Agur-uray ti darat
a sedseden dagiti dapan
ken bukotta. Ipayatta ti malem
iti aplaya a sibsibogan ti burek
ken lunlunagen ti arimbainen
a darang nga ibatbati
ti tumartarabang nga init.
Ditan buyaen ti panaglemmengna
iti lingka ti baybay ken laud. 'Yiddata
ti sumipnget iti agbabbabasa
a riniwriw a puling, riniwniw a rinet
ket aginnunata nga agtiliw iti kidday
ken rissik iti dumapdapon
a langit: "Kuak daydiay! Kuak
daydiay kadakkelan! Daydiay pay,
kuak daydiay karimatan! Saan,
kuak daydiay, siak ti inna kitkitaen!
Kuak, kuak, kuak dagidiay!
Kuak, kuak, kuak met dagidiay!"
Agrirririta a nakaidda, nakatangad,
mangitudtudo iti nagbalinsuek a langit,
agin-innagaw iti tunggal sangkapirit a lawag
a sumiray iti agpampanes a lubong.
Pumudpudot met ti pinandaganta a darat,
ket ti dalluyon a manggawgaw-at
iti naginnurnos a dapanta, ibugbuggona
ti bara a kasla manglamaw iti kimpet
a pipikel ken tapok kadagiti mukod.
Agur-uray ti rabii nga agmaymaysa
a mamaspasungad iti kidem a bulan.
Pabus-oyanta ti darat, maturogta
a sipupuling iti rinet, sibabalkot
iti apgad, napanaas dagiti mata,
uray ditan makariing.
BINABASA MO ANG
BAGI: dandaniw
PoetryNapili a dandaniw iti Ilokano ni Roy Vadil Aragon (Selected Ilokano poems by Roy V. Aragon)