يوم جديد 🌞
ناض ايهم على 6 كيما عادتو باش يدير السبور لابس survêtement نوار ومطلع الكابيش داير كيتمان ويسمع في نوعو المفضل للغناء الاغاني الايطالية الكلاسيكية ويجري في الغابة لي بحذا القصر
حبس عند النهر يتنفس وصورتها ماحبتش تتنحى من بالو ليل كامل مارقدش وهو يخمم فيها حس حاجة تحركت داخلو كيفاش جات
في ايام قليلة قدرت تديلو عقلو وتفكيرو
ايهم: لا ايهم مستحيل الطفلة مزالت صغيرة وانت وعدت نفسك بلي بعد ديالا متزيدش تحب خلاص كامل خداعين وكيف بعضاهم حط يدو على قلبو انا قفلتك بمليار مفتاح ومستحيل نسمح لحتى وحدة تقدر تتجاوزك
خذا نفس عميق ورجع للقصر
ناضت ليليان تحس في روحها احسن من البارح راحت للدوش غسلت ومشطت شعرها ومنبعد انتبهت لبيجامتها مش نفسها نتع البارح
بدات ترجعلها الذاكرة كيفاه قربت من ايهم وعنقاتو
ليليان: ياربي انا وش درت بقات تضرب في راسها حمارة نتي حمارة كيفاه تعنقيه دوك يقلك راهي ترمي في روحها عليا اوفف
😳😳 مالا هو لي بدلي حوايجي
خزرت فالمراية وجها حمار من الحشمة : اواه لالا هذا مهبول شكون سمحلو يمسني
خرجت من غرفتها رايحتلو طبطبت في الباب مكاش لي رد عليها فتحاتو ودخلت
بقات نخزر في غرفتو غريبة بزاف بصح شابة كلش بالنوار
ليليان: واو غامضة كيفو
ايهم خارج من الدوش لاف منشفة على نصو التحتاني وقطرات ماء يهبطو مع شعرو منظرو كان يقتل 😍 حتى شافها دور في شمبرتو وتهدر وحدها : ليليان 🤨 وش راكي ديري
سوطات ليليان من الخلعة ودارتلو وهي حاكمة قلبها : خلعتني
منبعد خزرت فيه وفتحت عينيها بالكامل 😳: كيفاش تخرج قدامي هكا عريان ماتحشمش
ايهم ببرود : normalement هادي غرفتي لالا ؟!
ليليان دورت راسها : طبطبت فالباب ومكانش لي رد عليا
قلبها عندو وحكم خصلة من شعرها وهدر بنبرة حادة : المرة الجاية كي مايرد حتى واحد عليك روحي ماتفتحيش الباب وتدخلي ، خاطر اكثر حاجة نكرهها واحد يدخل لغرفتي بدون اذني حتى الخدم مايدخلولهاش في غيابي ودوك اهبطي كي الشاطرة استنايني على طاولة الفطور وقوليلي علاش جيتي لعندي
ليليان غاضتها عمرها خزرت فيه عينيها مغرغرين بالدموع ايهم وجعو قلبو بصح هو لازم يقسى معاها شوي ماهوش حابها تتعلق بيه او تحبو وحتى هو حاب يمحي فكرة حبها من عقلو
ليليان نحتلو يدو من شعرها وهبطت راسها وخرجت راحت لغرفتها وبقات تبكي
نروحو للدزاير ⏮️⏮️
قاعدين يفطرو في صمت حتى نطق آسر :
اسر: بابا راني حاب نستشيرك فوحد الموضوع
كمال: نعم ولدي
اسر: كيما علابالك قبل شهرين بعثت لبزاف شركات نتع محاماة خارج الدزاير والبارح شركة قبلتني وراني نخمم نروح
كمال: ااا مبروك عليك ولدي ربي يكملك
ميليسا حكمتها غصة بكاء بصح فرحت لخوها : ياعمري ربي يكمل ان شاء الله
سليمة وجهها حمار : بصح وين هادي الشركة ياولدي تروح وتخليني
آسر : الشركة كبيرة ومعروفة في روما وعندها بزاف فروع حول العالم يتسما رح تفتحلي بزاف ابواب اذا خدمت فيها خير من هنا وزيد يمدولي الدار والطنوبيل
سليمة : بصح تروح تعيش بعيد عليا 😢
كمال : اااي خلاص خلي الطفل يشوف حياتو ويسطر مستقبلو ماهوش صغير
ناضت سليمة تبكي ( مانعرف منين جاتها الحنانة هي بيها بنات ختها يبقاو بايرات كون يروح هو لروما 😂)
ميليسا ماللي سمعت ايطاليا وروما عقلها راح ليليان وانزو 😍
ميليسا : آسر خويا باغية نسقسيك
آسر : وي تفضلي
ميلي: زعما كون ندير طلب في جامعة ثما يقبلوني؟
آسر استغرب من طلبها : كيفاه هادي ديري طلب في ايطاليا ؟ علاش باغية تروحي
ميلي: كيما علابالك القراية لهيه بعييد بزاف علينا يعني كون نقرا فالخارج شهادتي تكون عالية على هنا
كمال : عندك الحق القراية لهيه بزاف خير انا كنت رح نبعثك قبل لفرنسا وماحبيتيش بصح درك كي راه خوك رايح تتوانسو خلاص انا نهدر مع صاحبي راه ثما نبعثلو الورق نتاعك ويسجلك في جامعة خاصة ثما
ميلي سوطات مالفرحة وعنقت باباها : ربي يخليك ليا 🥰
كمال: اصبري يابنتي حتى يقبلوك عاد افرحي 😂
آسر عنقهم : يعني هاذي البغلة تروح معايا وتهبلني 😏
ميلي كشرت في وجهو : علاه ماهوش عاجبك الحال ؟ على الاقل نطيبلك ثما تشتاق لماكلتي
آسر خربشلها شعرها : راني نتمسخر معاك انا مادا بيا تروحي معايا
ميليسا عنقاتو وهي ميتة بالسعادة وطلعت لشمبرتها تعيط ليليان مي ماهزتش عليها رجعت دخلت لgoogel تشوف احسن الجامعات ثما
نرجعو لايطاليا ⏮️⏮️
انزو : اسمعوني مليح تصرا غلطة نخسر عليكم رصاصة في الراس
مانحبش الذبانة تسمع بالعملية .. الذبانة فهمتووو 😡
الحراس: حاضر بوس
لارا هازة سلاحها في يدها تلعب بيه : معناها انا نروح نوجد روحي ونروح للوتال قبلكم
انزو : اسمعي لارا احرزي روحك مليح ميشال ماهوش كيما مورو ماهوش ساهل .. غير يدوخ حطي المسجل هذا في البوشات نتع التلفون ومدلها مايك بزاف صغير
لارا : لالا انزو في البوشات منيتك قادر يطيح ولا يشوفو
انزو : هكا باش ماتطوليش حنا اصلا نحتاجو غير الهدرة نتاعو في الاجتماع نتع the tigers الباقي مايهمش
لارا : ماتخافش انا نعرف وين نحطو
انزو: صحا احرزي روحك ومين تلحقي شعلي البلوتوث كون تصرا حاجة ولا نعرف نتصرف
لارا : ok مهني
عند ايهم 🤍🤍
هبط للتحت مالقاهاش سقسا الخدامة قالتلو ماهبطتش من غرفتها وبلي كي راحت تعيطلها حاوزتها وكانت تبكي
ايهم : اااوووف ياربي كيفاه ندير معاها انا هادي
طلع عندها لشمبرتها جا يفتح الباب لقاه مسكر بقى يطبطب
ليليان: روحي خلااص ياك قلتلك مانيش حابة نفطر
ايهم : ليليان افتحي الباب
ليليان ساكتة
ايهم : قلتلك افتحي لا نكسررو
ليليان فتحتلو ودخلت تغطات وغطات راسها
ايهم دخل شافها هكا جاتو الضحكة دير عفايس نتع ولاد صغار 😅
جبد عليها الغطا وهي مزالت مدخلة راسها فالمخدة وماهيش حابة تشوف فيه
ايهم : هيا نوضي نفطرو
ليليان ساكتة
قعد ايهم بحذاها ودورلها وجهها عندو وشاف فعينيها حمورة قسمتلو قلبو : علاش كنتي تبكي
ليليان تقول قاللها زيدي ابكي هبطت راسها وزادت فالبكاء حتى ولات تشهق
عنقها ايهم ويمسح على شعرها : خلاص اسمحيلي مكانش قصدي نعيط عليك ( استناااو ايهم يطلب السماح 😳) بصح انا هكا مانحبش لي يدخل لغرفتي بلا اذني
ليليان: انا مكانش علابالي وطبطبت وانت ماسمعتنيش 😢
ايهم: وانتي علاه جيتي لغرفتي
ليليان بعدت عليه وهبطت وجهها وبقات تلعب بصباعها
ليليان: ااا انا كنت
ايهم يبعدلها في شعرها : اممم كنتي واش
ليليان : انا كنت رح نسقسيك اذا انت لي بدلتلي حوايجي
ايهم تبسم على جنب : ايه انا
ليليان حمارت وتلونك بڤاع الالوان : كيفااه ؟؟!!😳
ايهم: ماتخزريش معايا هكا طلعتلك الحمى البارح وكان لازم نديرك تحت الدوش باش تهبط وش حبيتي نخليك مبلولة باش تزيدي تمرضي ماتنسايش راكي امانة عندي
ليليان سكتت وهبطت راسها
ايهم :هيا نوضي تفطري
ليليان : نبدل حوايجي ونجي
خرج ايهم وليليان بقات تتلمس في وجهها وشبيها كي يشوف فيها تحشم منو وكي يقرب منها قلبها يدق بسرعة حتى تخاف يعودو يسمعوه
ناضت بدلت حوايجها وهبطت لقاتو يستنى فيها قعدت تفطر وهوما ساكتين حتى نطق هو
ايهم وهو يخزر في الصحن نتاعو وياكل : ليلي
ليليان : شرقت وحصلتلها الماكلة مدلها الماء (استغربت كيفاه عيطلها ليلي)
ايهم تبسم وقال :وشبيك ؟
ليليان :حصلتلي برك وكملت تاكل ايه وش كنت حتقول ؟
ايهم : المهم راهم قبلوك فالجامعة باش تبداي تقراي الشهر الجاي الطب
ليليان تبسمت حتى بانو ضروسها : صح merci ايهم
يتسما غير نبدا نوجد نشري صوالح 😁
ايهم : دوك اذا كملتي تاكلي نوضي معايا
ليليان : وين
ايهم : علابالك مانحبش لي يسقسيني بزاف
ناضو يمشو وهي وراه حتى قرب من وحد الباب قريب على غرفتها فتحو ايهم ودخلو
كانت la chambre عبارة عن bureau وين تقدر ليليان تقرا فيه مكتبة كبيرة معمرة كتب نتع التخصص نتاعها وديكور يهبل des cadres مرسوم فيهم قلب وجسم الانسان واقلام بكامل الالوان و des cahiers مرسوم فيهم اطباء و pc و ipad وكامل وش تحتاج في القراية وفالحيط كاين اسمها بخط كبير وبحذاه سماعة نتع طبيب بالمختصر كان المكتب هذاك خياللي 😍😍 ( اتخيلو وخلاص🙄)
ليليان عينيها ولاو قلوبة وتعمرو بالدموع بزااف فرحت بيه وعمرها لاكان عندها غرفة هكا دارت عند ايهم وخزرت فيه منبعد سوطات عندو عنقاتو بقوة وحتى هو بادلها العناق بقاو وقت وهوما هكاك وهي تضحك بالصوت حسها فرحت من قلبها فرح حتى هو
ليليان : merci merci merci ايهم والله خيرك ماننساهش طول مانا عايشة
ايهم : بلا مزية دوك انتي لازم ديري لي عليك وتوريني شطارتك فالقراية ok
ليليان ابتسمت وقالت: ان شاء الله
خرج ايهم من القصر رايح للشركة وليليان بقات دور وتسوطي وتشوف فbureau نتاعها
بعد مرور ساعات 🌑✨
ميليسا كانت قاعدة حتى وصللها ايمايل من جامعة ايطالية : فتحاتو وحلت عينيها بفرحة قبلوووونييي ياربي قبلونييي بقات تعيط تسوطي فوق الفراش حتى دخل باباها وخوها ومرت باباها
آسر : وشبيك ميلي هبلتي ؟!!
آسر : خويا قبلوني في الجامعة خلاص راني جايا معااك 🥹🥹
كمال : اا مبروك بنتي بعثت الايمايل نتاعك لصاحبي علابيها تواصلو معاك نتي الاولى ربي يكملك ويوفقك وينجحك ونشوفك فأعلى المراتب يا اميرتي
راحت تجري عنقت باباها وخوها
سليمة: كيفاه كمال معول تبعثها منيتك ؟!! ولهيه بلاد الكفار والخامجات تزيد تضيعلك
ميلي خزرت فيها وفتحت عينيها : وش راكي تقولي
آسر :يما ميلي رايحة معايا مارح يصرالها والو ولا تشوفي فيا مانيش راجل حتى نخليها على هواها وزيد ندير فيها ثقة
كمال : بنتي انا وراني علابالي وش ربيت خلاص ميليسا بنتي نتوما وجدو رواحكم هديك هي غدوة طيارتكم انا راني وجدتلكم كلش
راحت ميليسا تبدا توجد حوايجها اخييراا رح تتحرر من مرت باباها وتعيش وتقرا كيما حابة
⏮️⏮️⏮️
عند لارا وجدت روحها لبست روب حمرا على الطاي نتاعها وحطت كحل تحت عينيها الزروقا طلقت شعرها زادت البارفان وخرجت تمشي وتتمايل في الكولوار حتى سمعت صوت ميشال يهدر في التلفون وهاز كاس فيدو
رجعت للور تخبات كي قرب باه يلحق عندها خرجت وخبطت فيه ساح الكاس نتاعو على روبتها ( دارتها عمداً باه تلفت الانتباه)
لارا تعيط : ااا وشبيك ماكش تشوف
ميشال بصوت عالي : راكي علابالك مع شكون تهدري نقصي صوتك
لارا زادت فالعياط : مايهمنيش شوف وش درتلي في حوايجي 😡
ميشال عجباتو قوتها تبسم على جنب : مانتبهتش عليك ونتي خرجتي فوجهي ارواحي معايا
لارا : ماعندي وين نروح معاك وخزرت فيه وهو غرق في بحر عينيها
ميشال : ارواحي نشوفو كيفاش نظفولك la robe هكا نصحح غلطتي
مشات لارا معاه وانزو يسمع كلش من البلوتوث
دخلو للغرفة نتع ميشال وقالها تروح للدوش ومدلها chemise من عندو تلبسها حتى ينشفو حوايجها
دخلت بقات تحوس كاش ما تلقى منبعد جبدت الابرة السحرية 😅 كانت في طالون نتاعها عمرتها وخباتها داخل الكم نتع الchemise وخرجت
شافها ميشال عقلو تخطف 😍 بقى باهت في زينها وهي رايحة جاية قدامو ( زعما تستنى ف la robe حتى تنشف )
قرب عندها وهدر : وش رايك نشربو كاس قبل ماتنشف la robe خير من تبقاي رايحة جاية
خزرت فيه لارا منبعد حركت راسها بمعنى ايه
راح هو يوجد الكيسان وغير دار هي غرزت الابرة فرقبتو طاح فبلاصتو ( الابرة هادي بعد مايفيق مارح يتفكر والو ) حكمت تليفونو فتحاتو كامل من الداخل ودخلت المسجل الصغير ورجعت صكراتو ورجعاتو لبلاصتو
لارا : انزو
انزو: وي لارا راني معاك
لارا : شوف اذا كاين اشارة من المسجل
انزو : ايه لارا كاين راني نسمع مليح تقدري تخرجي
عاودت لبست حوايجها وهزت معاها chemise هاذيك وخرجت تجري
في تفس الوقت الحراس نتع انزو كانو مشغولين يمسحو les vidéos من الكاميرات نتع الاوتال ومايخلو حتى آثر موراهم وواحد فيهم دخل عند ميشال وحطو فوق السرير باش مين ينوض يحسب روحو كان راقد ونظف المكان ماخلا حتى اثر
ركبت لارا مع انزو فالطنوبيل وبعدو على الاوتال وبقاو يستناو حتى جاهم صوت من غرفة ميشال عرفوه ناض
هز ميشال تلفونو شاف الساعة : ااووو طولت الاجتماع بعد 5 دقايق هز الفيستا والتلفون وخرج في طنوبيلتو الى وجهة مجهولة
بقاو انزو ولارا يتبعو فالاشارة ويمشو موراها
حتى دخل ميشال للبلاصة لي فيها اجتماع مافيا the tigers سجلو كامل الهدرة والمخططات لي رح تندار وراحو
لارا : واخيرا كنت خايفة يعرفني
انزو : راهم ناويين يديرو هجوم على القصر مالا لازم نوجدو رواحنا
لارا : قصر ايهم حتى ولوكان معلابالناش بهادي المعلومة دايما واجد للدفاع
حتى عيطلهم ايهم
ايهم : انزو وش درتو فيها
انزو : كلش كيما حبيت جبنا التسجيلات دوك نبعثلك اسمعهم وراهم رايحين يهجمو على القصر
ايهم تبسم : Meraviglioso ( رائع بالايطالية) تستاهلو تجو تتعشاو عندي غدوة انت ولارا
لارا : اا البوس ايهم بشحمو ولحمو يعرض فيا 😅
بقاو يضحكو هي وانزو
ايهم : لالا وقيل نبطل خلاص
لارا وانزو : لالا نجو رانا نڤسرو
كوبا ايهم وعيط للخدامات قاللهم على عرضة غدوة باه يوجدو كلش
في اليوم التالي 🌞:
ناضت ليليان على صوت تيليفونها يصوني :
ميليسا: ليلي صباحووو
ليليان وهي تتثاوب صباح النور لباس
ميليسا: اووو مزلتي راقدة البارح حرقت التلفون عليك ماكنتيش تردي المهم حبيبتي راني جاية لايطاليا باش نعيشو ثما انا وآسر
ليليان: استناي بلعقل فهميني
ميليسا حكاتلها
ليليان: ياعمريي 🥺 على الاقل تونسيني ونروحو كيف كيف نفس الجامعة انا وياك
ميليسا : اااا صح هيا مالا خير وخير
ليليان كون تشوفي لبارح ايهم وجدلي وحد la chambre وين نقرا تهبل
ميليسا: ياعمري شحال هايل هذا السيد نجي نعيش معاكم وقيل 😅 صوري وابعثيلي
ليليان : دوك نبعثلك المهم قبل ماتركبو فالطيارة عيطيلي ولا ابعثيلي ميساج ماتنسايش
دخل آسر: هيا ميلي راح نطولو
ميليسا : هيا باي رانا رايحين
ليليان : طريق السلامة
قفلت التلفون وهي ميتة بالفرحة شحال توحشتها مع انو ما عندهمش مدة ملي تفارقو
ناضت دوشت وجبدت شعرها وهبطت باش تفطر حتى شافاتو هابط
ايهم استغرب موالف دايما هو قبلها فالطابلة
ايهم : صباح الخير
ليليان : صباح النور 😊
ايهم : راني نشوف فيك فرحانة خير
ليليان: ايه اليوم ميليسا وآسر جايين هنا لروما راح يستقرو هنا وميلي رح تقرا معايا فنفس الجامعة
ايهم : اا مليح هكا ماتحسيش روحك وحدك
ليليان : ايهم
ايهم وهو ياكل: همم
ليليان : معليش كي يوصلو نروحو نجيبوهم من المطار
ايهم خزر فيها : اوكي
صفقت ليليان بيديها وطلعت لغرفتها باش تشوف وش تلبس اما ايهم قال للخدامات يزودو زوج اطباق لزوج ضياف وحدوخرين ليوم للعشاء
عيط تلفونو :
ايهم : وي انزو
انزو : وي بوس الشحنة برك ليوم راهي لحقت اذا حبيت تجي تشوف
ايهم : اوكي دوك نجي اسمع ليوم جايين ميليسا وخوها جيران ليليان نحبك تروح مع ليليان انا مانيش لاهي ليوم
انزو وهو مبتسم : اوكي مكانش مشكل
قطع ايهم وانزو مات بالفرحة ومتشوق باش يشوفها 🥰
بعد مرور ثلاث ساعات:
طلعت لخدامة لليليان تخبرها انو انزو جا باش يديها للمطار لانو ايهم عندو خدمة
جهزت روحها حطت شوي مايكاب ورشت من البارفان نتاعها هادي اول مرة تتحف من لما ماتو والديها مع انو كانت فقيرة بصح تعرف تلبس وتخيط لبستها وحدها
lilyane outfit
