علاقة تنتهي بمحبة#القصة تحتوي على تفاصيل فاضحة

#٤لقاء المول قبل العمليه

ثاني يوم العصر اجتني رساله منها... هلو سالم شلونك.. اريد اشوفك اليوم ... باچر عمليتي... كلتلها شلون؟؟؟؟گالت تعال لفلان مكان.. اني كلت لزوجي نروح لهناك.. كلتها مو لازم ترتاحين قبل العمليه؟؟؟؟ گالت اريد اشوفك.. گلتلها وزوجج يوصلج ويروح؟؟؟؟؟ گالت لا ويايه.. گلتلها وشلون ممكن احچي وياج.. گالت لا منحچي بس اشوفك من بعيد وهاهيه.. گلتلها زين ممكن تشرحيلي اوصافج او ادزين صورتج حته من اشوفج اعرفج؟؟؟؟؟ گالت لا وره العمليه ان شاءالله تشوفني.. گلتلها ان شاءالله تكومين بالسلامه ويصير خير.. طبعا محبيت الح وياها حته اشوفها ..عمليتها باجر وانقهرت عليها... گلتلها زين شنو حتلبسين؟؟؟؟ گالت نفس جملتها.. لبسي مميز وطويله.. وضافتلي .. سيارتهم هم مميزة... گلت مو مهم اعرفها او اشوفها.. خلي هيه تشوفني..
خابرت الشباب وسوينه الطلعه چانت للمول.. فبالسياره وهمه ويايه.. گلتلهم ياولد .. بس تشوفون نظرات عليه وحده مبتسمه دتباوع عينكم ويايه.. اريد اشوفها اخاف اليوم اخر يوم.... اتفقنه ووصلنه للمول
طبعا اني لبسي مميز.. اجمع بين التنسيق والغرابه.. بيومها اتذكر چنت لابس قميص بدي اسود وابيض.. وشورت قصير برشوت ابيض وبي خطين سود وحذاء شلون الكاجول فلات جلد ابيض وبي شريط اسود.. بوقتها هيج لبس چان مومطروق..حذاء جلد ويه شورت.. ومچانت اكو بوقتها حفاية او جواريب ربع... چنت البس بدون جواريب... هااااا وساعتي هم سيرها اسود والداخل ابيض... طبعا وتسريحة وعطر وكذا...
المهم طبينه اني من نوع صوتي عالي وضحكتي فضيحة.. ونتشاقه ونحشش...بس اني عيني منا ومنا.. وكل شويه واحد من الولد .. سالم سالم هاي.. اشوف لو تكون شابه... لو تكون عبايه لو تكون كلش محلوه لو تكون ماكو اي شي مميز بيها.. بس عادي الناس تباوع ولبسي شويه غريب.. المهم كلش تعبت.. وملگيتها... بس گلت اكيد هيه شافتني.. بعدين گلت للولد.. تحديث عالبحث.. رجال وياها چبير بالعمر واطفال ثنين... شفت هيج كم عائله.. بس مقتنعت.. لو مثلا المره مو يمها من تباوع عليه ... يابه الشغله ادوخ... شفت مره هيه وزوجها واطفال ثنين.. ضليت اباوع عليها.. صارت عينها بعيني.. ابتسمت.. واخذت فتره صافنه بيه... گلت هيه هاي.. همه مشو ومشينه وراهم.. بس اني وامشي.. زوجها مو كلش جبير.. وهيه مو رشيقه.. ومو طويله.. وماكو اي تميز بيها.. وبهالاثناء واحد من الولد گال لك سالم لگيتها... هذييييج..... شفت مريه وحدها صافنه بيه وابتسامتها شاگة حلگها.... طويله.. مو سمينه... حلوه.... لابسه عبايه خليجية... بس فدشي خيااااالي هيه... صافنه صفنه عجيبه غريبه.. ضلينه نتابعها بس استغربت انه هيه وحدها..مشت مشينه ورها وكل شويه تباوع عليه... مسافه بيناتنه طبعا.. والمول ازدحام... شفنه ولد اصدقائنه تسالمنه وياهم... ضيعت المره.... اني ٩٠٪؜ شكيت بيها.. بس بقت شغله اريد اتابعها واشوف عائلتها حته اقتنع انه هيه... تيهناها.. واني كلش ضجت.. بقينه نفتررر.. وابد ابد مشفتها... اخر شي واحد من الولد.. گال سالم دتطلع من الباب... احنه بالطابق الفوگ.. والباب گدامنه والناس تروش.... وركض.. عالدرج ونزلنه.. اريد بس اشوفها هيه واهلها.. وبعد اشوف سيارتهم المميزه... وصلنه الباب وطلعت بره واشوف ماكو هيه.. ياولد اطشرو بس شوفو سياره مميزه.. اطشرنه.. اني وگفت عالجزره الوسطية بالشارع.. اشوف السيارات الرايحة والجايه .. لان لازم تفوت بالشارع... بقيت تقريبا ٥ دقايق.. وع ذاك السايد اني اباوع عالراكبين بالسيارات اريد اشوفها... لمحتها من بعيد بسياره وضليت مركز عليها..... وصلت قريبه كلش قريبه.. شفتها نفس المره.... ملحگت انتبه ع الديسوق ولا عالاطفال.. عبرت السياره...باوعت عالسياره.. سياره امريكيه قديمه...
صعدنه بالسياره ودنرجع.. وصلت الولد واني دا اسوق دا احلل واطابق انه هيه لو لا حسب المواصفات القليله الي گلتلياها...طويله؟؟؟ صح.... رشيقه؟؟؟؟؟؟ يعني مو سمينه بس مو ضعيفه.. والرشيقه يعني قريبه للضعف.. بس ممكن تكون العبايه راهيه... لبسها مميز؟؟؟؟؟ يعني صح مو بكثره تنلبس العبايه.. بس محسيت شي كلش مميز.. زوجها جبير بالعمر وتعبان؟؟؟؟؟ مشفته ولا لمحته.... اطفال ٢ وياها؟؟؟؟؟؟؟ مشفتهم اصلا....سياره مميزة؟؟؟؟؟؟ شفت سياره امريكيه قديمه...وبقيت حاير.. ها طبعا باللحظة الي چانت بالسياره وفاتو من يمي.. چانت عينها عليه وعين بعين...رجعت للبيت واني بحييييره وممتأكد انه هيه او لا... وخفت ادزلها رساله.. لان متفقين... وبقيت گاعد وافكر وحسابها گدامي وانتظر ادز شي.. ويمشي الوق ويمشي.. لحد الفجرررر واني بين الدا اغفى وبين الگاعد.....#يتبع