1
papatayennak
ngem saanak a matay
ta no kasdiay
a pugsatem ti angesko
isilpom met
laeng ti pinugsatko
nga angesmo
kasanota ngarud
a matay?
saanen a maisubli pay
ti binulbulod a puyot
ta saanen a nasken
a padawatanka manen
iti paragpag
2
bay-am nga iti panagkatangkatangta
nga agtatapaw iti pideg ken pandag
ti tagainep, agpallailangta
iti nangisit nga ul-ulep a kaduata
dagiti nagtagipayak a bayyek idinto
nga ul-ulsannata ti ling-et ti parbangon
appupuenta dagiti kulibangbang nga agdisso
iti barukong ken bibig, ipusenta
dagiti lames iti paglanglangoyanta
a law-ang iti lulonan ti bulan, kanenta
a saggaysa dagiti purdotenta a petalo
ti raya ti sumirip nga agsapa, ab-abanta
ti diro ti init iti rabaw ti sarming
a lipnok, dilpatanta ti duri ti bannawag
tapno agarko ti bukotna a mangkamat
iti anangsabna, agingga a madalupo
nga agkukot a mailibay a kepkepna
ti nargaan a riingna
kukuata metten, no kua
kukuatan ti angesna
a kasukat ti ipulangta
ti ipulangtan a kararua
3
bay-am a rabawannata
ti agallikubeng a riwet
iti daytoy awan malmaltiingna a parbangon
ta dita met kayat ti agules iti agandap a kepkep
ketdi ngarud, lunagenta amin a kawes
amin nga abbong, amin a balunet, amin a palimed
amin-amin
malaksid iti kudil, malaksid iti lasag
bay-am
baybay-am
bay-am a lumteg, bay-am nga agkabiteg
kudkodek ket kudkodem amin a balikas
amin a samiweng a kabaelan ti karabukob
amin a dayyeng a kabalinan ti dawatdawat
danggayanta iti agpipinnulipol nga arasaas
mangararagta iti maminribu nga itatangad
aglualota iti di mabilang a panagparintumeng
bay-am
baybay-am
a mauyos amin a tinukel ti ling-et ken binukel
ti rosario a kadata nakaiposas
ikompesarko ti amin a tinungpalko a bilin
subbotennak iti amin a basol ti lubong
pakawanennak
pakawanennak
ilansanak iti dakulapmo
ilumlomnak iti pus-ongmo
isalapaynak iti krusmo
kunak kenka ita met la a bigat
ita nga awan manamnama a banatabat
kaduanak iti paraiso
BINABASA MO ANG
BAGI: dandaniw
PoesíaNapili a dandaniw iti Ilokano ni Roy Vadil Aragon (Selected Ilokano poems by Roy V. Aragon)
