انزو : ايهم ... ايهم ابقى فاتح عينيك
هزوه الرجال وحطوه فالطنوبيل وطارو بيه للسبيطار
اما ليليان هزها آسر دايها عند ميليسا علابالو بيها تشوكات وماهيش رح تقدر تزيد تهدر فموقف كيما هذا وخاصة بعد واش صرالها
انزو : لارا روحي مع ليليان وآسر ممكن يلحقوكم رجال مورو وانا راني مع ايهم
هزت لارا براسها
وركبت مع آسر وقلعو
لارا حاكمة يد ليليان : ليليان اهدري وشبيك ..
آسر : خليها هي كي تتصدم يصرالها هكا دوك شوي وترجع كيما كانت
حراام هذي الطفلة وش شافت فعمر صغير والله بزاف عليها
لارا : وش حكايتها ؟
آسر: حكايتها طويلة .. خلي تفوت هادي المحنة ونحكيلك وكملو يمشو بسكات
⏮️⏮️
دخل انزو للسبيطار يعيط
و الطبة ميتين بالخوف علابالهم شكون ايهم وكون تصرالو حاجة وش ممكن يصرالهم
حكم انزو الطبيب من الطابلية نتاعو : والله وماتخرجوش سالم .. لا انت ولا عايلتك رح تبقاو حيين
دخلوه لغرفة العمليات وبقى انزو برا حاكم راسو حتى عيطلو خوه
آرون : وي انزو وش درتو
انزو : جبنا ليليان بصح ايهم تصاوب وراهو فغرفة العمليات
آرون : كيفاه !؟؟ووين جات الرصاصة
انزو بيأس : قريب لقلبو
آرون : ان شاء الله ما يصرا والو خويا انا نجي في اول طيارة مالا مانقعدش
كوبا انزو وجمع فالارض حاكم راسو خايف على ايهم بزاف خاصة انو موالف ميتأثرش كون تضربو رصاصة ينحيها وحدو بصح هادي المرة جات فبلاصة خطيرة
وصلو آسر ولارا هبطو وحكمو ليليان يمشو فيها بالعقل وهي لاحياة لمن تنادي غير منظر ايهم بين عينيها و كيفاش كانو كامل الرجال ميتين قدامها والدم في كل بلاصة
فتحتلهم ميليسا بزربة غير سمعت صوت الطنوبيل
غير خرجت جرات عند ليليان تعنق فيها وتبوس وعينيها مليانين دموع اما ليليان عقلها في عالم اخر
خزرت في خوها و دخلتها بسكات علابالها تأثير الصدمة دالرها هكا وسبق وصراتلها نفس الحالة في موت والديها
داتها لغرفتها كسلتها وغطاتها وخرجت
ميليسا ودموع في عينيها : آسر وش صرا وين لقيتوها
آسر : لقيناها مخبيينها فدار فالجبل بصح أيهم تصاوب برصاصة
ميليسا: كيفاش : ودوك راهو مليح !؟؟
آسر : والله ماعلابالي جينا ديراكت هنا وهو داوه للسبيطار
لارا: اوفف حتى انزو مش يهز عليا
اسمع آسر انتوما ابقاو هنا نبعثلك رجال زيادة ممكن رجال الكلب هداك يكونو تبعونا
وانا نروح نشوف وش صرا
ميليسا : استناي حتى انا نجي معاك
آسر مستغرب : وعلاش تروحي انتي ؟
ميليسا تعقد لسانها (هي رايحة غير علاجال انزو 😅): لالا معليش نروح معاها والله هوما المرة لي فاتت غير حساسية وشفت كيفاه ماخلاونيش
آسر : وكون تنوض ليليان ؟
ميليسا : عطيتها مهدئ ماهيش حتنوض حتى الصباح خليها ترتاح شوي لي فات عليها مش قليل
خرجو ميليسا ولارا ديراكسيون السبيطار
غير دخلو سقساو عليه قالولهم مزال فقاعة العمليات
طلعو عندو لقاو انزو قاعد فالارض
لارا: انزو كاش خبر على ايهم ووش حيديرولو ؟
انزو : ماعلاباليش دخلوه في ساعة ومكان حتى خبر
وخرج للجاردان نتع السبيطار حاس روحو مخنوق فكرة انو يفقد ايهم مستحيل يتقبلها طلع راسو للسماء نزلت دمعة من عينو 😢 كي تفكر ذكرياتو معاه صح انسان قاسي بصح وقف معاه هو وخوه ويعتبرو خوه لكبير تعلم كلشي على يدو بعد ماكان انسان ضعيف شخصية
flash back ⏮️
بالتحديد فالمدرسة الداخلية فإيطاليا
انزو يبكي : اي نحي طونوبيل نتاعي شراتهالي ماما قبل ماتموت رجعهالي 😢
اسكافي : اا خلاتهالك ماماك ههه شوفو كيفاش نديرلها ... حكم الطنوبيل وعفس عليها حتى تفتت
والولاد الباقيين قعدو يضحكو
حكم اسكافي انزو من تريكوه : روح لماماك اشكيلها صحا
حتى حكملو ايهم يدو ودورهالو خزر فيه : تزيد تحط يدك عليه نقتلك فهمتت
اسكافي : اووو شكون راهو يدافع عليه ، المتوحد نتاعنا طلعلو صوت
زاد ايهم دورلو يدو بقوة حتى سمع صوت كسر
طاح اسكافي يعيط فالارض
ايهم حكم انزو من يدو : راك مليح ؟
انزو : امم بصح طونوبيلتي تكسرت ☹️
حكمو ايهم من يدو وهز الطنوبيل قعدو وبقا يحاول كيفاه يلصقهالو بالسكوتش
خير من والو
آرون: انزو ... يا انزو
انزو : راني هنا آرون
آرون خزر فيه ومنبعد خزر فأيهم : هيا انزو ماتقعدش هنا
انزو : علاش ايهم هو لي ضرب اسكافي كي كسرلي طونوبيلتي و شوف خدمهالي
flash in ⏭️⏭️
مسح دمعتو لي طاحت حتى حس يد تحطت على كتفو
ميليسا : راك مليح !؟
دارلها انزو وهدر بيأس : كيفاش راكي تشوفي فيا
ميليسا خزرت في عينيه : رح يرتاح ماتخافش
هزت يدها حطتها على وجهو : انت تعرف ايهم كثر مني وعلابالك شحال هو انسان قوي
نحالها يدها من وجهو وعنقها بقوة الحاجة الوحيدة لي كان محتاجها هي انسان يواسيه ويخفف عليه وميليسا مكانتش من العاكسين بادلاتو و بقاو مدة وهوما هكاك حتى سمعو لارا تعيطلهم راحو يجرو
انزو :اهدري خرج الطبيب
لارا وهي مبتسمة : ايه خرج وقالك العملية نجحت وراهو مليح
عنقها انزو وبعد عليها راح للبيرو نتع الطبيب
انزو : قولي كيفاه حالتو
الطبيب:حاليا حالتو مستقرة الحمدلله انو الرصاصة ماتوشاتش القلب نحيناها وحطيناه فالعناية المركزة ، لانو نخافو تصرا مضاعفات ان شاء الله مايكون غير الخير وربي يجيب الشفاء
شكرو انزو وخرج بقاو يتفرجو مع ايهم من الزجاج برك
