3/30
بعد مامسحت الانستا وسينمانا وانمي سلاير حولت على الواتباد اهم شي ما ادرس🦦💔
بس لا بعيدا عن الشقة فكرة هالبارت من زمان ببالي
هو لاحظت بهالسنين الأخيرة شكد الأنسان يتغير حرفياً سنة وحدة تفرق بحياتة وقراراته وادراكة للأمور بطريقة جبيرة
مو بس بأفكاري حتى بتفسير مشاعري وفهمها
هالسنة اكتشفت شعور جديد وحرفياً كلش عجبني وهو الأعجاب
اول مرة انعجب بشخص
هو بالبداية ادرجته تحت حقل التكريش والحب لأن هيج مشاعر مشابهة
بعدين ورة فترة بديت احس انو اكو شي خطأ
انو صح مشاعر الحب متوفرة بس ماكو انجذاب او شعور " هالأنسان أريدة ألي وبس "
فهنا بديت اكتشف الأعجاب وادركت اني منعجبة بهالشخص خاصة فارق العمر بينة كلش جبير
وتطورت اكثر بأستيعابة لحد ما كدرت اطي وصف او تعريف لهالشعور هو مثل عدم الرغبة بهالشخص بطريقة عاطفية او تمني يكون ألك بس بنفس الوقت السعادة والغبطة من تنال استحسانة الفرح الشديد من تحصل مديح منه وشعور الخذلان من يذمك لأي سبب، تسعى حتى تنال مرضاتة وتكبر بعينة وبنفس الوقت مامنتظر انو يصير اعجاب متبادل
وبصراحة حبيت هالشعور اكثر من الحب لأن تحسوه أنقى وأكثر أمان
انت مراح تتألم لو شفتة بعلاقة وية احد ثاني بالعكس حتفرح اله ومراح تكون منتظر اي تطور بينكم او تبادل بالمشاعر مجرد وجودها من طرفك كلش كافي وانت الي تقرر شلون وشوكت تبديها وتتحكم بيها
العقل مسيطر وواعٍ تماماً بالي ديصير على عكس الحب الي يدخلك بدوامة ينسيك المنطق
وفجأة تصحى منها وتلحظ الأفعال والوعود الي انطيتها بدون تفكير
وهو مامقيد بجنس او عمر معين ممكن تنعجب بأي شخص مذكر او مؤنث بينكم قرابة او لا
فهو حُر أكثر 🤍
ما اعرف ليش وصلت لهالعمر يلا فهمت ووعيت على هالشي هل السبب قلة التواصل مع الآخرين او ضيق الدائرة الأجتماعية او الخجل المفرط المشابه للرهاب من الأختلاط
بس متأكدة هواي مثلي وهالشي ملاحظتة على بشر من حولي
ومن عشته وفهمتة كدرت ارتب مشاعري اتجاه الآخرين من جديد وللأسف هواي اشخاص بالسابق خليتهم بالحقل الخطأ لجهلي لحقيقة مشاعري
اشخاص عبالي مشاعري اتجاهم جانت حب وجنت اظن سعيي لوجودهم قربي هو الحل والتتويج الي تستحقة هالمشاعر
بس هسة استوعبت انو جان اعجاب لا غير
فالأنسان لازم يتمعن اكثر ويتأكد من احساسة قبل ليسوي اي خطوة او يصرح بشي
سابقاً ماجنت متوقعة ممكن اكتشف نوع جديد من الشعور بالعلاقات الاجتماعية بس هسة اني داخل فسحة جديدة
فأتمنى بالمستقبل اكتشف اكثر واكثر واكدر اعدد بحقول علاقاتي وفرزهن بالشكل الصح
الكتاب الي سويتة مال Moon ofter year فادني بملاحظة شكد دا اتغير مع الوقت بكل سنة اكول هالنسخة مالتي عاجبتني ومقتنعة بيهة كلش بس ارجع سنة الجاية بشخصية احسن وأوعى وأكثر ملاحظة للعيوب السابقة
واحسن تغير طرأ علية هو صرت اسوي كلشي علمود نفسي وفقط انشر بارت لأن اني أريد أكتب لأن اني احب أعبر
ما عادت آراء الناس حول تصرفاتي تعيني هلكد
اكتب غزل او انشر اغنية حزينة بس لأن عجبتني بغض النظر عن أقوال الآخرين سواء كان ايجابي او سلبي
اكتب بالطريقة الأحبها احجي استعمل المفردات المتكلفة الأني ارتاح بالتعبير عنها بعيداً عن الخوف من ان يساء فهمي
التخلي عن المحاولات المستمرة لتجنب كلام الآخرين او تصحيح نظرتهم عنك صار شي يحتل آخر سطر بورقة الأهم بالنسبة ألي
الفترة مابين ال17 - 18 تغيرت كلش احتمال بسبب احداث جبيرة عشتها او لأن هذا العمر بشكل عام يوعى اكثر بس المهم النتيجة حلوة كلش🤍
الانسان بعد كل عام يمر عليه يتقبل انو هو ميعرف مو واعي مهما مر بحياتة ومهما قرة وتعلم تبقى السنين تعلمة امور مختلفة تماماً
ولحد آخر يوم بعمرة هو يتلقى دروس عدة لهذا خاليبقى متقبل للأنفتاح وتغيير الأفكار أطلاقا ليتعصب بمبدأ او فكرة او طائفة خلي يكون متقبل للتغيير اكثر...
