#سقف_الأمنيات 17
هجمتو بكلاما البدون مقدمات وقال : حااادث ؟ كيف الكلام ده؟
ماما سعاد : كلمتني هاجر والله قالت هي واختا وعادل أبوهم
قال ليها : متين الكلام ده حصل؟
ماما سعاد : أمس بالليل كانو راجعين من المطار، وقالت اتعوقو لكن كويسين الحمدلله
قال : لا حول ولا قوة الا بالله العلي العظيم، الحمدلله على سلامتهم..
ماما سعاد : هاجر تبكي سااااي والله قطعت قلبي
غسان : بتكون خافت عشان كده
ماما سعاد : ارح أمرق وديني ليهم
غسان : حسي طوالي؟
ماما سعاد : اي طوالي لأنو لو مرقوهم البيت ماحتشوفا تاني يا الفالح لأنو حيمشو بيت أمهم فهمت؟
ضحك بدون صوت وقال : والله يا أمي انتي لذيذة، حسي انتي في شنو وهم في شنو..
ماما سعاد : عروس ولدي دايريني مااشوفا واطمن عليها..
المهم ما سكتت الا بعد مشو ليهم فعلاً ، لقو نفسهم ما الوحيدين كم ناس من اهلهم هناك وأهل رباب كمان.. ماما سعاد أخيراً قابلت رباب وسلمت عليها وواستا وكفرت ليها لي البنات.. نسخة من نيڤين أو العكس البت نسخة مصغرة من أمها.. سألت عن حالهم بقو كيف
رباب متصبرة ولكنها متألمة عشانهم : كويسين شيرين اتجبصت يدها بس نيڤين الدكتور قال المنطقة دي مابنفع تتجبص ولا شي وكان مابين تتعمل ليها عملية ولا لأ بس جا دكتور تاني الصباح وقرر إنو بتلتأم براها بس بتاخد زمن وعملو ليها رباط خاص يسند اليد والكتف بس الحركة ممنوعة
قالت ليها : قدر ولطف الحمد لله بركة جات على كدا..
طبعاً رفضو لي كل الموجودين يخشو ويشوفو المصابين بس رباب المرافقة، مع التحانيس خلو الحبوبة تدخل وماما سعاد برضو بعد ماسلو روحهم، دخلت شافتا وكفرت ومرقت بي دربا..
بعدها استاذنت هي وولدا فاتو ورجعو البيت وفي الطريق حكت لي غسان الدار جوه شنو وقالت: لو شفتها والله كانت تعبانه شديد من الوجع، ظاهر في وشها وحتى شيرين ذاتا يا حليلا موجوعة شديد الله يشفيهم ويعافيهم يارب، عادل في قسم الرجال ماشفتو بس قالو كويس
قال بأسف : الله يشفيهم
ماما سعاد بأسف برضو : حسي لو كانت في بيتنا مالو؟ كنت مافتها دقييقة لكن نقول شنو في قوة الراس
عاين ليها بي دهشة وهو مبتسم : أميييي ! يعني انا السبب بقيت؟ هههههه والله انتي عجيبة يا حجوج ياخ، وبعدين تعالي نفسي بس أفهم سر الريدة الفايتة الحد دي مع إنك بي بناتك يعني؟
ماما سعاد بي فرح : والله من يوم لاقيتا أوووول مرة قالت لي بي صوتا الحنون الحتيتون ده الله! إسمك حلووو ياماما سعاد ، دخلت قلبي طوااالي سبحان الله
غسان ضاحك: بكشتك يعني اتاريييييك بتحبي البكش والشكر يا ماما سعاد
ضحكت وقالت : المعاملة الطيبة معطت شعر الأسد ماسمعت بي الحكمة دي؟
بقى يضحك ويهز في راسو وواصلو طريقهم للبيت..
وقت الطلعة من المستشفى إنقسمو في الراي، رباب كانت سايقة بناتا معاها لكن هاجر طلبت يمشو معاها هي بي رباب وهي أبت، قالت ليها : عشان خاطر صحة البنات أخير مايمشو بيتك يطلعو سلالم تتعبهم وهم مكسورات كده ،عشااان خاطرهم هم أقبلي، يعني بيتنا ماكان في يوم من الأيام بيتك؟ بقيتي جافية حسي يارباب؟
قالت رباب: العفو ياخالتي لكن مابصح في وضعي ده اجي أقعد مع عادل في نفس البيت
هاجر : من الناحية دي اطمني، عادل حيقعد مع عمر في البيت حقو لأنو مرتو سافرت للولادة ومافي زول في البيت، وانتي اقعدي معاي إنتي والبنات معززة مكرمة
غايتو ماادتا فرصة تفرفر وترفض فرضت في الأخير ومشو كلهم بيت هاجر في الاخير...
في الجانب التاني شيراز كلمت حاجة سكينة وبدري وحسام سوا إنو شيرين عملت حادث هي وأبوها وأختها، حسام قال بي لهفة جاتو غير خاطرو : وشيرين؟ كويسة؟ حصل ليها حاجة؟
شيراز عاينت ليهو عين مستغربة لكن قالت : كويسين الحمد لله كسور بسيطة هي ونيڤين أختها والأبو
حاجة سكينة : كفارة الله يكتب سلامتهم قدر ولطف
بدري : ألف سلامة أجر وعافية إن شاء الله
شيراز : ان شاء الله الله يسلمكم
بدري: وحسي هم وين؟
شيراز : طلعو من المستشفى أمي قالت قبل شوية
بدري : خلاص بعد أرجع بعدين بوديكم إنتي وأمي
شيراز : لكن هم مشو بيت أهل أبوهم ساقوهم هناك البودينا ليهم شنو بري ماماشة، أنا كفرت بالتلفون وخلاص
حاجة سكينة مستغربة : ويعني شنو لو في بيت أبوهم عادي ممكن نمشي ونكفر المشكله وين؟
شيراز : ماعندنا بيهم علاقة من زمان ولا بنعرف فيهم زول
حاجة سكينة : والله كان مشو واق الواق لازم نوصلن شيرين ما قصرت فينا أيام قاعدة معانا هنا البخلينا مانوصلا شنو.. إنتي لو ما مشيتي أنا بمشي ليها إنتي على كيفك غايتو..
قامت الحاجة ومشت بيتا طوالي وهي مارضيانة ومعاها حسام وراها.. بدر الدين شاكل ليك شيراز طوالي وقال: يعني انتي بتبالغي دا كلام شنو البتقولي فيهو ده؟ ما ماشة؟ يعني حادث كبير زي ده تقولي لي ما بمشي كيف؟ مفروض انتي دوناً عن الناس دي كلها توصليها لو قاعده في النار تخشي ليها في النار كفاية إنها جاتك وقعدت معاك وخدمتك وغير كده مارضت أمي في عياها وإهتمت بيها إهتمام إنتي دي سنين عمرك كلها القعدتيها معاي ما حصل يوم اهتميتي بيها بالطريقه دي وأنا ما كنت بسألك ولا زعلان لأنو أمي مسؤوليتا علي أنا وأخواني ، بس هي عملت فينا جميل بدون مانطلب منها ونحن بنعرف الواجب ورد الجميل و إنتي لو ما بتعرفي الواجب دي حاجه بترجع ليك، وحسي من دربك ده تقومي تضربي تلفون وتعرفي منهم العنوان والمسا نمشي ليهم كلنا فاهمة ولا لا..
وقام طوالي ما خلاها حتى ردت عليهو بكلمة زيادة..
ضربت طوالي لا أمها تشكي ليها العملو وقالو ليها بدري: تخيلي يا أمي بس كورك فيني ومرق الفي بطنو كلو عشان قلت لي أمو بس ما بمشي لي شيرين في بيت اهلهم ديل لأني مابعرفهم.. وقال شنوووو أنا عمري ماخدمت أمو زي شيرين تقول أنا جابني خدامة كان
رحمة مغيوظة منها : يابت إنتي بتجلطيني في يوم ، خليهم يعزوك وسط أهلك ماشفتي في بكا هيثم سوو وجابو شنو؟ ثم ثانياً فيها شنو لو مشيتو ليهم في بيت أهل عادل ما دخلة ومرقة إنتي غبية ولا شنو؟ انتي ما مشيتي المستشفى على الأقل اوصليهم هناك
شيراز بغيظ: هم ذاتهم الوداهم هناك شنو؟ لي ما رجعو مع خالتي رباب؟
رحمه قالت: الحبوبة هي اتشبكت فيهم وقالت ما يمشو الشقه هناك يطلعو في السلم يتعبو في حالتهم دي احسن يقعدوا عندها في البيت واصرت على رباب وساقتا معاهم هي زاتا بعد أخواني وافقو وقالو خلاص احسن تمشي مع بناتا ما فيها حاجة..
قالت : خلاص امرنا لله بمشي
رحطة : نسابتك ديل ده نظامهم كده بحبو البرامج دي وبحبو الضيفان والعزايم، زمااان وريتك الا انتي وابوك ركبتو راسكم ووافقتو يبقى تستحملي كل البسوو فيك.. ____
جاء المساء وطلعو مشو كلهم زي ما بدري قال وشالو معهم خروفين وبارد وحلاوة، استقبلتم هاجر وكمان رباب بحفاوة واخدو قعدتهم واطمنو على البنات.. حسام شاف شيرين لمحة لأنها متحركة وجات سلمت عليهو هو بدري وكفرو وساقوهم عند الرجال، نيڤين هي الراقدة بأمر من الدكتور فما لاقوها..
جو فيهم ماما سعاد وبناتا واولادا وراجلا ،غسان برضو ماقدر يشوف نيڤين لكن لاقى شيرين وطمنتو في الخفاء كده..
يسرية بعد عرفت الحادث واتكلمت معاهم بالتلفون كلمت بكور وأختها يمشو ليهم ويكفرو فبرضو جو في نفس الليلة والكل اتلاقو مع بعض صدفة.. الوضع اختلف لما جات المرا مع بكور وعادل استقبلهم بنفسو ودخلهم الاتنين لحد نيڤين جوة ،بكور كفر ليها وبراحة من بعيد قال ليها تلفونك معاك؟
فهمتو وقالت بعيونا أيوة، هز بي راسو تمام تمام..
مشا بعدها مع الرجال برضو وهناك اتعرف بغسان وحسام وبدري، غسان عرفو طوالي من كلام نيڤين وحب ينفذ وعدو ليها مادام الصدفة جابت ليهو بكور قبال ماهي تعرفو عليهو.. أولاهو بالحديث أغلب الوقت وشاركهم حسام في الونسة ، وبدري اتونس مع عادل وعمر وبابا حميد.. بكور جا مجبر بس عشان يشوف نيڤين لكنو في النهاية انبسط وحس بتغيير وكان مندمج مع الشباب الإتنين..
كانت ليلة جميلة وفيها بهجة أضفوها كل الحضور بالاخص ماما سعاد الونستا حلوة وحتى حاجة سكينة كانت منطرحة ومامشو بي سرعة زي ماكانت متوقعة شيراز..
شخص وااااحد فقط غاب عن المشهد وكان ليهو أسبابو...
__//__//__//__//__//__//__
مر على الحادث عشرة أيام وقتها نادية كلمت الكل إنها مودية شيلة أسعد آخر الأسبوع.. وعزمتهم يجو يتفرجو ، رباب خلت البنات ومشت بيت أخوها هي واخواتا شافو الشيلة وباركو ليهم وكلمتهم نادية إنها سايقاهم كلهم..
في اليوم الموعود مشت رباب ورحمة ورقية وزوجات اخوانهم واولاهم كلهم قبل المغرب بيت محمد.. أسعد كان جا راجع من الكاملين عشان الشيلة، سلم على عماتو والكل ولما مالمح لا شيرين ولا نيڤين سأل عمتو بكل عفوية وقال : عمتي وين البنات ماجو معاك لييه؟
رباب ماقدرت تجاوبو لأنو استغربت من سؤالو إلا رقية قالت ليهو : اجي ياأسعد يجو كيييف في ظرف زي ده ؟
أسعد قال متردد : ظرف شنو؟
افتكر قصدها عشان ساب نيڤين وخطب أمل
رباب قالت بتلومو : يعني ماعارف ولا عشان انت الوحيد الما ضربت كفرت بقت ليك شينة تكفر حسي؟
أسعد محتار قال : في شنو ياجماعة أنا مافاهمكم والله
رحمة مستغربة : كيف في شنو يعنى ماعارف إنو شيرين ونيڤين عملو حادث؟
أسعد عاين طوالي لي رباب مهجوم : حادث ياعمتي؟ بناتك عملو حادث؟ كيف الكلام ده ومتين؟ والله أنا ماعارف والله والله
رحمة : عاد كيفن الكلام ده معقول مافي زول وراك؟
رباب فهمت الحاصل فقالت ليهو : ولا يهمك ياأسعد اصلاً حادث بسيط طلعو منو باصابات بسيطة مافي شي خطير الحمد لله
رحمة : بكونو نسو يكلموك او كل واحد قايل التاني كلمك عشان كده
أسعد لرباب : سلامتم ياعمتي واعفي لي عليك الله والله ماعارف
رباب : ولا يهمك ياأسعد وانسى الليلة ليلتك ياولدي افرح وانبسط..
انسحب منهم وطلع برا بلهفة ضرب عند نيڤين لكن ماقدر يتوصل ليها واتزكر انها حظرتو فضرب عند شيرين، وجاهو الرد بعد مسافة بسيطة من شيرين وهي بتقول : ألووو! أسعد إبن خالي! عاش من سمع صوتك
أسعد : شيرين! كفارة يااااخ وسلامتك ألف سلامة، ماكنت عارف والله غير حسي امك ورتني
شيرين : الله يسلمك من كل شر يارب، مابيناتنا والله انت ماقاعد تقصر
أسعد: حسي انتو كيف والحصل ليكم شنو؟
شيرين : والله كويسين الحمد لله، أنا كسرت يدي كسر بسيط وجبصو لي يدي ونيڤين كسر في الكتف في الترقوة بس كويسة الحمدلله
أسعد برجاء: ممكن اتكلم معاها لو أمكن؟
شيرين : اكيييد دقيقة بس
ناولت أختها التلفون وقالت : أسعد عايزك يانيڤين شكلو عرف يادوب
شالت التلفون بثبات وردت بكل اريحية : أهلاً ياأسعد كيفك
قال ليها بصوت برجف : نيڤين إنتي كويسة ؟ سلامتك الف سلامة
قالت بطمن فيهو : الحمدلله والله كويسة قدر ولطف الحمد لله
قال : الحمد لله، ماكانت عارف سامحوني والله كنت أول زول لقيتوني أنا بس ماكلموني والله
قالت ليهو : ولا يهمك ياأسعد مابيناتنا ومدام ماكنت عارف مافي شي بزعلنا منك اطمن يا الغالي
حس بنبرة كلاما البقت خالية من أي شوق و أو لهفة فإتوجع شديد
ودعا بعدها وقفل وهو زعلان من نفسو ومن أهلو الاحرجوهو لتاني مرة بل لوموهو عديييل قدام عماتو كلهم مارباب بس فقضى بقية الامسية كلها متكدر وزعلان وكان باين عليهو الضيق.. مامشى معاهم طبعاً ونادية زعلت قالت ليهو ده بيت خالتك يعني مامشين مكان غريب
رفض وقال ليها : جيتي ماحتفرق في شي انتي ست الراي في كل شي وكلو شي ماشي بأمرك انتي وبس فخلوني في حالي
غضبت غضب شديد عرفتو اتكلم مع عماتو وعرف خبر الحادث، قدر ماتحاول تبعدو عن بت عمتو يرجعو لنقطة الصفر تاني.. فعقدت النية في راسا على شي وقالت أحسن شي إنو ما ماشي معانا...
إنطلقو لي بيت ناس العروس في صمت بدون زغاريد او شي عشان خاطر عندهم وفاة في البيت لسة ما مر عليها كتير...
وهناك الوضع مختلف فرح وزغاريد وقومة وقعدة وبزخ شديد، نادية بعد نزلت وسوست محمد بكلام وفاتت دخلت وسط الحريم.. أكرموهم تمام والأمور ماشة كما جرت العادات بعد شوية جا خال العروس اخو نادية وقال الجماعة برا شايفين إنو الكل متفقين وقررو يعقدو ورسلو يجيبو المأزون
.. البيت اتملا زغاريد فناديا عاين تشوف راي العمات لقتهم أول الزغردو حتى رباب وواضح عليها الفرح والسرور.. رباب فرحت بالجد لأنو كده أسعد بعد خطوااااات من بتها واتمنت ليهو الفرح بعيد عن دربها...
عقدو الرجال وبكده رسمياً أسعد بقى متزوج.. أبوه لما ضرب كلمو قبل المأزون يعقد قال ليهو مادام جبتو المأزون رايي مهم في شنو تاني أعقدو على بركة الله..
كل المضايقو كانت التوقيتات، توقيت الخطوبة مع زمن امتحانات نيڤين ،توقيت الشيلة مع توقيت حادث نيڤين وكأنو متعمدين يجرحوها مرات ومرات، ياربي العرس حيكون متين؟ لما تحصل ليها كارثة تاني؟؟.....
نيڤين بعد إتصال أسعد استغربت من نفسها إنها ماشعرت بالحنين لصوتو ولا ارتبكت، يمكن لأنها ملت قلبها بحاجة تانية وهي حب الأطفال والعطف عليهم والانخراط في أعمال الخير وحب الغير..
جاها تلفون من بكور في وقت سابق من اليوم وكلما إنو اتعرف على غسان قريبا وطلع زول ظريف وبقو أصحاب وكلما إنو قرر يفتش عن أبوهو ويعرف مكانو وين ويعرف لي اتخلى عنو، وقال : نفسي اتخلص من العقدة دي من حياتي، عايز اكون إنسان طبيعي زييي زي الناس، لازم اعرف مكانو وين حتى لو الشي ده صعب مابستسلم أبداً
قالت ليهو : بالتوفيق وانا بقيف جمبك ولو احتجت مشورة أسأل غسان أكيد بساعدك هو زول زكي وفااااهم ما شاء الله
قال بإنتعاش : مافي شك اكييييد.. يلا سلام وسلمي على شيرين
نيڤين : يوووصل ان شاء الله.....
شيرين كانت راقدة في السرير التاني بتتوجع من يدها وتتحسر على حالا.. كانت مابتحب تتمارض وترقد في السرير، وحالتا سائت لما حسام اتكلم معاها وكلما إنو فاتح أمو وحيجو يطلبوها قريب
صارحت نيڤين القالت ليها : إنتي خايفة من شنو يعني، حسام واهلو ناس كويسين والا ماكانو ناس خالتي رحمة ادوهم شيراز أكيد ،واذا هي قادرة تتعايش معاهم بي شخصيتا الفقر الكريهة دي شنو المانع انك تنجحي برضو
شيرين : أنا ماقادرة يانيڤين ، لو فكرت في الموضوع ساكت بهبط خلي اعرس عديل.. لو عرست وجبت أطفال ذنبهم شنو يبقو تعيسين بسببي
نيڤين ضاحكة: والبتعسهم شنو انتي كمان وبعدين انتي سابقة الأحداث مالك كدي عرسي وجيبي عيال بعدين فكري في العواقب
شيرين : اضحكي ماانتي ماعارفة انا بحس بشنو.. مش نحن حياتنا كانت حلوة في الأول؟ وفجاة أبوي بقى يكرهنا ورجعنا السودان وحالنا اتقلب؟
نيڤين اتأثرت وقالت : انا مابتزكر التفاصيل بس بتزكر اني زمان كنت محتارة نحن ليه ماحنرجع بيتنا مع أبوي تاني؟ صراحة أنا كمان ماعايزة اعرس عايزة أفضل مع أمي حبيبتي وابقى رسامة سودانية معروفة وبس
شيرين : أعمل شنو مع حسام؟ ماعايزاهو يكركر أمو ويحرجني معاها
نيڤين : خليهو ياااخ يجي اهو موضوع هههههه بعدين هي خطوبة يعني ممكن تنطي في النهاية
شيرين : فكرك كده؟ ماعارفة ياخ جد خايفة
نيڤين : ماعارفة يازولة ماعايزة اتورط معاك بعدين تقولي أنا السبب أنا أصلاً غبية وبتكلم ساي ، آييييي أنا زهجت من الوجع ده، مابخليني انوم ولا يغمض لي جفن، آخخخخ ممكن تناوليني المسكن و كباية الموية؟
شيرين قامت براحة وهي بتقول : ومين سمعك يختي
__//__//__//__//__//__//__
بالليل متأخر نيڤين جاها تلفون من رقم غريب، ضرب كتير لكن خافت ترد، أكيد ده أسعد عايز يبرر كعادتو بس تم العقد التبرير بفيد بشنو.. دعت ربها يشيلو من قلبها وزكرياتا في أقرب فرصة.. كتبت في حالتا في الواتس - ليت الألوان كانت تشفي الجراح لكنت رسمت حتى الصباح
بعد شوية جاها تاني تلفون عاينت لقتو المرة دي غسان واستغربت شنو بخليهو يضرب في وقت زي ده، ردت بعد مسافة تفكير : الوووو!
قال بدون مقدمات : منو الجرحك للدرجة دي؟
اتفاجأت من السؤال لكنها قالت : مافاهماك
غسان : من يوم عرفتك وانتي حزينة وبتبكي الليلة بس اتأكدت إنك وصلتي الحد لأنك أول مرة تكتبي حالة في الواتس اب، منو الجرحك يانيڤين ؟ منو الحماك النوم؟
لقت نفسها بتقول بدون اي تحفظات : حبيت إنسان.... حبيتو شديد..... ماعرفت زول غيرو لاقبلو ولا بعدو.. الإنسان ده الليلة أتزوج وأنا بقيت غريبة خلاص، عملت كل شي عشان اقوى وعجزت، يوم لقيتني في الشارع كنت شفتو وماقدر يدافع عن نفسو لأنو بعد عني بإختيارو.. كسر قلبي وكسرو أحر من الكسر الفي كتفي لأنو كسر القلب ماليهو مسكن
غسان ندم لأنو سألا، كان متمني يفضل متوهم، بس بإعترافا اتجدد الوجع القديم.. تااااني يعيد الكرة؟ يتزوج واحدة بتحب واحد تاني؟ وهو لييه مايلاقى البتحبو لييه بتعتر في حبيبات غيرو.. الفرق المرة دي إنو واقف على البر لكنو مصر يدخل الموج من تاني، رغم السمعو منها إلا إنو ماقادر يتراجع، في صوت جواهو قال ليهو : انت الفارس المنقذ إتذكر ، الدرب فاضي ماتتردد
قال بعد سكتت : مافي كسر ماليهو جبر ومافي جرح ماعندو دوا
نيڤين : تفتكر؟
غسان : لو ماعرفتي غيرو ماحتعرفي الفرق يانيڤين، عشان تتقدمي لقدام وتتخطي كل شي في الماضي ماتعيشي أسيرة للحب الأول، أنا عندي ليك إقتراح
نيڤين : قولو
غسان : أكتبي في ورقة بيضا بخط كبير جميل * ما الحب إلا للحبيب الأفضلِ *
نيڤين : مش كانت ما الحبُ......
قاطعا وقال : انسي القديم ونخلي ده شعارنا، حتى أنا بشارك معاك
نيڤين : إنت كمان؟
غسان : أنا كمان جربت الجرح زيك بس جرحي كان اكبر من جرحك بكتير
نيڤين اتفاجأت وقالت : معقول ؟ كيف ده حصل؟
غسان اتراجع وقال : بحكي ليك بس ماحسي، لما أكون مستعد حتعرفي كل حاجة عني
نيڤين اضايقت وقالت : ماتستصغرني على فكرة انا بفهم وبحس، يعني لو حكيت لي ماحتخسر شي، زي ماوثقت فيك ياريت تعاملني بنفس الطريقة
قال بإصرار : واثق فيكي بدليل اني وريتك راس الموضوع بس الحكاية نفسها محتاجة مني شجاعة وأنا ماقادر أخوض في الفات حالياً فخلينا فيكي إنتي
قالت بفتور : أنا تعبانة وكتفي بصرخ بالألم كفاية كده أعتقد
قال معتذر : ماتزعلي أرجوك ماحابي نقفل وانتي مزعوجة مني
نيڤين : وازعل منك لييه انت ما مجبور تحكي لي حاجة وكمان انت ماجبرتني احكي ليك أنا الكنت حابة افضفض يلا تصبح على خيير
عارف انو ماشي في درب اللا عودة بس خاطر ووقفا وقال : أنا كنت متزوج يانيڤين...
اتفاجأت لدرجة شهقت بخفة، حست انها اتجاوزت كل الخطوط لمن ضغطت عليهو .. دي آخرة الفضول.. بقى مضطر يحكي شي خاص شديد عشان يرضيها.. قالت بأسف : غسان ماتحكي حاجة ،أنا بعتذر إني وصلت ليك فهم غلط وضغطت عليك
صمت زمن طويل لمن قالت براحة بتفقدو : غسان انت هنا؟
قال بصوت ملان بالعبرات : تصبحي على خير يانيڤين...
قفل الخط بس فضل ماسك التلفون وسارح بعيد، لسة كرامتو مجروحة، ماكان بحب مرام بس ماكان بكرها... شنو حيكون موقفو من نيڤين بعد ماقالت انها بتحب واحد تاني، بعد ماقال لي أمو تسعى في الموضوع... هل حيقدر يتناسى ويحاول يكسبا ولا حيتصرف زي ماحصل في زواجو الأول ويعيش مشاكل جديدة؟؟؟؟
