جرائم في سواد معتم

part five

#جرائم_في_سواد_معتم

الكاتبه وَتر

اهم شي التصويت + التعليق بين الفقرات ❤️
____________________

إيلام :

قريت الرسالة اكثر من مره ماادري شنو الشي الي ديخليني مااكدر اطلع من المحادثه حيلي كله رجف اخذت سكرين للرقم والرسالة تلقائياً

كعدت عالجربايه وسديت التلفون سندت جسمي بايديه ثنينهن وگلبي وجسمي يرجفون خوف وماعندي اي فكره شلون راح اتصرف

واول شي اجه ببالي أمي همين مراقبيهه؟ لو ميدرون وينهه ؟ واصلا منو همه وشيريدون مني ؟؟

مااعرف ابقى بالبيت لو اطلع منه ؟ عندي شجاعه اخطو خطوه وحده اصلا؟ جامده بمكاني واحس بأي لحظه ممكن يصير شي ..

وبعد تفكير وخوف وكأنما فزيت من كابوس بس مع الأسف حقيقه .. تمددت وحاولت أنام بس خوفي يمنعني حتى أغمض عيوني

فتحت التلفون مره الخ وشفت الرساله والرقم مموجودين اصلا !

سديت التلفون وقررت أنام بس جاهدت يلا نمت وعين مغمضه عين مفتوحه كل شويه أفز لحد مطلعت الشمس صار لازم اتحرك وراي شغل ويوم طويل

كمت بروح فارغه بكل ماتعنيه الكلمه تجهزت لمجرد حتى يكون مظهري مقبول بالنسبه لوظيفتي لان هالشي مو بأرادتي ..

وفتحت قفل الغرفه ومتردده امشي اي خطوه خارج الغرفه لان حتى واني بداخل 4 حيطان خايفه شلون برا ؟ ومن شوكت كميه الضعف هاي محتلتني

كلش كرهت روحي وطلعت نافيه اي فكره خوف ولا اراديا امشي باهدأ خطوات عندي حتى لااطلع صوت

طلعت من البيت وقفلت الباب وصعدت بالسياره وتلقائيا التفتت اتأكد اذا اكو احد بالسياره وأكييد ماكو

شغلتها وتوجهت لشغلي ..

وبعد كم ساعه من التعبب والمعاملات المُزريه ببغداد وصعوبه أنك تمشي اي شي ضروري وحتى أن كان بأمر من قاضي ..
وبعض المعاملات متمشي الا بفلوس ومُضطر أنت تمشيها حتلو بهالطريقه البشعه جداً بنظري

من الانشغال والتعب نسيت السالفه الصارت وياي بس كش جسمي فجأة وتذكرتهه وتوجهت لمركز اتفاهم بهالموضوع واحاول الكه مصدر الرقم باعتبار وظيفتي تساعدني

  بس مع الاسف بعد محاولات اكتشفنا الرقم بعد ماندزت الرساله انقفل نهائياً وعجزت اوصل لأي مصدر وأيست من الموضوع وتمنيت مجرد متنعاد السالفه

ماادري عدم اهتمام بحياتي لو شنو ؟

باوعت للساعه بـ2 الظهر ، رحت اكلت ورجعت للبيت غيرت هدومي ولبست شي اكثر راحه حتى اقابل مريم

طلعت من البيت ورحت للكوفي وكالعاده قبل الوقت ب 10 دقايق وكعدت انتظرها وبعد كم دقيقه شفتها ووياها واحد كلت اكيد اخوها