي وجيهك واستهدي بالله
راضية: حاضر ناضت غسلت وجهه وجت قعمزت بجنب أمها بعد ماهدت نفسيا
عائشة: ماترعشيش روحك هي من يومها هكي مفروض تعودتي
راضية: أنا مش قاهرني غير إنه تعبي في راس سعد والله البنيات لما يجونا كان نلقى نحطهم في عيوني ماعنديش اوخيات كان نلقاهم زي وخياتي
فاطمة: تحسابه ضاربها أو اشبح شن مدايرلها

ياريت نحترموا كل شخص من عائلتنا مهما كانت قرابته العداوة ماتجيبش فايدة كانت الحقد والشر

.
.
.
يتبع الباقي وان شاء الله تكون المقدمة عجبتكم
سامحوني عالتأخير كنت طالعة 😊
ممكن ماتكونوا فهمتوا شي لكن ديما البدايات معقدة وشوي شوي تنفك وتنحل العقدة ❤️