We do not go, return, or know.
With eyes closed, we simply exist.
―Pablo Neruda
Batokek ti kasipngetan iti nairut a panagkidemko
ket agkaradapak a mangapros iti napardas nga angesmo,
kas iti panangperrengmo iti alintataom kaniak
kadagiti agkarkarawa pay laeng iti sukog ken maris
nga inka panangmatmat: sipsiputam ti lawag
ken dagiti puraw ken nangisit nga agkikinnawiwit
sadanto in-inut a maukas, marignas a pusasaw,
kumuskusnaw, agus-uspak, madalupo a dapo.
Dapo, a naipadaga, manipud iti naarinuknok a dalipato.
Dapo, a narugnay manipud iti napaksuyan a beggang.
Sikikidemak, simumulagatka: aglinlinnasinta.
Iti sipnget, agay-ayamta: linnemmengan, innalaan.
Alaek ti rimat dagiti bigatmo, alaem ti kudrep ti rabiik.
Pikpikek ti umsiag nga ibitmo, mingmingam ti tuglepko.
Iti bukodmo a sipnget, agsursuroka a mangtiliw iti sellag.
Iti daytoy nalusiaw a lubong, kadagiti di agul-ules
a parbangon, agkapetka iti aglanang a nagsinsinanta a pudot.
Pudot, a dadang ti agnanayon a pakasaritaan ti tinnibnok.
Pudot, nga anem-em ti banios ti di agsarday nga apros.
BINABASA MO ANG
BAGI: dandaniw
PoesíaNapili a dandaniw iti Ilokano ni Roy Vadil Aragon (Selected Ilokano poems by Roy V. Aragon)