الحلقه الثامنه ...
_________________________________________
في نص الطريق ومحدش واخد باله العربيه داست فرامل جامد الكل بص وانصدم من اللي شافوه وجمال خرج سلاحه وعمره و عربيه سودا وقفت قدامهم وضربت نار ع العربيه وسط صراخ مياده ومها
جمال بزعيج : إنزلو تحت بسرعه إنزلو
وحصل تبادل نار بين العربيات وجمال إتصل على زين
جمال : ايوه ياباشا .. العربيه اللي كانت ماشيه ورانا بتضرب نار علينا
زين : انا جاي حالا انتو فين
جمال : احنا على الطريق الصحراوي
زين : طيب حاول تبعد بالعربيه عنهم وانا ١٠ دقائق واكون عندك ...
وقفل الخط وخد مسدسه ونزل جري على عربيته وساق بأقصا سرعه ومسك التليفون واتصل على أدهم
أدهم : اي ياحبيبي لحقت اوحشك
زين : مش وقته عايزك تجيب كل الحرس وتيجي على الطريق الصحراوي
أدهم : في اي يازين
زين : مش وقته نفذ اللي بقولك عليه بسرعه وعرفهم أن في ضرب نار .. متتأخرش يا أدهم بسرعه
أدهم : طيب طيب
ونزل أدهم من الشركه بسرعه وركب عربيته واتصل على شخص وقاله يجمع كل الحرس وييجو على العنوان اللي زين قاله عليه وهو راح لزين
في العربيه
مياده ومها ييصرخو جامد وكل الحرس اتصابو حتى السواق والأشخاص الملثمه يتقرب عليهم وجمال نزل من العربيه وبيحاول يصيبهم لكن مسدسه خلص طلق قرب من شخص مرمي ع الأرض وخد مسدسه وقعد يضرب نار في الوقت ده زين وصل بعربيته وضرب نار بس هما كانو كتير وزين وجمال بس اللي بيضربو عليهم نار و وقعو منهم كتير عشان زين متدرب على كل ده ... بعدها أدهم وصل لوحده وقف جمب زين وضرب نار عليهم
زين : فين الحرس
أدهم : جايين ورايا
زين بيتفادا رصاصه : البنات في العربيه جوه حاول تنزولهم يركبو في عربيتي ورا بسرعه
أدهم فتح العربيه والبنات كانو مرعوبين
أدهم : تعالو معايا بسرعه .... فين صاحبتكم التالته مياده : مجتش معانا
أدهم : طب تعالو معايا
مياده : نيجي فين ياعم داحنا نموت لو خطينا سانتي واحد لا ياعم العمر مش بعزقه انا عايزة افرح بشبابي الاول ... اه ياشبابي اللي راح عشت وشوفت فيلم اكشن في الحقيقه
أدهم بغضب : انتي لسه هتندبي انزلي بقولك
مياده : نازلين ياخويا بس متزوقش
ونزلو من العربيات وادهم بيحميهم وماشي قدامهم وماسك إيدهم وفجأة ظهر شخص ملثم قدامهم وكان هيضرب بالنار بس أدهم إداله طلقه رشقت في دماغه البنات اترعبو من المشهد ده جدا وركبو عربية زين وادهم رجع تاني لزين
زين : جمال اركب عربية أدهم بسرعه هي مصفحه ضد الرصاص اركبها وامشي بيها وارجع من الطريق اللي الحرس جاي منه وحاول تعطلهم لحد ما الحرس ييجو
جمال : وانت ياباشا
زين : هاجي وراك .....وانت يا أدهم وقف ضرب نار ...
وجمال ركب العربيه ومشي بيها والعربيات مشيت كلها وراه
وزين وأدهم ركبو عربية زين اللي فيها البنات
وزين ساق العربيه ومشي ورا العربيات وقعدو يضربو على العربيات بالنار لحد ما الحرس جم وضربو نار كتير لحد ما المعركه خلصت راح شخص لزين
الشخص : تمام ياباشا سيطرنا على الامر ومسكنا أشخاص عايشه هنعمل فيهم اي ياباشا
زين :خدو اللي عايش على المخزن واتصلو على البوليس والإسعاف ييجو عشان نعمل محضر والإسعاف يروحو لرجالتنا هناك
الشخص: تمام ياباشا بعد اذنك ...
ومشي الشخص وزين التفت للبنات
زين : انتو كويسين
هزو براسهم بمعنى اه
زين : أدهم روحهم البيت وانا هفضل مع الرجاله هنا عشان نعمل محضر
أدهم : هوديهم وارجعلك
زين : ماشي
وساق أدهم العربيه وصلهم البيت ورجع لزين تاني
كان البوليس جه وعملوا محضر وخلصو الموضوع
.........
عند البنات
داخلين الفيلا
مياده : ماما ماما انتي فين
منى : الدوشه حضرت عايزة اي ... وبصت على مها كانت ساكته خالص و وشها اصفر .... اي ده مالك يامها
مياده : مفيش ياماما اصل احنا عشنا فيلم اكشن من شويه
منى : يعني اي
مياده شرحت لها كل حاجه حصلت معاها
منى : وانتي إجبله مفيش دم بقا البت ميته من الرعب وانتي جايه تصوتي في وشي غوري يابت على اوضتك وانتي يامها اطلعي غيري هدومك لحد ما اجهز الأكل يالا ياحبيبتي
مياده بتمثيل : ماشي يامنى بقا بتدلعي بنت اخوكي وانا لا .. لالالا مش قادره استحمل لالا انا طالعه اوضتي ... حسبي الله ونعم الوكيل
منى : فيكي يازباله .... متنسيش بكره جايلنا ضيوف
مياده : ضيوف مين !؟
منى : زين وعيلته
مياده : اااه أن شاء الله ألف ألف مبروووك وربنا يتمم بخير انا مليش دعوه والبارد ده جاي ليه ومين اللي عزمهم
منى : ابوكي .. وبعدين بعد اللي عمله معاكي وبتتكلمي كده
مياده : انا ناكره الجميل ياستي بس هو واد جبله رخم وبارد مبحبوش
منى : بردو هييجو وهتنضفي وهتطبخي معايا كمان
مياده : اااه قولي يااارب
منى : ياخدك
مياده بصريخ : ماااااااماااااااا
منى : خرمتي ودني غوري على اوضتك
وطلعت مياده اوضتها
منى : اي اللي عملته في حياتي عشان يرزقني ببنت هبله زي دي .... وراحت المطبخ تجهز الأكل
خالد جه من وراها وهي مشغوله في تحضير الأكل خالد : إركب الهوا .... منى اتخضت ولفتله وقلعت الشبشب اللي في رجليها وفضلت تضرب فيه
منى وهي بتضربه : انا هلاقيها منك ولا من أختك ياولاد الجزمه هتشلوني
خالد : بعد الشر عليك يا جميل ما تجيبي بوسه
منى : من عينيا ......... وكانت هتضربه بالشبشب بس هو جري ....
_________________________________________
عند زين ... رجع البيت هو وادهم ودخلو كان الكل قاعد ماعدا فاتن وأمها
زين : السلام عليكم ياجماعه
فريده : وعليكم السلام يا حبايبي ... احضرلكم الغدا
زين : لا ياحبيبتي احنا كلنا
أدهم : فين ده انا مكلتش
فريده بإبتسامه : طب إطلعو وانا هبعتلكم الغدا على فوق
أدهم : والنعمه عسل
وطلعو فوق في أوضة زين
أدهم : فهمني اي اللي حصل بقا
زين : أقعد وانا هفهمك كل حاجه
أدهم : وادي قعده
زين : الباشمهندس محمد الشناوي داخل في مناقصه وفي ناس بيهددوه لو متنازلش عن المناقصه دي ببنته مياده
أدهم : وبعدين
زين : مفيش المفروض اني هحميها من الناس دي
أدهم : وانت الحارس الشخصي بتاعها مثلا
زين : مش حكاية كده . بس ابوها هو اللي وقف معايا عشان اكمل حلمي وابويا كان رافض كلية الشرطه وهو اقنعه وفضل يقويني عشان اكمل حلمي
أدهم : وانت هتعمل اي دلوقتي
زين : المفروض اني هحميها
أدهم : اشمعنه انت ماتكلف حد تاني يحميها وخلاص واخلع ايدك من الموضوع
زين : انا اديت كلمه مينفعش ارجع فيها
أدهم : اللي تشوفه
وبعد شوية وقت الباب خبط ودخلت الخدامه بالأكل وقعدو ياكلو
______________________________
عند مياده قاعدين بياكلو ع السفره
مياده : بقولكم اي يا جدعان انا عايزة أخرج اشم شوية هوا
مها : انا مش عايزة انا هطلع ازاكر
منى : كملي أكلك يامها
مها : انا شبعت ياعمتو الحمدلله
خالد : مالك يامها ساكته من ساعة ماجيتي
مياده : تعالى نخرج نتمشا وانا احكيلك
منى : خلصو اكل الاول وبعدين إطلعو زي مانتو عايزين .... خلصو اكل وخرجو يتمشو في الجنينه شويه وقعدو على الكراسي
خالد : في اي
مياده : حصل جو اكشن تاني
خالد : ازاي ؟
حكتله مياده كل اللي حصل
خالد قام بخوف عليها : انتي كويسه جرالك حاجه
مياده : ياسطا انا ميتخافش عليا
خالد : مياده .. مفيش خروج تاني من الفيلا
مياده : يعني اي هتحبس في البيت ؟ وامتحاناتي والجامعة
خالد : هتروحي ع الامتحانات بس ... انا مش مستعد اخسرك
مياده : اي يابو الخولد اختك ميتخافش عليها
خالد : عارف بس انا بخاف عليكي
مياده : خلاص بقا ياسطا
خالد : طب قومي نعمل كيكه
مياده بضحك : احبك وانت فاهمني
وقاموا دخلو الفيلا
في المطبخ
خالد : انا مبعرفش بتتعمل ازاي
مياده : عيب عليك وانا بعمل اي
خالد : مابلاش انتي
مياده : أخرس.. اتفرج واتعلم
جابت المكونات وبدأت تعمل وخالد واقف معاها .... خالد مسك دقيق ورشه على شعرها
مياده : ولااا شعري ياض ومسكت دقيق ورشت على شعره وفضلو يرشو على بعض دقيق والمطبخ بقا عباره عن دقيق بس
وبعد شويه
خالد : امك هتشلوحنا ع اللي اتعمل في المطبخ
مياده : نخلص الكيكه ونروقه
وبعد ما خلصو
مياده : خلصت كده صح ؟
خالد : انتي بتسأليني انا ؟ ... دخليها في الفرن ونشوف في الأخر
دخلوها الفرن ...
مياده : بعد 30 دقيقه نطلعها
خالد : مش كتير ؟
مياده : لا ... تعالى نتفرج ع التلفزيون لحد ما تخلص
......………………………
فيلا الدمنهوري
في اوضة مريم بتكلم ف الفون
مريم : اي يا جوجا .. عملتي اي
جميله : ولا اي حاجه ... لاقيته مسافر اسبوع تبع الشغل في شرم الشيخ
مريم : كويس نقدر نظبط في الاسبوع ده كل حاجه
جميله : نظبط اي انا مش فاهمه حاجه
مريم : لا انتي لازم تصحصحيلي كده
جميله : فايقه اهو
مريم : انتي نسيتي اللي اتفقنا عليه
جميله : بس انا خايفه يا مريم
مريم : خايفه من اي
جميله : خايفه بعد ده كله مياخدش باله ويكون بيحب واحده تانيه اصلا
مريم : جميله اولا التغيير ده ليكي انتي عشانك مش عشان حد حتى لو هو مخدش باله كفايه انك تشوفي نفسك جميله وبعدين احنا مش هنعمل حاجه يعني احنا يدوب هنغير استايل لبسك شويه بس لكن شخصيتك زي ماهي.. وبردو نعرف هو بيبص للشكل الخارجي ولا بيشوف الجمال اللي جوه
جميله : بس انا بحبه
مريم بغضب : بت انتي هتشليني ألطم ع وشي منك..
جميله بضحك : خلاص يابت انتي بتتحولي كده ليه
مريم : مانتي اللي بتنرفزيني
جميله : معلش.. يالا انا هقفل بقا.. واقوم اشوف خالتو بتعمل اي
مريم : سلام
وقفلوا مع بعض وجميله خرجت من أوضتها لاقت خالتها ف المطبخ (منال)
جميله : عملالنا اي حلو انهارده يا خالتو
منال : حبيبة خالتك.. تعالي انا عامله محشي ورق عنب إنما اي تاكلي صوابعك وراه
جميله : يالهوي يا خالتو ع الجمدان كفايه الريحه.. تسلم ايدك من قبل ما ادوق
منال : تسلمي يا حبيبتي.. روحي بقا جهزي السفره زمان عمك حسين ع وصول
جميله : حاضر ياخالتو.. كانت ماشيه ورجعت تاني وسألت بخجل وتوتر.. بقولك ياخالتو.. هو.. هو هيثم هيرجع امتى
منال ببسمه : جاي بعد بكره يا حبيبتي
جميله : تمام انا هروح اجهز السفره.. وخرجت بسرعه
منال : ربنا يريح بالك يا بنتي... وكملت اللي ف ايدها
***********************************
متنسوش النجمه يا حلويين 😘❤️
لو لاقيت تفاعل حلو انهارده هنزل بارت كبير بكره
