#سقف_الأمنيات 26
صباح يوم جديد ورباب طلعوها على البيت أخيراً ، وضبحوا ليها تلاتة خرفان... رباب كانت حزينه لانها بقت عالة على طليقا بعد ما كانت بصحتا واقفه لي بناتا ومامحتاجة لي زول.. نيڤين حست عليها فقالت ليها بحب: ماتهمي يا حبيبتي المهم إنك رجعتي لينا بخير يا أمي، خليهو يدفع تمن غلطو فيكي زمان، أمي نحن بنحبك وما كنا بنقدر نعيش من غيرك ولا لحظة ياربابة والله.. اطمني حتبقي كويسه وترجعي أحسن من الأول كمان بس إنتي شدي حيلك واثبتي للكل إنك اقوى من المرض ده..
حضنتا وطيبت خاطرا... بالخرفان اللي انضبحت دي سوو كرامة واتلمو الأهل كلهم والجيران الجمب بيت ناس محمد وكمان أهل عادل ناس بيتهم يعني وبيت ناس حسام ... ناس داخله وناس طالعه لما قرضو الخرفان كلها بعدها الناس قامو يتوكلو على بيوتهم..
بعد اتفرقو كل الجمع ده، ما فضلو غير البنات وأمهم وحبوبتهم الاصرت تبيت معاهم وحلفت مابتفوت رباب..
نيڤين لاحظت لأختها قاعده مهمومه براها فسألتا: مالك يا قلب أختك شكلك متضايقه ولا بس تعبانه؟
شيرين زفرت زفرة واضح منها إنها مامرتاحه و قالت: الليله ما حبيت موقف خالتو سكينة مني نهائي، كان واضح انها متضايقه أظنها فاكرة ولدا صرف وكلف علينا في المحنة دي، او شال الجزء الأكبر يعني من الصرف
نيڤين : ما تزعلي ما هو كل السبب من أهلك المتخاذلين ديل كان واضح طول الوقت إنهم بيتهربو وولدا الكان واقف طول الوقت طبيعي تفكر انو هو الصارف علينا
شيرين قالت بأسى: صعبت علي نفسي بالجد ما عايزه تكون أمي في رقبة زول حتى لو الزول ده يبقى راجلي يعني
نيڤين : يا بت ما تهتمي لا ليها لا لي غيرا، فترنا ونحن عمرنا كلو حاسبين حساب لمشاعر الناس والناس للأسف ما حاسبين أي حساب لمشاعرنا، يبقى لازم ما نشتغل بي زول تاني خليهم يتعبو مرة ويصرفو ويعملو المفروض يعملوو نحن ما عندنا شغله طالما نحن ما طلبنا من زول
فجأه كده وهم بتكلمو تظهر من وراهم حبوبتم وهي بتقول : لا شيرين يا بتي دايرك تبقي فالحة، قومي يانيڤين يابتي امشي اقعدي مع أمك ما تخليها براها وخليني أتكلم مع أختك كلمتين
قامت نيڤين تشوف أمها وهاجر قعدت بدلا، صفنت مسافة وقالت : أسمعيني كويس يا شيرين يا بتي، أول ما نسيبتك تجي المرة الجاية تاخديها على جنبة وترمي ليكي دمعتين وتشكريها كتيبير على وقفتا هي وولدا معاكم بدون ما يكون ليهم دخل مباشر فيكم.. وتشكري في كرم اخلاقا وتربيتا لي ولدا، وتقولي ليها ولدك وقف معاي وقفة رجال وما فاتني وشاهد الله ما دفعناهو ولامليم غير بس هو دفع تمن الحقنه الانقذت أمي وده جميل حاشيلو ليكم في راسي للأبد..صدقيني حيتحول شعورا من الزعل للفخر.. وتاني مرة بدل تشكي لأختك الصغيره الما عركتا الدنيا تعالي استشيريني ما دام أمك عيانه وما بتقدر تنصحك
شيرين انبسطت من نصيحة هاجر وقامت حضنتا شديييد وقالت : شكراً ياحبوبة ريحتيني كتير والله، الله يخليك لينا
قالت هاجر تاني : وما تشيلي في قلبك من المرا
نحن بشر يا شيرين ما كلنا مثاليين، وهي أم والأمهات دايما بيخافو على اولادم وحق اولادم فهمتي؟ لكن بأكد ليك إنها مرا ولا كل الحريم وولدا ما شاء الله ود رجال فعامليها بالسياسة والمعامله الطيبه فهمتيني يا ضي عيوني؟
شيرين هزت راسا وقالت: أكيد يا حبوبة فهمتك كويس
هاجر : الله يكملك بعقلك يا بتي ويرزقك السعادة وراحة البال...
انتهى اليوم وشيرين رقدت نامت وهي قريرة العين بعد ما حبوبتا قالت ليها الكلام ده...
نيڤين غسان ضرب ليها لكن أبت ترد، كانت تعبانة وما حمل كلامو وسخريتو وزنو الكتير، وقبل ما تنوم فضلت تقلب في يدها وتعاين للدبلة الفضية، الغريب ما في أي زول سألا منها وحمدت ربها على كده... بعدها الأمور مشت عاديه وما في أي أحداث خصوصاً إنو عادل وقف غسان وقال ليهو أنا اديتك ليها و أي شي وحننشر الخبر ولكن ما حنعمل أي حاجة في الظروف دي، غسان قال ليهو : خلينا طيب بس نلبس الدبل في حضورك انت وخالة رباب وحبوبة هاجر ومعانا أمي وأخواتي وكده على الضيق شديد
ضحك عادل وقال ليهو : إنت مستعجل كده ليه يعني يا ولدي، كل شي ملحوق
غسان : لا لا يا عمي ارجوك أسمح لي ضروري نلبس دبل عشان الموضوع يبقى رسمي في عين الكل
عادل : خلاص خير كل الدايرو حيحصل تمام كده؟
غسان ملامحو اتبدلت للفرح وقال : الله يخليك يا عمي متأكد إنك ما حتندم ولا نيڤين كمان حتندم في يوم والله يقدرني وأكون قدر ثقتك فيني..
عادل صافحو وشد على كتفو...
طبعاً بلغ حسام طوالي فقال ليهو حسام متكيف: شفت كلامي؟ قلت ليك اطرق على الحديد وهو ساخن، يلا مبروووك
غسان : الله يبارك فيك شكراً يا صديقي، يلا خليني ابلغ خطيبتي بالخبر السعيد عشان ما تقول لي بعدين اتخطيتني والحركات دي وتعنقد لي هههه
حسام: ظابط يا معلم يلا اتوكل
قفل منو وأتصل عليها سريع ولما ردت قال ليها براحة: لسه طالع من عند أبوك وسمعت منو الموافقة بي اضاني
قالت بنفس البراحة : ان شاء الله كده هديت واستكنت
قال : لااا لسة ، بعد تتغير الدبلة الفي يدك دي وكل الاسرة تعرف إنك خلاص مخطوبة لي رسمي
نيڤين : وقال ليك متين أبوي
غسان : اها اتشوقتي؟ وعاملة فيها ماهاميك
نيڤين : أعرف بس متين المعاد عشان ما تخموني وتجوني على غفلة
سكت شوية وقال تاني: نحن الليله السبت، عدي في أصابعك لحدي يوم الخميس وشوفي فضلك كم يوم
نيڤين : غسان أمي لسه تعبانة وانت عارف ممكن تنتظر شويه ما الخطوبه كده كده تمت خلاص وبعدين أنا ترقوتي مكسورة ولسة بتجبر ما التأمت ده منظر خطيبة ده عليك الله؟
غسان : ولااا كلمة ،خلاص أبوكي قال موافق على موضوع الدبل ده وفي اضيق دائرة من أهلنا، ثم أمك حتفرح ومعنوياتا حترتفع تاني اكتر وتطيب مع الوقت ان شاء الله أنا عارف ده
نيڤين قالت مستسلمه : خلاص ياغسان زي ماتحب
قال ليها متكيف : شنو شنو؟ قولي كده تاني
قالت بتتك على الجملة : زي ماتحب ياغسااان
قال : ياريت تفضلي كده حلوة ورايقة و ما تتراجعي تاني
قالت بسرعة بعدت اتزكرت حاجة : بس إياااك من حسي تقول لي أبوي نعقد وحركات زي دي لاني ماحااقبل وريتك
غسان: لااا أنا ماصدقت إنك فتحتي خشمك ده ورضيتي فما بخربا اطمني
قالت بتربطو من لسانو : وعد شرف؟
غسان : أنا كلمتي واحدة عشان من حسي تعرفيني.
سكت حبة وتاني بدا يدندن ففاجأها إنو بيعرف يغني لما قال :يالبي عذابنا بتنتشي كلم قلبك يختشي🎵🎵 صغيرنا ما عرف الكلام لسه بنعلمو في المشي! لسه بنعلمو في المشي
ضحكت براحة لكن كشفا وقال : والله ضحكتي
نيڤين ضاحكة : ماعرفناك يااا أحمد الصادق
قال : ولسة عندي مواهب كتييرة أستني بس وحتشوفي وتسمعي
فضلو يتونسو كده لوقت متأخر لحد مانامت والخط فاتح، فضل ينادي ينادي بدون استجابة فعرفا نامت وقال بهمس: صغيرنا ماعرف الكلام لسة بنعلمو في المشي...
__//__//__//__//__//__//__//__
تمت الخطبة زي ماحابب غسان واتجمعو على الضيق ولبسو دبلة وجابو ليها هدايا بسيطة، الجديد بس انو نادو رحمة ورقية معاهم حضرو وهم اتولو نشر الخبر، رقية ماخلت زول ماكلمتو ،بكدة الخبر وصل لمسامع أسعد وعرف انو نيڤين كانت جادة في قرار الزواج من غسان مابس بتغيظو....
بعدها الايام مشت عادية ما حصل حاجه تاني بس النتايج طلعت أخيراً ونيڤين جابت 75.1 وحزنت طبعاً، رجعت بيها الذكرى للايام اللي كانت ممتحنه فيها وقدر شنو نفسيتا كانت تعبانه وما قرت اي حاجة وتقريباً ده مجهودا الكان في بدايه السنه اللي خلاها تجيب الدرجه دي..
شيرين قالت ليها :افرحي يا بت إنتي ناجحة
بنسبتك بتدخلي كليه الفنون الجميلة زي ما انت حابة
نيڤين بحزن: كنت عايزه ابقى مصممة عايزة أدرس هندسة، ما عايزه كلية الفنون الجميلة
شيرين : خلاص عيدي لو شايفة إنك بتقدري تجيبي مجموع الهندسة
نيڤين : ما بعيد ماأنا عارفة انو الأيام ما بتخليني في حالي لازم تجي حاجه تخليني ما ادرس كويس
شيرين : ده شنو التشاؤم ده ما تبقى هبله عيدي عيدي احسن ليك
نيڤين : ما بعيد حادخل كليه الفنون الجميله وامري لله
شيرين: سبحان مغير الاحوال بجد يعني كنتي متحمسه ليها فجأه بقت ما حلوه؟
قررت ماتعيد وتقدم للفنون الجميلة لعلو كلو حصل لي خيير...
..
في مره جات داخله عليهم رحمة معها ضيفة طلعت بنت خالتا لكن ما بت خالة رباب إسمها شذى، يا دوب جات تتقدل عشان تزور رباب وتكفر ليهم..
دخلو سلمو وقعدو وكان في شيرين بس لانو نيڤين مشت مع حبوبتا يجيبو حاجات من البيت هناك.. ضيفتهم شيرين وقعدت معاهم وهي بتسأل في شذى : كيفك يا خالتو شذى وكيف حبوبة ان شاء الله كويسة؟
شذى طبعا مفلهمة شديد عاجباها روحا فبتتكلم من طرف مناخيرا : والله الحمد لله يا شيرين، انا دي كويسه الحمد لله، عايزة استقر هنا علشان عندي دراسات عليا بعمل فيها وياهو بطور في نفسي عشان عايزه اجي اشتغل هنا ان شاء الله
شيرين : والله ما شاء الله موفقه يا خالتو شذى
شذى: تسلمي حبيبتي أنا يديك العافيه
رحمه سألتا وقالت: لكن شنو الغيبه دي ومعقول يا دوووب جايه تشوفي رباب يخس عليك والله يا شذى
شذى: انتي عارفه يا رحمه امي ما كانت عيانه قلت كيف أخليها براها حسى و الله ما قدرت أجي الا جات قعدت معاها مره أخوي
وقلبت عيونا كده بعدم رضى من كلام رحمة الفي طبعها ما بتجامل وبتشوت الكلام طوالي في وش الزول..
رباب اصلاً عارفاهم ما بيريدوها من زمان خصوصاً الحاجه أمها، لأنها بت ضرة أختا يعني ما كان فارق معها زيارتهم ليها في حاجة..
قيلت معاهم وفاتت المسا وكانو فاكرينها خلاص مشت بدون رجعة لكن بعد يومين جاهم محمد يزور رباب ومعاهو شذى تاني وطلب منهم إنو تقعد معاهم فترة قرايتا دي عشان هم حريم براهم وحترتاح عندهم وقال لي رباب : شذى زي أختك زيك زينا وأنا طالبك تقعديها عندك فترة بس انتي والبنات.. رباب وافقت على مضض وهزت بي راسا بي الإيجاب.. ماحتفرق لو قعدت معاهم وما حتضايقهم في شي يعني.. البت جابت شنطا وجات قعدت.. وللأمانة قعدتا كانت خفيفة وأصلاً معظم وقتها برا بتجي متأخرة.. شيرين قالت لي أختها : نفسي أكون زي شذى دي سمحة سماحة الجن والجمبو
نيڤين ضاحكة : الجن الكلكي بتعرفي؟ الصراحة سمحة وبتتعامل على الأساس ده
شيرين : ماعرست لي الآن كيف الرجال عمو ولا شنو
نيڤين : شكلها يختي طموحة وعايزة تبقى حاجة فساكة القراية لي حسي بعد تمت ال30 سنة
شيرين : المهم حاابدا مشروع عناية بي النفس خلاص أنا غرت غرت بالجد
نيڤين : ومين سمعك، اعتمديني خلاص
شيرين : لكن يختي شكلها مربطة ومظبطة امورا، الليل كلو تتوسوس في التلفون نفسي اعرف الفي الخط بسمعا كيف
وبقو يضحكو وقررو خلاص يبدو درب السماحة على نهج شذى...
الما عارفينو والمفاجأة إنو شذى كانت بادية علاقة ليها زمن مع محمد ود خالتا والموية ماشية من تحت نادية والكل، وكل يوم بالليل يتونسو لي وش الصبح ومحمد عاقد العزم على الزواج منها في القريب...
نادية مافاضية من أسعد وأمل وعايزة توفق بيناتهم بي أي طريقة وكمان هدى ومشاكلا المابتخلص من يوم ارتبطت مع راجل المرتين داك كل يوم شابطة في مشكلة مع مرتو التانية..
في يوم كانت في أمل وأمها في بيت نادية ومعاهم مرا من الجيران بترمي ودع وظابطين الجبنة وقاعدين يتونسو بي الودع.. المرا الوداعية ما استخارت لما رمت ليها رمية وقالت لي نادية : يا اختي يا ناديه ولدك ده زعلاااان ومهموووم ، هدي شايفى الودعة مقبلة كيفن؟ بسم الله الرحمن الرحيم ولدك ده ممكوووون يا أختي
ناديه اتصلحت في قعدتا وقالت ليها بي لهفة : كدي شوفي لي مالو يا رجبية وليكي البياض عاد
رمت مره تانية وقالت ليها : يختي مكتوووب ولدك ده والكاتباهو ما دايراهو يرتاح ولا يهدى ليهو بال ورابطاهو ربطة عدوووك
ناديه اتخلعت وقالت ليها : كاتباهو مرا؟ كبيره ولا صغيره يا رجبيه شوفي لي يختي
رجبية رمت تاني وقالت : بنية صغيرة يختي حاباهو وخاتاهو في بالا ودايراهو لي روحا
رجبية طبعاً سامعة ليها طراطيش كلام في الفترة الفاتت ديك أيام الوفاة واستندت على المعلومات دي وكضبت على نادية وسمعتا الدايرة تسمعو
نادية هاجت هيجة وقالت لي اختا: شفتيها؟ ماقنعانة الكلبة، لكن التصبر لي أمانة ما وقعت معاي وقعة السواد
هدى مااقتنعت بي الكلام وقالت لي أمها : ياأمي حسي عرفتيها كيف طوالي لفحتي الوصف لصقتي فيها ،وانتي ياخالتي رجبية بتبالغي ياخ في داعي للفتن دي؟
نادية نهرتا : إنتي اسكتي شنو فهمك بي الحركات دي.. والله ما اخليها الما مربية قليلة الأدب..
لأول مرة هدى تكون حقانية
كملو الجبنة والودع ورجبية شلفت ليهم شمال يمين وشالت البياض وفاتت فرحاانة وجيبا تقلان وخلت ديلاك فايريين...
لتاني مرة نادية تلفح توبا وتمرق والشرار بطق من عيونا حالفة إلا تادب بت رباب وتبهدلا وتفضحا في الفريق.. ساقت اختا في طرفا وفاتت بيت ناس رباب الجديد ولمن وصلت ضربو باب الشارع ده ضرب والفتحت ليهم الباب نيڤين ذاتا ، استغربت جيتهم في نص النهار كده بس قالت مرحبة : أهلاً ياخالتو نادية اتفضلو!
نادية دفرتا لي جوة بي غضب لمن حيرتا في راسا وقبل ماتفهم شي ضربتا ليك كف وقبضتا من شعرا وقالت ليها بي كورايك : لو أمك ماربتك يابت رباب نادية بتربيك ، جارية تكتبي الولد قايلاو بعرسك؟ والله لو اقتلو وادفنو جمب أخوهو مابتشمو ريحتو ياقليلة الأدب يامامربياااا، كان انتو بتكتبو نحن زاااتنا بنعرف درب الشيوخ وبنكتب والله أكتبك أخليك تجري عريانة في الشارع وحتشوفي، وطاخ طاخ ضربتا ونيڤين يدها مربوطة عشان كتفها ماقدرت تدافع عن نفسها..
صوت الكواريك دي جاب شيرين جارية من جوة وقفلت وراها باب البرندة عشان امها نايمة ماعايزاها تتخلع وجات تشوف في شنو لقت ليك نادية تضارب في نيڤين ونادية مرا ملانة ونيڤين ماقدرها واخدتا بي المفاجأة.. شيرين مااتحملت وجات بي غضب دفرت نادية قربت توقعا وصرخت فيها وقالت : فكيهااا فكيها ان شاء الله يدك تنقطع، مالك بيها
نعيمة بي غيظ واقفة : صحي أمكم ماعرفت تربي يخسسس بنات ماشمو ريحة التربية دقيها شمميها الدممم
نيڤين اتنفضت وقالت ليها وهي باكية : الله يجازيك حسبي الله ونعم الوكيل فيك الله يكسر يدك
شيرين نهرتهم: اطلعو من بيتنا والا والله اضرب ليك لي خالي
نادية : الخوخة التقلع ضروسك انتي وهي ياقليلات الأدب ، إنتي بتمدي يدك علي أنا؟ وينا رباااب تجي تشوف خيبتاااا في بناتاااا وينااااا؟ التجي تشوف وتملي عينا كان تموت تريحنا
شيرين : أوعيييي تجيبي سيرة أمي على لسانك ياحقودة ياالقلبك أسود
نادية فضلت هايجة وضاربتهم وعملت المابتعمل لملمت الجيران الحاولو يحجزوها من البنات ،في الوقت داك تجي فدوى داخلة بسرعة لمن سمعت الكواريك من الشارع وهي جاية زايراهم، تلقى ليك العركة منصوبة والمرتين المانعات في مقابل البنات المساكين تقوم تجي جارية تقبض ليك نادية من شعرا تخمشا لمن مرقت ليها توبا من شعرا وضاربتا ورمتا في الأرض وهي بتصرخ : البهبش بنات أخوي هبشة بقطعو بي سنوني، قومي اطلعي برا يامرا يامهبوشة
غايتو عجنتا ليك عجن وقبلت على نعيمة خمشتا ليك من صدرا ولزتا على الشارع وقالت : برا اطلعو برا البيت ده
ورجعت لي نادية ولزلزتا طردتا وقالت : كللل الناس ديل شهود على تهجمكم علينا وارجي البلاغ الحاافتحو فيكم انتي وياها لو ماوديتك في حديد ماابقى أنا فدوى، يلا براااا
نادية هاجت ومرقت من بيتا هدى سريييع ضربت لي اخوها وقالت الحق أمي وخالتي مشو بيت عمتي رباب ناويين الشر..
وحكت ليهو بي موضوع الودع وكلام رجبية.. قفل منها وخت يدينو في نص راسو وقال : غايتو يا أمي الله يهديك حتجيبيها كبيرة المرة دي..
ضرب لي أبوهو سريع ووراهو الحاصل
محمد استغفر واتحسبن زمن طويل وقال : والله أمك دي بتكلبشنا كلنا يوم بسبب عمايلا دي ،ارح امرق نتلاقى قدام في بيت عمتك
قفلو من بعض واتحركو... محمد كان مع شذى خالطين في كافتيريا في السوق بعد لفة في السوق عشان شذى تشترى مستلزماتا للعرس... وصلا سريع محل ماشة وطيران على بيت رباب يلحق نادية الفقر.. بقى ماطايقا اصلوو من ظهرت شذى..
أسعد وصل الأول لقا أمو تهتف في الشارع وتنبذ.. نزل بسرعة وجرا عليهم وهو بقول : ياأمي ده شنو فضحتينا ياخ في شنوووو؟
فدوى شاكلتو : سوق أمك بيتا واطبلوها في اوضة مادام هي مجنونة وبتتهجم على الناس كده في بيوتا
نيڤين لمن شافتو جا وقفت ليهو وقالت ووشها ملان دموع وخلقتا مبهدلة : خالتو نادية اتهمتني اني كتبتك يا أسعد، أنا نيڤين دي بقيت بتاعة فقرا وبكتب وبعمل سحر ، ضربتني وجرستني في الفريق، حسبي الله ونعم الوكيل فيكم ياخ مالقينا منكم غير كل حاجة كعبة، أمشو من هنا مادايرين معاكم صلة تاني
شيرين قالت بقهر : أمك مرا وكبيرة وياما احترمناها رغم الاذى اللقيناهو منها طول عمرنا، ياخي دي قالت عننا بنات حرام أبوهم جدعن لينا وسامحناها ، حسي امي عيانة وتعبانة ومابتحمل مشاكلكم دي، ياخي فارقونا مادايرين نعرفكم تاني ولو مات فينا زول ماتجو تعزو فينا ، امشوووو
أسعد اعتذر وساق أمو الما سكتت من الهتاف لحظة وأختها ودور فات ، طول الطريق هم يهتفن وينبزن بي طول حسهم وهو ساكت لمن رجعو البيت.. نزلهم ودخلو البيت كده انفتح فيهم وقال بي طول حسو: معقووول يا أمي كده؟ لافحة ليك كلام من وداعية كضابة وجارية للناس تهجميهم وترجميهم بالطريقة السوقية دي؟.. معقول أنا أمي ألقاها تردح في نص الشارع وسط ناس غرب جاين يتفرجو في جنها؟ لي ياأمي ياااااخ ليي، ياخي انتي الله شال ولدك من عينك وسكن التراب لا اتعظتي لاخفتي لا اهتميتي، وإنتي ياخالتي عايمة على عوما؟ انتي الكبيرة الواعية، طيب خليكم انتو جاهلين وماعندكم مخ وينك ياست أمل يامتعلمة يامثقفة قاعدة ليك لي مرا كضابة تألف ليك وتقول انا مكتووووب؟ لكن هي عندها حق أنا فعلاً مكتوب! مكتوب علي الشقا طول ما أمي نادية، طووول ما أمي نادية
مرق ورزع الباب رزعة لمن إتفزعو....
محمد لمن وصل لقى الموضوع اتفض وعرف الحاصل من شيرين لكن فدوى ماسكتت ليهو وقالت : نحن طول عمرنا ناس مستورين جاية مرتك تشوشر علينا في آخر عمرنا؟ والله حلفت بي الله وماطالبني حليفة المرا دي تعتب هنا تاني الا ما أفتح فيها بلاغ والحي ده كلو يشهد
محمد رجع بيتو وملان فل، دخل زلاهم زلة ماخلا ليهم شي ونادية كانت هايجة وبتكابر على الغلط لكن محمد لفحا كف واحد نفسو الضربتو لي نيڤين وقال ليها : لو عتبتي باب البيت ده تاني بدفنك في المقابر الليلة دي قبال تصبح الواطة..
طلع برضو ورزع الباب نفس الرزعة..
غايتو شيرين وأختها بكو جنس بكا لكن فدوى سكتتهم وودت نيڤين لي عند هاجر وقالت لي شيرين : اكيد رباب بتكون حست فإنتي كضبي اي كضبة قولي ديل الجيران أو أي شي المهم ماتحسسيها هي ماناقصة ولو سألتك من أختك قولي ليها جات عند امي سمح؟
شيرين : كويس ياعمتي
نيڤين الدرب كلووو تبكي، ماواجعا الضرب قدر ماوجعا الخزلان والتهمة الباطلة.. بقت تكره أسعد كرهاً ماحستو تجاهو قبل اليوم حتى لمن سابا وعرس غيرا، صحي حبو ماجاب ليها الا الهموم والحزن والدمعة الروية.. بعد وصلت البيت حست بألم كبير في كتفها بقت تصرخ من الوجع وتقول : عمتي الحقيني ماقادرة أنا موجوعة شديييد ،سندتا ورقدتا في راكوبة هاجر الجات من جوة مهجومة تنادي : في شنو يابنات في شنووو؟
فدوى ضربت لي عادل وقالت ليهو بعد السلام : تعال نيڤين دي تعبت شديد كتفا واجعا وتبكي من الألم دايرة اوديها الحوادث
عادل : وديها وانا لاحقكم طوالي حسي دي
فدوى لبستا عباية من حقاتا الخاتاهم عند أمها وساقتا بعد ماحكت لي هاجر البقت تتحسبن عليهم ماسكت لسانا لحظة..
ودتا فدوى ورقدوها وادوها مسكنات والدكتور طلب صورة، استنو عادل لمن وصل بعدين ساقوها للتصوير وعادل دفع تمن الصورة ورجعو للدكتور، قرر ليها عملية وقال لي أبوها : للأسف العضمتين ما التأمو كويس والموضوع ده حيتعبا خصوصاً لو اتعرضت لي اي وقعة او اي شي زي ماحصل لمن جابوها، لازم عملية مستعجلة نحاول تربطهم كده بتشفى اسرع ان شاء الله
عادل :خلاص على بركة الله
الدكتور : حنحضر للعملية وبكرة ان شاء الله نتوكل نعملا ليها..
نيڤين خافت من كلمة عملية دي شديد بس عادل طمنا وقال ليها حتبقي كويسة وترتاحي من رباط اليد ده تماماً ان شاء الله
ضربت لي غسان بعد بقت براها وكلمتو فجاها بالمسا وقعد معاها ونسا زمن طويل
رباب فقدت بتها وبلسان تقيل سألت شيرين وينا ،قالت ليها إنها انزلقت وقعت وكتفها وجعا فعمتا فدوى وعادل ودوها المستشفى وكلمتا بي كلام الدكتور وطمنتا عليها...
وفعلاً تمت العملية وطلعت البيت بعد كتبو ليها على الخروج.. من يوم الحصل وشيرين تدعي اللهم رد كيدهم في نحرهم واشغلهم في بعضهم وأمسحنا من بالهم.. كانت خايفة من كلام ناديا عن الكتابة وخافتا تضر نيڤين لأنها مرا مطرطشة وممكن تعملا، إذا كانت صدقت كلام وداعية دجالة ساي وعملت فضيحة ماممكن تضرهم؟
الله إستجاب لدعاها وحصل حدث شغل نادية في روحا ونساها الكانت ناوية تعملو.. محمد جا في بيت رباب المسا وقت بتكون شذى قاعدة وكلم اخواتو. يجو عشان عندو خبر مهم.. جو الأخوات ولما اطمن انو كلهم متجمعين كلمهم بي الخبر وقال : أنا حااعقد على شذى بي موافقة أهلها بس العقد حيتم عند أهلا في القضارف
اتفاجأو شوية لكن باركو ليهم واتبسطو للخبر بس كية في نادية أكتر شي..
شذى سافرت فعلاً ومحمد بعد حددو اليوم ساق أخواتو الاتنين وأخوانو ومشو القضارف عند خالتو وتممو العقد وجو راجعين بالعروس..
نادية صدمت لمن عرفتو عرس والأولاد زعلوو خصوصاً هدى ومارضت وبدت حرب المطاعنات في الفيس وحالات الواتس اب
الكارثة الأكبر لي نادية هي إنو محمد مرق الاجرية تاااني وصان البيت وفرشو أحسن فرش وسكن ليها شذى جمممبها... غايتو ماتو موت هي وبتها وأخواتا.. شذى كمان في المكاواة أستاذة كرهتا ليك بي ريحة البخور والدخان والروايح حقت العرسان.. كم مرة هدى جاتا اتشاكلت معاها ونبزتا ياشلابة يا لصة وغيرو من المنابيز، شذى طبعا زي ماقلنا سمحة سماحة شديدة فكانت تدلع ليهم وقت تشوفهم ولمن ينبزوها تلعب ليهم بي شعرها الطويل وتمشي تتمايل وهي بتقفل في بابا عليها تخليهم يمووتو بي الغيظ.. في مرة قالت لي هدى: إنتي بالذات ماعندك وش تتكلمي معاي بعد عرفت انك جارية ليك ورا راجل مرتييين ما مرا عشان كده الشلابة دي إنتي فاهمة ولا لأ..
الدرامات دي كلها رقية عارفاها بي الحرف و بتجي تحكيها لي رحمة ورباب والبنات فيموتو بالضحك عليهم...
بعدها الأيام مشت رتيبة بدون شي يزكر غير إنو رباب ماشة في تحسن وكمان نيڤين لحد ما عادل في يوم ضرب بشرهم وقال ليهم:أبوبكر صحى....
