2:56p
فتحت باب البيت ودخلت بعد تمارين استنزفت طاقتي كلها وارهقتني ،، كان يمديني اوقف تمارين انا ما امشي على اوقات معينه ونظام معين ولا عندي مدرب يجبرني على اوقات ،، لكن انا ، كل ماضاقت فيني الدنيا رحت تمرنت الين اوصل لمرحله التعب والارهاق ، وارجع للبيت وانام
دخلت والبيت كان دوشه كان فيه اصوات كثير والواضح ان فيه ناس بالبيت ، تجاهلت هالشي ورحت ابي اطلع لغرفتي ، الا المح جزمه خالي الله يكرمكم ، خالي !
ركضت لجهه المجلس لقيت ابوي عازم كل عماني و خوالي ، لكن الاهم من هذا كله ، خالي سعود !
اكثر شخص احبه ب حياتي ، هو الشخص الي لقيت عنده الحنان والامان الي مالقيته عند ابوي
ركضت وحضنت خالي بكل قوتي مع ان عضامي ماكانت تحملني والتعب كان متمكن مني
استغربت كلام خالي يوم قال
خالي سعود : مبروك يانظر عيني !
بعدت عن خالي وقلت : مبروك ؟ مبروك على ايش ؟
ابوي ( سليمان ) : قبلوك بنادي الهلال النسائي !
ليالي ( انتي ) : الهلال !!!
بصفتي مشجعه هلاليه ماقدرت استوعب هالخبر ، كان هالخبر اكثر خبر سمعته واسعدني بحياتي !
رجعت وحضنت خالي مرا ثانيه وكنت ابي ابكي ،، لكن لا ومستحيل ، شخصيتي عكس اني اظهر ضعفي لمين ماكان وحتى لو كانت دموع فرح ، مستحيل انزل دموعي قدام احد
خالي سعود : بكرا بتروحين توقعين العقد وراح اشوفك تبدعين بالمباريات متأكد !
كلام خالي حفزني اكثر واكثر لهالموضوع ، استأذنت الجميع لان كنت تعبانه فعلا محتاجه انام وبكرا وراي يوم طويل ، طلعت الغرفه وانسدحت على السرير بعد مابدلت ملابسي وبدت دوامه التفكير اللانهائيه ..
امي ؟ ليش تركتيني مع ابوي عديم الحنان و الرحمه ؟ اعرف يا امي موتك مو بيدك ،، بس انا محتاجتك بذات باللحظه هذي .. اهم لحظات حياتي !
غمضت عيوني ورحت بالنوم ..
4:00m
فتح ابوي باب الغرفه بكل قوته وصرخ وقال : حتى الشي الي دخلتيه وانتي تحبينه متكاسله فيه !!!! تبين تتأخرين عن كتابه العقد !!!!!
مو شي جديد على ابوي ، ماقمت لا خايفه ولا مستغربه هذا هو نظامه دايما
قمت اخذت شاور ولبست تيشيرت احمر و بنطلون واسع
طالعت بالساعه وكانت 4:43 و وقت توقيع العقد 5:00 !!!
طلعت مستعجله وكنت اتحاشا اشوف ابوي لاني ادري بيسمعني كلام محد يتمنى يسمعه ومو ناقصه انفس هاليوم
نزلت بسرعه واخذت حليب من الثلاجه وطلعت ركبت سيارتي ومشيت .. وصلت على المقر على الساعه 4:57
الحمدالله كان قريب من بيتنا تقريبًا
نزلت واستقبلتني وحده دلتني على المكان الي المفروض اروح له
دخلت وقالو لي ان توقيع العقد بيتأخر شوي ف خلوني اقعد مع باقي الفريق على اساس اتعرف عليهم
دخلت وكنت متوتره كنت احس ان محد بيتقبلني هناك ، واحساسي كان صحيح للاسف
ليالي : السلام عليكم
محد رد علي واستغربت ؟
ليالي : عالعموم خيركم من بدا السلام
جود : ايش قصدك ؟
ليالي : ما اقصد شي وما ودي بمشاحنات من اول يوم بكفيكم خيري وشري
جلست على جوالي انتظر متى وقت توقيع العقد للحظه الي شفت فيها دياز ( مدرب الهلال ) و نوف ( مدربه الهلال النسائي ) و فهد بن نافل ( مدير النادي )
اشر لي فهد وفهمت من اشارته اني لازم الحقهم وفعلا لحقتهم ورحنا لغرفه كان فيها كاميرات وصحفيين
فهد : ابتسمي وادخلي بنوقع العقد الان ورسميا بتكونين مع الهلال النسائي
ابتسمت ودخلت وكنت متوتره بعض الشيء لكن ما منعني التوتر من وصولي لهدفي ، وفعلا وقعت العقد ورسميا ، صرت لاعبه هلاليه !
لبست طقم التدريب وقالت لي نوف : بنتوجه للملعب بتبدين التدريب مع الفريق الاساسي
ابتسمت وهزيت راسي
نوف : ابتسامتك حلوه ماشاءالله
قالت هالشي ومشت قبل لا ارد حتى
ليالي: وش فيها ذي عالاقل خليني ارد ؟
قلت هالجمله وانا مبتسمه واضحك
دخلت للملعب وماكنت مستوعبه للان انا وين
END P1
_____________________
بداية كويسة ؟
