ماتيجي اخدك ل ٧ مشاهد وشوف هتحس ب ايه
المشهد الاول : دلوقتي القيامة قامت وواقفين كلنا في ارض المحشر الشمس تكاد تكون بتلامسنا لك ان تتخيل الحرارة يكاد الانسان وقتها يغرق في عرقه والجو صعب جدا ومش قادرين بس بص الناحية التانيه كدة في مجموعه ناس واقفين ف الظل والدنيا طراوة عندهم تفتكر عملوا ايه دول؟ واحد فيهم كان امام عادل يحكم بعدل الله بين الناس او بين اهل بيته والثاني كان قاعد كدة ف ساعه مع نفسه وفضل يذكر الله لحد ما عينه دمعت من خشيه الله واللي جمبه دا كان واقف بيحمي وطنه بالليل والناس نايمه كان هو صاحي بلا اجر اما التالت بقا ف دا كان في يوم من الايام واحده جميله جدا وغنية جدا دعته فقال لها اني اخاف الله .... لحظه كدة دا المجموعه اللي فيها الراجل دا واقف معاهم راجل شكله حلو اوي حلو جدا لدرجه لا توصف دا سيدنا يوسف ، اما الرابع فكان ماشي ف طريق وقابل حد غلبان فدخل ايده ف جيبه وطلع مبلغ من المال انا معرفش هو كام ولا هو نفسه الحقيقه يعرف هو كام هو طلع اللي فيه النصيب واداه للغلبان دا ، والخامس دا كان راجل قلبه متعلق بالمساجد اول مايسمع الاذان كدة تلاقيه بيجري يروح ع المسجد وتلاقيه دايما ف الصفوف الاولي ، والسادس ، لحظه كدة دا فيهم حاجه غريبه انا شايفهم واقفين اتنين اتنين كل اتنين واقفين مع بعض دول كانوا ف الدنيا مافيش بينهم اي مصلحه الا انهم تجمعوا ع طاعه الله واخيرا السابع والاخير كانوا مجموعه ولكن العجيب فيهم انهم كلهم شباب وبيجمعهم شئ واحد بس انهم نشأوا علي طاعه الله .وهما دول اللي مش هيتعبوا من حر الشمس.
المشهد التاني : بردك يوم القيامه بس المرادي كلنا واقفين البشر كلهم واقفين من اول الخلق الي اخره مشهد مهيب ، لحظه كدة ايه دا؟!! الارض بتتهز جامد انا سامع صوت غريب جاي من بعيد ، مش ممكن يا الهي ، دي النار!! جاية تهجم علينا صوتها مخيف اوي بس الحمدلله مربوطة ب٧٠ الف سلسلة ضخمه كل سلسله ماسكها ٧٠ الف ملك يعني ماسكينها حوالي مليار و٤٠٠ مليون ملك ماسكينها بس هي عنيفه جدا دول ماسكينها بالعافيه ولو فلتت هاتكلنا ، صوتها مرعب اوي اوي انا سامعها وهي متغاظه وعماله تاخد شهيق وزفير كلنا اول ماشوفنا المشهد دا ركبنا سابت ووقعنا ع الارض رجلينا بقت مش شايلانا ، النار بدات تطلع صوت مخيف اوي ، عارف الذئب قبل ما يهجم بيطلع صوت زي الغرغرة ازاي اهو هي بتعمل كدة علينا دلوقتي حاسس انها هتفتك بينا مشهد مرعب ، بس لحظه كدة في ناس بعيده النار متعرضتش عليها ولا سمعوا ولا شافوا كل الكلام دا ودول اللي قال فيهم الله عز وجل
بسم الله الرحمن الرحيم {إِنَّ الَّذِينَ سَبَقَتْ لَهُم مِّنَّا الْحُسْنَىٰ أُولَٰئِكَ عَنْهَا مُبْعَدُونَ} صدق الله العظيم
اللهم اكتبنا منهم .
المشهد التالت : ماقبل الحساب مباشرة ، اه صح انا نسيت اقولك المشهدين اللي فاتوا والمشهد دا الحساب لسه مقامش ، في مشهد مهيب جدا بيحصل الدنيا حوالينا مليانة كتب طايرة استني كدة في كتاب شايفه جاي ناحيتي ، جايلي من ناحية اليمين مسكته الحمدلله اما اشوف فيه ايه ، سبحان الله الكتاب فيه كل حاجه حرفيا عملتها لا يغادر صغيرة ولا كبيرة الا احصاها بس الحمدلله مكتوب فيه حجات حلوة كتير هاؤوم اقرؤوا كتابيا انا كنت فاكر اني هتحاسب حساب شديد بس الحمدلله انا داخل الجنه ، بس في واحد تاني جمبي مسك كتابه بشماله سامعه بيتكلم وهو بيعيط بيقول يارتني ما مسكت كتابي يارب ما اتحاسب ياريتها كانت القاضية ومت وماقومش تاني انا هلكت ، شكله داخل النار
بسم الله الرحمن الرحيم {فَأَمَّا مَنۡ أُوتِيَ كِتَٰبَهُۥ بِيَمِينِهِۦ فَيَقُولُ هَآؤُمُ ٱقۡرَءُواْ كِتَٰبِيَهۡ (19) إِنِّي ظَنَنتُ أَنِّي مُلَٰقٍ حِسَابِيَهۡ (20) فَهُوَ فِي عِيشَةٖ رَّاضِيَةٖ (21) فِي جَنَّةٍ عَالِيَةٖ (22) قُطُوفُهَا دَانِيَةٞ (23) كُلُواْ وَٱشۡرَبُواْ هَنِيٓـَٔۢا بِمَآ أَسۡلَفۡتُمۡ فِي ٱلۡأَيَّامِ ٱلۡخَالِيَةِ (24) وَأَمَّا مَنۡ أُوتِيَ كِتَٰبَهُۥ بِشِمَالِهِۦ فَيَقُولُ يَٰلَيۡتَنِي لَمۡ أُوتَ كِتَٰبِيَهۡ (25) وَلَمۡ أَدۡرِ مَا حِسَابِيَهۡ (26) يَٰلَيۡتَهَا كَانَتِ ٱلۡقَاضِيَةَ (27) مَآ أَغۡنَىٰ عَنِّي مَالِيَهۡۜ (28) هَلَكَ عَنِّي سُلۡطَٰنِيَهۡ (29) خُذُوهُ فَغُلُّوهُ (30) ثُمَّ ٱلۡجَحِيمَ صَلُّوهُ (31) ثُمَّ فِي سِلۡسِلَةٖ ذَرۡعُهَا سَبۡعُونَ ذِرَاعٗا فَٱسۡلُكُوهُ (32) إِنَّهُۥ كَانَ لَا يُؤۡمِنُ بِٱللَّهِ ٱلۡعَظِيمِ (33) وَلَا يَحُضُّ عَلَىٰ طَعَامِ ٱلۡمِسۡكِينِ (34) فَلَيۡسَ لَهُ ٱلۡيَوۡمَ هَٰهُنَا حَمِيمٞ (35) وَلَا طَعَامٌ إِلَّا مِنۡ غِسۡلِينٖ (36) لَّا يَأۡكُلُهُۥٓ إِلَّا ٱلۡخَٰطِـُٔونَ (37)}
المشهد الرابع: خلاص الحساب قام والملائكة بدات تنادي علينا واحد واحد هيخش علي ربنا يحاسبه وحيدا ، انا اسمي اتنده ، انا خلاص داخل الجنه لاني مسكت كتابي بيميني ، ربنا بيذكرلي افعالي السيئة كلها بيقولي انت عملت كذا وكذا وكذا وانا خلاص حاسس اني هلكت بس ف الاخر قالي يا عبدي اني ابدلتك السيئات بحسنات وقبل ماينده الملائكة تدخلني الجنة قولت ل حضرته مازحا : يا الهي هناك بعض المعاصي فعلتها ولم تكتب في كتابي ، اما من دخل بعدي فهو الراجل اللي مسك كتابه بشماله انا حاسس انه بيذوب من خجله وسامع صريخه شكله خلاص ملائكه النار جايين ياخدوه ، بس انا شايف مجموعتين من الناس واحدة بتبكي بحرقة والتانيه مبسوطه جدا ، اما اللي بتبكي فهي داخله النار بلا حساب دول كانوا مشركين وفي مجموعة منهم كانوا ناس ظالمه و مجموعه تانيه كانوا تجار كذابة وناس تالته كانوا شيوخ زناه اما اللي فرحانين فهما داخلين الجنه بغير حساب وهيشوفوا ربنا ف الجنة دول كانوا بيعملوا الصالحات
بسم الله الرحمن الرحيم {مَنْ عَمِلَ سَيِّئَةً فَلَا يُجْزَىٰ إِلَّا مِثْلَهَا ۖ وَمَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَأُولَٰئِكَ يَدْخُلُونَ الْجَنَّةَ يُرْزَقُونَ فِيهَا بِغَيْرِ حِسَابٍ} صدق الله العظيم.
المشهد الخامس : انا شايف رسول الله وبجري عليه وبحضنه ويحضني فرحان بيا اوي اوي وبيشربني بايده الطاهرة من حوضه شربة هنيئة لا اظما بعدها ابدا وبيخبط علي باب الجنه وبتتفتح وكلنا داخلينها ولاول مرة احس بالراحه وهنا شوفت كل الناس اللي فارقوني ف الدنيا وبعد بينا الموت انا تلاقيت مع الاحبة ، بس في ست عجوزة وشكلها وحش وريحتها وحشه كدة ربنا بيقولنا دي الدنيا ثانيه كدا في كبش كبير اوي بيتدبح دا الموت احنا محدش فينا هيموت ابدا احنا هنعيش ف النعيم دا الي مالانهاية.
المشهد السادس : مشهد مهيب جدا النار عمال الناس تلقي فيها وهي تقول مزيد اريد المزيد ويلقي وتقول اريد المزيد اعطوني المزيد وسامعيت صوتها وزفيرها مخيف لحد ما رب العزة وضع فيها قدمه (ولا نشبه ولا نجمل ولله المثل الاعلي) فسكتت خالص وانكمشت ف نفسها وبقا شكلها غلبان جدا
عن انس بن مالك قال ، قال رسول الله صلى الله عليه وسلم {لا تَزالُ جَهَنَّمُ تَقُولُ: هلْ مِن مَزِيدٍ، حتَّى يَضَعَ فيها رَبُّ العِزَّةِ، تَبارَكَ وتَعالَى، قَدَمَهُ فَتَقُولُ: قَطْ قَطْ، وعِزَّتِكَ ويُزْوَى بَعْضُها إلى بَعْضٍ.} رواه مسلم
المشهد السابع والاخير: في ناس ف النار بيتعذبوا اشد العذاب وكل ما جلدهم يسيح بيتجدد تاني عشان يدوقو العذاب بياكلوا من شجرة اسمها الزقوم مرة اوي وكلها شوك وثمارها شبه رؤوس الشياطين بيشربوا حاجات زي الحمم البركانيه كدة ، لحظه كدة في ناس بتاكل لحمه نتنه دول اللي بيغتابوا الناس وفي ناس تانيه بطنهم مولعة دول اللي كانوا بياكلوا حرام وفي ناس تانية عماله تخربش نفسها باظافر من نحاس بيقطعوا جسمهم ودول كانوا بيتكلموا في اعراض الناس بس دول كلهم هياخدوا عذابهم واللي منهم قال في يوم لا اله الا الله هيخش الجنه واخر واحد طالع من النار انا شايفه اهو عمال يطلع وتاخده تنزله فيها تاني بس الحمدلله نجي منها وقال الحمدلله الذي انجاني منك ، فشاف شجرة وعاوز يروح يستظل بيها ودا اقصي ما يحلم بيه فبيستاذن من ربنا بس ربنا رد عليه رد غريب جدا قاله يا عبدي ما رايك لو اعطيتك مثل ملك اعظم ملوك الدنيا فقال له العبد يارب اتهزا بي وانت رب العالمين فقال له الله يا عبدي فلك مثله ومثله ومثله ومثله ومثله❤️
#منقول
