*#وقعة_الشاطر 《08》*
*#بقلم_امل_خضر*
صحيت تاني يوم مخلوعة..شلتا تلفوني سريع اتوقعتا محمد دقا لي وانا م صحيت..لقيت مكالمين بابا ومكالمة من فهد اتأفأفتا وجدعتا التلفون بزهج..
جهزتا وطلعتا للجامعة..دقيت لي بابا صبحتا عليهو لقيتو مدوام للصباح وهسي ح يرجع البيت..وصلتا الجامعة عاينتا لعربية محمد م لقيتها..
حضرتا محاضرتين وطلعتا..اتوقعتا القاهو واقف قدام القاعة بس ظني خاب..
بقيت حايمة في الجامعة وبفتش فيهو..م لقيتو..دقيت ليهو م برد..طلعتا برا عشان اشوف عربيتو لقيتها واااقفة..دقيت ليهو تاني م ردا..اتأفأفتا ودخلتا جوة..جا الجامعة وم جاني ليه؟!..وبدق ليهو م برد..اتخيلتو يكون سافر من غير ما اعرف..قعدتا في البنش وانا زهجاااانة ليه اختفا فجأة؟! هسي انا اعمل شنو..في نص تفكيري دا سمعتا صوت ضحكو رفعتا راسي سريييع..لقيتو واقف مع مؤمن مشيت عليهو وانا مغيووووظة..هو لمن شافني
قال لي:حبيبتي
لزيتو لورا وقلتا ليهو:مشيت وين انت؟!
عاين لي باستغراااب..
قلتا ليهو:امبارح م دقيت لي ليه؟!
محمد:كنتا مع الشباب ولمن شفتا الساعة لقيت الوقت متأخر
قلتا ليهو:ما كل يوم بتدق لي متأخر
محمد عقد حواجبو باستغراب
قلتا ليهو:وبدق ليك م بترد
عاين لمؤمن وقال:تلفوني كان معاك وينو؟!
مؤمن:اديتك ليهو ي مان
محمد:م اديتني ليهو
مؤمن:عليك الله؟!..معناها خليتو في المطبخ
محمد عاين لي:مالك متضايقة انتي؟!
طبعا الدموع بدت تتجمع في عيوني..
قلتا ليهو:م مالي ي محمد
وكنتا ماشة كدا وقف قدامي..
لزيتو:زحح
جرا يدي وقال:م بزح..وريني مالك
نتقتا يدي منو وكوركتا:رجاك الليل كلو تدق لي م دقيت..وجيت الجامعة فتشتك م لقيتك وبدق ليك م بترد..عايز تختفي تاني؟!
محمد صرا وشو:رسلتا ليك رسالة م شفتيها؟!
قلتا ليهو:رسالة شنو؟!
محمد:شوفيها براك..فتشي تلفونك سمح بعدين تعالي كوركي
ومشا خلاني..عاينتا ليهو مسااااافة..الود دا متخلف؟! بعد دا كلو مشا خلاني ببساطة؟!..
دخلتا المحاضرة وانا زهجااانة بي كلو..قعدتا وفتحتا تلفوني..فتحتا الرسايل وقريت رسالتو..
ابتسمتا غصبا عني وعدتها مرتين..بعداك قفلتا التلفون وبقيت افكر..يعني هسي انا فايرة ومدفقة كدا مالي؟!
حضرتا محاضرتي وطلعتا لقيتو منتظرني..قعدتا اضحك..
جا علي وهو بغني:في الجمال معدووم البساويها..ومن زمن مشتااق قلبي هوااايهااا
عقدتا حواجبي من غنيتو..اول مرة اسمعها
تما غناهو:ديمة ظالمني..محكتم ليهاااا..لو تخلييييني..ما بخلييييهاااا
كر كر كر ضحكتا
محمد:م بخليهاااا
قلتا ليهو:الغنية دي الفتها براك صح؟!
ضحك:دي غنية الجاان ي زولة
قلتا ليهو:بالله؟!
ابتسم:وحاااة غلاااتك
ابتسمتا وم رديت..
محمد:طبعا من الصباح م اكلتي شي
عاينتا ليهو:عرفتا كيف؟!
محمد:كدا بس
ابتسمتا:اي في زول كدا كان رافع لي ضغطي
ضحك:رافعو ليه خليهو يختو يخ
ضحكتا..شكلو مزاجو رايق وداير يتظارف
مشينا لي باقي شلة..
سلمتا عليهم وقعدتا
نان قالت لي:معليش علي كلام امبارح يخ
قلتا ليها:عادي ي بت م تشتغلي بالموضوع كتير
نان:طبعا البهايم ديل متعودة اغلط عليهم عادي لكين انتي لاا
مؤمن:البهايم ديل نحنا؟!..نحنا بنتهزأ ي رجالة
ضحكو
قلتا لنان:والله البهايم البتقولي عليهم ديل يا بختتتك بيهم
مؤمن:نحنا بتشكر ي رجالة
اسيا:دا مالو دا؟!
محمد:علق
ضحكنا كلنا وبقينا نتونس..
سحر طبعا دقت لي وقلتا ليها امشي..
زي المغرب كدا طلعتا من الجامعة مع محمد عشان يوصلني..
اثناء ما نحنا في الطريق
قلتا ليهو:جوو
عاين لي بخلعة:قلتي شنو؟!
انا:قلتا ليك جوو..مالك مخلوع
محمد:غريبة يعني م حصل مرة ناديتيني بي جوو
ابتسمتا:عادي يعني
محمد:شكلو م عاجبك
قلتا ليهو:بالعكسس
محمد:عاجبك؟!
انا:شديييد بس محمد احلى
محمد:تصدقي انا زاتي بحب تناديني محمد
انا:معناها تاني ح اناديك جوو
ضحك بأعلى صوتو وقال لي:كدا ي مأب؟!ديييييم
ضحكتا وقلتا ليهو:المهم
محمد:احكي لي
انا:بتحب تسمع لي محمود عبد العزيز؟!
محمد:مش بحب اسمع ليهو بس..م بطيق اسمع لي غيرو
قلتا ليهو:عشان كدا عامل غنيتو نغمة
محمد:كيييف ي زولة..لازم
ابتسمتا وم رديت ليهو..
على كدا وصلني البيت..دخلتا وطبعا كالعااادة سحر استلمتني ليك..ابعدي عنو وم تثقي فيهو ومحاضرتها اليومية..
م اشتغلتا بيها..استحميت صليت وغيرتا وكدا..
صحيت نص الليل بصوت تلفوني..
رديت من غير ما اشوف المتصل:الووو
محمد ضحك:عارفة اكتر حاجة بتكيفيني في الدنيا دي؟!
قلتا ليهو:اهااا
محمد:صوتك النعسان دا
ضحكتا
محمد:وضحكتك دي
ضحكتا تاني
محمد:هوي كفاك
قلتا ليهو:اها رجعتا البيت؟!
محمد:يب
عاينتا للساعة لقيتها 2:15 قلتا ليهو:اتأخرتا الليلة
محمد:مشيت الطرمبة فوّلتا العربية
"فولتا=مليت"
قلتا ليهو:كوووويس
محمد:اي..وجعان داير اكل
قلتا ليهو:طيييب
محمد:وبحبك ويلا مع السلامة
ضحكتا:يعني هسي ي محمد انت م شايف انو دا ظلم كل يوم تصحيني نص الليل عشان توريني انك وصلتا البيت؟!
محمد:شايف انو في زول كدا اتعود علي الوضع لدرجة انو امبارح لمن م صحيتو الصباح كان داقي جرس
ضحكتا:دا منو دا؟!
ضحك:زول كدا..حلاااتو ووشو صغير
قلتا ليهو:عندك مشكلة مع وشو الصغير دا؟!
ضحك:عاجبني بس
ضحكتا
محمد:اها كيف كلامي دا م صح؟!
قلتا ليهو:صااااح..هو انت بتقول حاجة غلط؟!
محمد:بس كفاية كدا..تاني م داير اسمع شي
ضحكتا: ولا حتى تصبح علي خير ي بيبي؟!
محمد:بيبي دي بتعصبني
انا:ليه مالك معاها؟!
محمد:م بدورها
ضحكتا
محمد:دااامت
قلتا ليهو:م يدوم ليك عدوو
تاني اتخلعتا لمن اتذكرتا اني بدعي علي اخوي لأنو فهد قال انو في عداوة بينهم
محمد:تدومي لي انتي وم داير شي غيرك
ابتسمتا:ان شاءالله
محمد:تمام يلا..تصبحي علي خير
انا:تلاقي الخير
محمد:يعني الاقيك؟!
انا:وبعلي
ضحك وقفل الخط...
رقدتا وانا مبتسمة..وكالعادة ابتسامتي بدت تختفي تدريجيا لمن اتذكرتا الخطة وانو العاشين فيهو انا ومحمد دا وهممم..
قريت رسالتو وختيت التلفون..
قال علي دافية..يعني هو حاسي بالدفا معاي..وقال اني بعرف وين اقعد في دمو وياتو جرح اداويهو..آه ي محمد لو بيدي اشيل جروحك كلها واخت ليك بدلها سعادة وراحة..قال اني بعرف املا ياتو فراغ..هه هو م عارف اني قعد املاهو هم وفقر قعد املاهو بي حب هو صادق هسي لكين مجرد ما يكشفني ح يتحول لي سمم..م عارف اني اي كلمة واي ضحكة بينا دبووس مسمموم قعد يتغزا ليهو في قلبو..قلبو مخدر بي حبي حاليا لكين التخدير الموضعي دا ح يفك في اليوم الح يتقبض فيهو..في اليوم الح يعرف اني مجرد سماعة بتوصل اسرارو لي فهد..في اليوم الح يعرف فيهو انو حاليا قعد يحفر قبرو بي يدو...حسيت بي دمعتي جرت..مسحتها وانا ببتسم بسخرية علي قصتنا دي..دايما بسمع الناس بقولو انو القدر لعووب بس يداب هسي عرفتا معنى الجملة..يداب فهمتا انو ممكن القدر يكب ليك مشاعرك دي كبب في اكتر مؤذي ومضر ليك..وممكن يشيل قلبك دا منك ويختو في يد زول وانت عارف وموقن تماااما انو الزول دا لا تصيبك ولا قسمتك وبرضو م بتقدر تحرك ساكن..م بتقدر غير انك تعشقو كل يوم زيادة..وتموت بالبطئ وانت شاايف نفسك ماشي في طريق نهايتو مسدوودة...
*mosha🌸✨*
