علاقة تنتهي بمحبة#القصة تحتوي على تفاصيل فاضحة

#١متابعة ومراقبة

ابطال القصة...
اكيد اني سالم مواليد ١٩٨٩
البنت r.m مواليد ١٩٧٥
واني منشغل بامور الحياة والعمل والضروف ويوم من الايام سمعت الشباب يسولفون ع برنامج جديد نازل اسمه وي شات..
من مميزاته.. بي بحث حولك يطلع شكو اشخاص موجودين ضمن البرنامج وقريبين عليك..
وبي انه ترج الموبايل وشكو شخص بذيج اللحظة يرج موبايله يطلعلك...
وبي تكتب رسالة بداخل بطل وتشمرها بالبحر.. واي شخص يبحث بالبحر ممكن يشوف رسالتك ويقراها...هاي الميزة الي جذبتني وخلتني افكرررر وخلتني اسرح بخيالي ..طبعا بعد ما سألتهم اكثر عن البرنامج وخصوصا هاي الميزة... كل الي اجه ابالي سجواء الي قصتها كاتبها..
واتخيل انه ممكن اشمر رساله بالبحر وهيه الي تفتحها... فعجبتني الفكره كلش..ونزلت البرنامج.. سويت اعداداته وخليت صورتي وبوجهي لهاي الميزة مال بحر.. كتبت رساله الها وكلي ايمان انه راح تفتحها هيه تحديدا.. كتبت شكو شي بداخلي كلام الها.. وحجيت عن المرار الي عايشه وجاي اعيشة بفراگها وكل الاريده اي خبر عنها...وشمرتها بالبحر.. وبقيت انتظرها....
بعدين فكرت انه اشوف بالبحث حولك بلكت موجوده ودخلت ادور بالحسابات الطلعتلي.. الي حاطة اسمها ما ادخل عليها... الي اسمها غريب او شي ادخل ع حسابها واشوفه اگول بلكت هيه... وحدة من الحسابات الي دخلت عليها r.m .. طبعا من اسوي بحث احدد فقط اناث.. وممكن انه اكو ولد ميعرفون او يتقصدون يفعلون حساب وبالاعدادات يحددون بنت.. فدخلت ع حسابها منشوراتها قليله كلش ...بس المنشورات عباره عن ضيم وقهر وحزن...طلعت منها ورجعت اشوف الحسابات وشفت منشورات عجبتني وصور حلوه.. وهيج من الواقع.. عجبني البرنامج اكثر.. رحت ع ميزة الرج.. ورجيت يطلعلي البعيد ويطلع القريب بس هيه متطلعلي....
طبعا ضفت اصدقائي وناسي والي عندي ارقامهم وطلعولي.. بصراحة شي ممتع چان... اصدقائي الي التقي بيهم كلهم عدهم هذا البرنامج.. وصرنه من نطلع ناخذ صور وننشر... ويسولفون دخلتلي وحده وتعرفت ع فلانه.. اني بيه شغله.. ما احب اسولف تفاصيلي لاقرب ناسي او الي بداخلي.. من هذا البرنامج حسيت انه ممكن اكدر اسولف وافضفض عن الي بداخلي لاي شخص لا اعرفه ولا يعرفني .. لان اكو كلام بداخلي خانگني واتمنه احچي...
صرنه ننشر و دائما دائما من افتح البحث حولك تصير گدامي rm. مشت الايام وضلينه ننشر وتجيني اضافات.. طبعا اني مقل بالاصدقاء الشباب... اكثر صداقاتي بنات..صارو عندي حسابات بنات وهيج شي ومرات اسولف واتعرف وهيج شي..
يمكن وره شهرين تقريا وفد يوم جاي ارج بالليل من ضمن الاشخاص الي طلعولي بالرج rm.. طبعا كلش تفاجأت ع هاي الصدفه... وما اعرف شحسيت.. يعني من دون الملايين الي يستخدمون البرنامج وبهاي الثانيه rm دترج... دخت.. وضليت حاير اراسلها اضيفها لو لا؟؟؟؟ ومتردد... بعدها حسيت انه اكو شي بيناتنه اني وهذا الحساب.. ودخت بي... وبقيت متردد وافكر وطلعت من البرنامج ونمت...
گعدت ثاني يوم.. الصبح جايتني اضافة منها...قبلت الاضافة.. طبعا الاضافة تجي عن طريق رساله.. يعني لازم تكتب شي بطلب الصداقه واذا ماكتبت اكو رسالة من البرنامج (مرحبا) قبلت الاضافة ودخلت عالمحادثات وكتبت مراحب... وانتظرت ترد ماردت... العصر طلعنه اني واصدقائي.. اكلنه بره وياخذون صور وينشرون للاكل او بيناتنه.. اني هم اخذت صور بس مجان عندي نت حته انشرها..فنتظرت من ارجع انشر..تونسنه اني والشباب.. رجعت للبيت وصار عندي نت بالموبايل وفتحت البرنامج اريد انشر چان اشوف...........#يتبع