.
.
.
" اللي بيحب ابني يجيب منه دستة عيال! "
كنت كل يوم بسمع الجملة دي من حماتي!
جوزي كان ابنها الوحيد ومكنتش لسه كملت سنة في بيته، بعد أربع شهور بالظبط كنت حامل.. لكن ربنا كان ليه حكمة تانية وسقطت.
الدكتورة قالتلي هتاخدي وقت.
عشان كنت ضعيفة ومباكلش بسبب زهقي الدايم من كلام حماتي وبناتها، رغم إنهم متجوزين بس كان لازم يجوا كل يومين يحرقوا دمي بالكلام.. ولما كنت بشتكي لأمي كانت بتقولي:
" استحملي عشان جوزك.. بكره ربنا هيكرمك "
قفلت معاها وقعدت أعيط، جوزي اللي بتوصيني عشانه لما عرف إني هاخد وقت سابني وسافر ومبقاش بياخد اجازة، مبقاش يرن يطمن، اهتمامه تقريبًا مبقاش موجود وكأنه متجوزني عشان أخلف وبس، قاعدة في شقتي طول اليوم لوحدي، وكل ما بنزل لحماتي تقولي: " عاجبك حرمتيني من ابني هو كمان، مش كفاية حرماني أشوفله عيل! "
قررت أصلي كل يوم قيام ليل، كنت ساعات بمسح دموعي وأقول معاهم حق.. العيال عزوة وسند ولازم تشوفله طفل!
ركنت خاطري اللي كانوا كل يوم بيكسروه بكل جحود وكنت بدعي ربنا عشان يرزقني واسعدهم، كنت دايمًا بدعي وأقول:
" اللهم أرزقني من قبضة الكرب انفراجًا، وأرني في القليل بركته، وفي السعي أثره، فبهذا الإيمان أصمد "
بعد شهرين بدأت أحس بدوخة، وتعب طول الوقت.
رنيت على جوزي فرح ونزل من السفر عشان يكشف عليا.
والدكتور بشرنا خلاص، الكل كان مبسوط ما عدا أنا، كنت حاسة إن كل حاجة بيعملوها مش عشاني، لو تعبت هيخافوا عشان ابنهم، لو حصلي حاجة هرجع لنقطة الصفر وبقيت بسأل نفسي " ليه بعد كل ده قررت أخلف منه! "
جه يوم الولادة والكل كان باين عليه الفرحة، وبعدين ابني جاله دور سخونية ومات.
لاقيت جوزي خدني من إيدي لبيت أهلي بحجة إني لازم أريح أعصابي، وكل ما اقرر أرجع يقولي لا.. لحد ما أمه كلمت أهلي عشان نتطلق؟ وكل واحد يروح لحاله!
حسيت في الوقت ده إني نزلت من قيمتي لأبعد حد.. وعرفت إن مينفعش نكمل في التضحية طول ما إحنا شايفين الشخص ده ميستاهلش، واللي ميقدرش خطوتي عشان راحته ميستحقش أقوم من مكاني عشان اقدره.
التقدير للشخص اللي وقف جنبنا لما العالم سابنا نقع!
النهاردة وبعد سبع سنين اتجوزت راجل لما بيشوفني معيطة بياخدني مكان بعيد عن البيت ويقولي إحكي.. سامعك!
هو صحيح حالته المادية بسيطة.
بس كلمة سامعك دي بالدنيا.
إحنا ممكن نبيع الدنيا قصاد حد يسمعنا بس!
اللي بيسمع حكاوينا المُتعبة ممكن نشاركه الحرب اللي بيخوضها.
قد تكون إرادةُ الله أحيانًا مخالفةً لمرادك، لكنها دائمًا لمصلحتك، ثق وكن موقِنًا بتدبير الله ♥🌻.
#منقول
