TAINIC
Part 3
"အိုး....ရှေးဟောင်း အိမ်ကြီးပဲ ဒါက ဝါး...တကယ် မိုက်တာ..."
ရင်သပ်ရှုမောချင်စရာ ရှေးဟောင်းအိမ်ကို ကြည့်ပြီးနောက် အန်ဒရူးရဲ့ ရေရွတ်သံတွေက ဆူညံလို့နေသည်။ တကယ်ပဲ သူတို့ထင်မထားလောက်အောင် အိုဟောင်းနေတဲ့ အုတ်ခံ နှစ်ထပ်အိမ်တစ်ခုက သူတို့ရှေ့မှာ ထီးထီးကြီးရပ်တည်လျက်ရှိလို့နေသည်။ အနည်းငယ်မတ်စောက်နေသော တောင်ကုန်းပေါ်မှာ ဆောက်ထားတဲ့ ဒီအိမ်ကြီးက ဟိုးဝေးဝေးက လှမ်းကြည့်ရင်တောင် ပြတ်ပြတ်သားသား မြင်ရသည်။ အပြင်ပိုင်းပြုပြင်ထိန်းသိမ်းမှုရှိမထားသောကြောင့် အိုဟောင်းညစ်မဲကာ အောက်ခံဆေးသားအရောင်ပင် သေချာခွဲခြားမရ။ ဦးလေးကြီးပေးတဲ့အိမ်လိပ်စာက ဒီအိမ်ဆိုတာအသေအချာပဲ။
သူတို့စိတ်လှုပ်ရှားစွာ အိမ်ထဲကို ဝင်ကြည့်ကြသည်။ ဦးလေးပြောပေးထားသည်ဆိုသည့် နယ်ခံလူလတ်ပိုင်းတစ်ယောက်က သူတို့ကို တံခါးမကြီး သော့ဖွင့်ပေးသည်။ အနည်းငယ်မှောင်နေသော အိမ်အတွင်းပိုင်းက အပြင်လောက် အိုဟောင်းမနေပေမဲ့ ရှေးလက်ရာတွေတော့ ပြည့်နှက်လျက် ရှိနေသေးသည်။
"လူမနေပေမဲ့ သန့်နေသားပဲ...."
ဂျောင်ဆူးရဲ့မှတ်ချက်ကို နယ်ခံလူက ကျေနပ်သွားသလို ဂုဏ်ယူပြုံးပြုံးလိုက်သည်။
"သခင်လေးက အိမ်ဆိုသန့်နေမှကြိုက်တာလေ..."
"သခင်လေးဆိုတာက..."
"ဒီအိမ်ကြီးကို ဟိုးနှစ်ပေါင်းများစွာက ပိုင်ဆိုင်ခဲ့တဲ့ ပိုင်ရှင်ပေါ့
ကျွန်တော်က အိမ်တော်ထိန်းမျိုးရိုးက ဆင်းသက်လာတာလေ
ဒါကြောင့် ဒီအိမ်ကိုဆက်ထိန်းသိမ်းဖို့တာဝန်က ကျွန်တော့်ဆီမှာပေါ့..."
"ဒါဆို ကျွန်တော်တို့နေဖို့ အဆင်ပြေသွားတာအတွက် ခင်ဗျားသခင်လေးကို ကျေးဇူးတင်ရမလား"
"မဟုတ်တာ...."
နယ်ခံလူငယ်က ရယ်ရယ်မောမောပြောလျက် သူတို့နေရမည့်နေရာကို လိုက်ပြပေးသည်။ အိမ်ပေါ်ထပ်တစ်ခုလုံးကို စိတ်ကြိုက်နေခွင့်ပေးထားပြီး အစားအသောက် ပြင်ဆင်ချက်ပြုတ်ရန်တော့ အိမ်အောက်ထပ်ရှိ မီးဖိုခန်းကိုသာ သုံးစွဲလို့ရသည်။ ရာသီဥတုက စိုစွတ်မှုများသောကြောင့် အောက်ထပ်တွင် စိုထိုင်းစများပြီး နံရံများတွင် ရေငွေ့ပျံတတ်သဖြင့် ညအိပ်ဖို့အဆင်မပြေကြောင်းလည်း ရှင်းပြသည်။
အခန်းပြတင်းများကို ဖွင့်လိုက်ပြီး သိပ်မကြာခင်မှာပဲ အနည်းငယ် ထိုင်းမှိုင်းနေမှုများက လန်းဆန်းသွားပြီး လေဝင်လေထွက်ကောင်းလာသည်။
ESTÁS LEYENDO
T A I N I C
Fanficမင်း...ကိုယ့်အကြောင်းကို သိလာလေ မင်းက ကိုယ်နဲ့ ပိုနီးစပ်လာလေပဲ 🖤 မင္း...ကိုယ့္အေၾကာင္းကို သိလာေလ မင္းက ကိုယ္နဲ႕ ပိုနီးစပ္လာေလပဲ 🖤 Park Chanyeol X Doh Kyungsoo Unicode + Zawgyi ✨
