خفايا أنثى

البارت السابع

خفايا انثى
البارت السابع
هند الصالحي
...................
خلقت الأنثى لتكون أما
لكن ليس كل أنثى  هي أم
.....

الأم هى كل شئ فى هذه الحياه هى التعزيه فى الحزن، الرجاء فى اليأس والقوة فى الضعف ...

الأم تصنع الأمة ...

الأم التي تهز السرير بيمينها تهز العالم بيسارها ....
وهناك ام تقتل اولادها وتطأ بقدمها عليهم من اجل ان تصل لمصالحها الشخصية
.......

سراء.. وهاي خلصت قصتي من يوم وعيت على الدنيا لحد الان.. واكو تفاصيل ماگلتهن لان دگن بالگلب حيل بوكتهن ومابيه امر عليها وافتح جروح. هسة منو تبدي

نورجان.. اني ابدي بس موهسة تعبنا خلي انام وان شاء الله ست سراء ربي  يسهل امرج ويحفظ الج اولادج ويهدي ابوهم

البنات.. امين

نورجان... بعد ماخلصت  ست سراء من قصتها ومعاناتها حسيت بشي او بالاحرى راحة نفسيه لان فضلت تربية اليتامى على الزواج.. شلت هم والنوم فارگ عيوني لساعات يله گدرت انام.. شلت هم شلون راح اعيد الماضي كله.. شلون راح تفتح صفحات نغلقت من زمان.. وشنو ردت فعلي عليها.. الساعة صارت ب2 واستغفرت ونمت.. ثاني يوم نفس الروتين گعدنا على صوت الأذان بموبايل ست مياده وست سراء.. گعدنا كلنا صلينا بدينا نحضر نفسنا   وطبعا الفطور الصباحي عليهم.. شويه وسمعت  صوت ست سراء

سراء.. نصي يمعودة هسة مايگولون هذني شعدهن.. مسويات حفلة مايصير احنا العين علينا

ورد.. وليش عيني العين علينا.. وقابل شمسوين هو مشغلين فيروز

سراء.. ولج العالم تشغل قران الصبح مو فيروز

ورد..ام يوسف عيني مو من ال5 مشغلة ست مياده قران وصلينا وهسة ب7 يعنى سره فيروز.. ساعة لربك وساعة لنفسك

مياده.. اليوم شسامعات تتناگرن من الصبح.. ست سراء حبيبتي كل واحد على راحته ثم العالم شعليها بينا هذا الوقت راح.. هسة كل واحد حر بتصرفاته

سراء.. احنا مامسوين شي.. بس خيه احنا 4 اثنين عزابيه وحلوات ووحده مطلقة والمتكلمة  احتمال في طريقها للطلاق يعني ملتمات المتعوسة غلى خايبة الرجا

نورجان.. ههههه والله ست سراء.. واذا يعني المامتزوجة ومتاخرة بالزواج مو بشر من حقنا نعيش بحريتنا.. وحتى المطلقة مو انسانة لو الا يحطون الخطا بالمرة.. والله شوف شبيها واطلقت.. الحمد الله هسة تاكدت قراري صحيح..

ورد.. وبعدين ام يوسف الغالية اني فرحانة لسبب  مو هيج من الفراغ ولو بيدي اشغل كردي وادبج يم القلعة مال اربيل

سراء. ليش خية خير.. لازم الخبر يسناهل بلكت ندبج وياج.. اشو هاي ماصدگت حولت التلفون لاغنية كرديه وظلي دبچي ولفرحة تارسة الوجه بس العيون غرگانه بالحزن.. اخ يا ورد كلش متحمسه اسمع قصتج.. ظلينا فد ربع ساعة هيج وورد طفت الاغنية