خفايا أنثى
تكمله البارت الخامس
هند الصالحي
.................
سراء.. بقيت مده احچي ويه الجهال واهلي وبلغوني باجر ابوهم ياخذهم يومين ثلاثة ويرجعهم سديت التلفون وفزيت على صوت الخبلة ورد
ورد... اي ليش ضاعت جهودكم سدى
سراء... بسم الله الرحمن الرحيم... انا تعبت انام ساعه وگعدني اكمل الچن..... نمت وأني عبالي دنيا مغرب گلت للبنات أنام ساعه واگعد وهي النومة للفجر گعدنا حسب الروتين اليومي ورحنا للدورة لليوم الرابع وتعبنا كلش و من وصلنا للغرفه مالتنا گتلهن بحماس
شوفن اليوم نطلع للسوگ لو تمطر حجار
ورد.. ها ست سراء اشو اليوم متشوقه للسوك
سراء.. مو متشوقه هذني الفلوس الي استلمتهن اذا بقت يومين بجنطتي بعد مااصرفهن ومن ارجع للبيت گبل اخليهن بيد ابو يوسف ونسد بيهن الدينات
نورجان.... لا لا جيبيهن يمي واليوم احنا بالسوك 100 بالميه
البنات... هههههه
سراء... ارتاحينا ساعتين وطلعنا للسوك اخذنا تكسي ومن وصلنا نزلنا اني والبنات
مياده.. سمعوا بنات لازم نخلي خطة للمشتريات
نورجان.. صحيح لعد اني اروح اشتري الموبايل وانتو روحو للملابس والمكياج
ورد.. تمام والافضل أني وست نورجان نكمل موضوع الموبايل والمكياج والاكسسوارات وانتن روحن للملابس
مياده.. تمام.. ومن نكمل نرجع لهنا
نورجان.. تمام
سراء... حتى نكمل شغل من وقت ونوب نروح نگعد بمكان ونسولف واكمل احداث قصتي اني ومياده رحنا نشتري ملابس دخلنا للسوك واني مصدومة من كل شي مو مبالغة حتى للسوك مااروح الا بحالتين لو ويه الحجيه من تاخذ الراتب التقاعدي وتاخذنا للسوك اني وجهالي الفقرة الي دحام كلش زين يدري بيها ومغلس عليها.. لو ويه خاله بهيه من تطلع تشتري مسواك للبيت اذا غذائية او ملابس... اليوم احس نفسي مثل الطير المحبوس بقفص والي توه طالع له جناحين ومتحمس يطير ويحلق بعيد بعيد عن كل شي يخنگه
مياده... ها ست سراء شنو رايج بهذا القاط
سراء... ها وياي
مياده.. لعد منو اكو اي دااسال شنو رايج بهذا القاط
سراء.. يبوو يا ست مياده اول ماشطح نطح..
مياده..ليش شبي حلو وموديل كل المعلمات والموظفات يلبسون منه
سراء... هو حلو بس اذا البسه وبهيه تشوفني تشكلي ورقة الطلاق بدنبوس القاط
مياده... وانت تلبسين لعمتج لو لنفسج.. انت ليش هيج كل شي وگلتي خالتي بهيه خالتي بهيه... انت لازم تلبسين لنفسج ولزوجج
سراء.. اذا بقت على زوجي فمايميز اذا چنت لابسه گونيه لو غيرها
مياده.. هاي بعدين نسولف بيها.. هسة شنو تريدين انت
أنت تقرأ
خفايا أنثى
Chick-Litلكل أنسان خفايا لا تعلن.. تبقى داخل القلب .. هي امنيات فرضت عليها قيود من المجتمع.. فيظهر الأنسان عكس مايتمنى ان يكون
