1
The highest form of love is to be the protector
of another person's solitude.
―Rainer Maria Rilke
ta iti laeng tapok, iti laeng dapo-
no daytay kimraangen ti nagrupsa a bagi
a dinudog ti adu a liday ken batibat,
ken no daytay limpaagen ti apuy
ket uray beggang la koman
a mabati ket marunoten
uray iti laeng agsasadut a pug-aw
ti awan maaramidannan nga anguyob,
iti laeng tapok, iti laeng dapo
- a rumkuas ti lagip: rakemek
ti tapok, akupek ti dapo,
imermerko, iwarisko iti rupa
ti bulan nga itan dua, singin
a timpuar iti no sadino a laud ken daya:
bulan a bulanta met laeng,
rupa a rupata met laeng,
ket sadiay, iti mabukel a pitak
iti rupa a sibogan ti lua,
itukitta dagiti naganta
ket urayenta nga agrusing manen,
dagiti napukawta nga ima ken dila.
2
Let me take you down
'Cause I'm going to Strawberry Fields
Nothing is real
―The Beatles, Strawberry Fields Forever
allawatek dagita babassit nga imam
mamigpigerger, agar-arimasa
iti alikaka, iti segga, aglamlamiis: saan
met nga iti palpi ti lammin
wenno iti bisito ti lam-ek,
adda naisupadi a bara a kimmutukot
idi aglantip dagiti dakulapta,
idi kumpetka kaniak
tapno bumaddekka iti pitak,
iti daga, a nakaitugkelan ti mukodko,
binabasa ti aglabaslabas a tudo,
nakilnet, nasupnet ti nalabaga
a pila, maimalamal iti tugot
a punasen ken lilibegen
ti umay manen nga arbis.
intan sadiay kapanagan
ta inta 'yinudo iti dadang
ti naanem-em a sang-aw
ti mabisibisan a daga
dagitoy din aginnibbet,
kumkumter, nga im-imata.
BINABASA MO ANG
BAGI: dandaniw
PoetryNapili a dandaniw iti Ilokano ni Roy Vadil Aragon (Selected Ilokano poems by Roy V. Aragon)