يتيــم الديـــار#اكتملت

البارت السابع

صباح يوم جديد، قامت ميثا وما لقيت زينه جنبها ف طلعت تدورها فالشقه وشافت زينه مخلصه تمارينها وتسوي فطور واستغربت هالبنت ما تبا ترتاح ولا شو سالفتها لكن سكتت وجلست ع الكنبه ف انتظار زينه تتكلم

زينه : ميثا ترا واضح عندك كلام قوليه
ميثا : م عندي شي بس مستغربه
زينه : مستغربه من شو؟
ميثا : منك انتي واضح تعبانه ويالسه تتمرنين وتسوين فطور؟ شو الفايده عيل لو رحتي المدرسه احسن
زينه : كنت احاول اقولك امس بس ما سمعتيني - تبتسم -
ميثا : المفروض تريحين زينه هالمكابر بيطيحك بس مب اكثر وبعدين لاحقه تطبخين فطور وتتمرنين يومين راحه مب خساره ف جسمك اللي انهد
زينه : لو اجلس يمكن اريح جسد بس بتقتلني افكاري وانا مابا يصير هالشيء
ميثا : ولين متى ما بتواجهين افكارك ؟ مردك فيوم بتجيك هالافكار وتقتلك لو ما عرفتي لها حل
زينه : مدري لين اقدر احل القصه هذا حلي الحين اني اشغل نفسي
ميثا : اللي تشوفينه المهم تبين شيء ؟ انا بروح دامك تمام
زينه : افطري وروحي
ميثا : لا شكرا م اكل الصبح ما اشتهي شيء
زينه : انزين ايلسي لين اييون البنات لاه
ميثا : برايه انتي سلمي عليهم بدالي انا بسير البيت
زينه : اوكي الله يحفظك

راحت ميثا وهي مستغربه كيف انسان يكابر هالكثر على المه وتعبه وشو المصلحه من ورا ها كله ؟ ليش ما تريح وتكسب وقت لنفسها بدال ما تككابر وينتهي المطاف ب انهيار ثاني لكن ما كان بيد ميثا شيء خصوص مع عناد زينه اللي مافي منه اثنين من كثر ما هو صعب

في الوقت هذا في مكان ثاني بالتحديد عند آريا وعليا في اوول يوم لهم فمدرسة الناس الطبيعين ع قولة عليا ، بنات الدار كانوا واضحين فالمدرسه لان كلهم ملتمين ع بعضهم ولانهم ضايعين وسط هالمدرسه الكبيره اللي فيها اكثر من ٩٠٠ طالبه

وزعوا البنات ع فصولهم وعطوهم الكتب وخذت آريا كتب لزينه، وكان كل شيء طبيعي محد تكلم لحد م رحبت المديره بالدفعه الجديده من الدار وهنا التفتوا عليهم كل الطالبات وبدت النظرات تشتغل

اكتشفوا البنات بعدها ان المدرسه واللي فيها متعودين يستقبلون بنات من الدار وعندهم طقوس استقبال محد يتمناها، البنات للأسف طلع فيهم الجزء الاكبر المتنمر واللي كانوا ينتظرون بس انهم يستخلون بوحده من الدار ويبدون عليها طقطقه ويستلمونها ضرب بدون سبب بس غل وفضاوه من باقي البنات

لكن عليا وآريا كانوا متجنبين كل شيء ولا يردون على اي حد يحاول يستفزهم ولكن كانوا مستغربين من اللي يشوفونه ليش هالاضطهاد ؟ ولا الوضع فرض عضلات ع الجانب الاضعف بس ؟ لكن ماكان فيه جواب مقنع للبنات غير ان الموضوع عباره عن غل بس غير مفهومه اسبابه !

عليا : والله ما غلطت يوم قلتلك هالمدرسه بتكون جحيم
آريا : ياعمي اذا كلام هالبزارين مأثر فيك ماعندك سالفه حنا تحملنا المشرفات واسلوبهم م نتحمل هذيل
عليا : ماشفتيهم كيف يضغطون شلة زينب ؟
آريا : لان عطوهم القوه وتموا ساكتين عنهم وزادوا عليهم الكيل لو سكتوهم من اول المشوار والله ولا وحده منهم بتتمادى
عليا : شو يعني تبينا نضارب ؟
آريا : لا نرد عن عمارنا لو حد تعرضلنا ما نسكت ردولهم دبل خ يعرفون اننا مب هينين وبعدين ترا المفروض يخافون منا
عليا : ليش عاد ؟
آريا : يا هبله بالنسبه لهم نحن من دار ما فيها ولي وكلها مشاكل وضرب وملعنة خير ومفترضين ان نحن الاشخاص السيئه  في هالروايه كلها
عليا : مافهمت لا تستوين زينه الحين ! مغير تسولف بالالغاز
آريا تتنهد : يعني المفروض يخافون منا احنا من دار ايتام وما عندنا اهالي ولا شيء هنيه ولا حتى ولي نخافه خ نوريهم انه نروم نلعن خير خيرهم
عليا : واذا اشتكونا تلعننا الاداره ونروح فيها صح ولالا ؟
آريا : وليش نسوي شيء نخليهم يمسكونا نلعبها صح
عليا : انا اقول نتم بعيد عنهم ولو جانا شيء نشتكي
آريا : والاداره بتبكي عليك صح ؟ بتحارب المدرسه والدين والدنيا عشان ترضيك يا عمي بتعفنين محد درابك
عليا : انزين خلاص نتم بعيد عن المشاكل آريا وانتهينا
آريا : بنتم بعيد بس لو تعرضلي حد انسي اسكت