وثــــاق الثـــعـــلـــب الأبـــيـــض🦊❄️|🇲🇦

🦊رفــــيــــقــــة الكــــيــــتــــســــونــــي🦊|2

دخل شهر 12 و ميساء باقة على نفس الحال لا هي لا ثعلوب لي مابقاش رجع لعندها حتال واحد النهار مميز...

كانت جالسة تتقاد فواحد الحلوة تتصوب بالعجينة المورقة لي تيتصوبو بيها المخبوزات و الميلفوي شراتها ديجا جاهزة باش توفر عليها الخدمة ديالها..قطعاتها على شكل مروحيات سميتهم Joulutortut لي معناها "نجوم عيد الميلاد" الميلاد هنا المقصود بيه الكريسماس..خرجاتهم من الفران فاش غيبردو غتعمرهم من الوسط بالمعجون د البرقوق و ترش عليهم سكر كلاصي من الفوق...

وسط داك الصمت و الهدوء تسمعو قطرات المطر لي كيف سمعاتهم هزات راسها نيشان فالسلك د النشير على برا لي نشرات فيه بعض الأغطية يتهواو...

حطات كاع لي فيديها و مسحاتهم بالسريبتة حتى جرات بخطوات سريعة تتجمع فيهم قبل مايفزكو مزيان و دخلاتهم...

رجعات خرجات تتشوف فأشعة الشمس بإستغراب...الشتا تطيح و البرد و الثلج و الشمس..جاها جو غريب و هادو كاملين مجموعين دقة وحدة بينما هو كان بحال شي جمرة شاعلة بالسخانة...

أيام و هو طايح فالفراش بالحمى لي تتسري فالجسد ديالو كاملو...الحمى لي ماتقدر تبرد أبدا الا و هي ديالو و فملكو هادشي لي مابغاهش لأنها حتى ماعارفاهش ماحساك توصل معاه لهاد المرحلة لي تيطمح ليها هو فقرارة نفسو واخا عياا ماينكر عيا ما ينسي راسو ولكن ماقدرش ابدا!!...

ناض بزز حتى حل واحد المجر هز منو صنيديقة عامرة بخرز حجر الجايد فجميع ألوانو..بدا تيهز حبة بحبة تيركبها فالخيط الخاص حتى شكل بيهم سوار ملون...

كانت جالسة فلاطيراس مستمتعة بالمطر و دوك الأجواء الباردة و هي ملوية فغطاء غليض و سخون حتى سمعات شي خطوات جايين من الغابة...

بقا الصوت غادي و تيقرب حتى لمحاتو جاي عاض على شي حاجة تتلمع ففمو...

ناضت بلهفة قاصداه بخطوات سريعة وسط ديك الشتا..و ديك أشعة الشمس لي تسلطات عليهم بجوج كأنه مؤثر سينيمائي...

بدات تتقيس فالفرو ديالو الأبيض و هي فرحانة فاش شافتو و مرتاحة فاش تأكدات بلي ماوقعات ليه حتى حاجة طول مدة غيابو في حين هو كان ماد ليها السوار و عينيه على عيونها اللامعة و هي شاداه من عندو بإعجاب: اوووه هذا ليا؟!!!

حرك ليها راسو بالإيجاب...

دارتو دغيا فيدها فرحانة بيه: اوووه فوكسي تتعرف شناهوما الهدايا احسن من شي رجال! ولكن منين غيجيك؟ هههه

حرك ذيلو عاجبو المدح ديالها و عاجبو انها عاجبها و قبلات بيه...

عنقاتو ببراءة و هو مخشي فيها حتى بعداتو بشوية بإستغراب: واش فروك لي دافي ولا حرارتك عالية؟ (حدر راسو) اجي معايا ندخلو للدار