_الو
*مين
_نسيتي صوتي
*يمكن مبقتش حابه أسمعه تاني
_قسيتي
*تؤ، فوقت
_مش هتسأليني بكلمك ليه
{ضحكت، يمكن لأني مازلت متوقعه هو هيقول أي}
_وحشتني ضحكتك
*هبقي كذابه لو قولتلك وأنت موحشتنيش
_بجد
*آه، عارف مازلت بتوحشني وقوي كمان بس مبقتش أتمناك
_لدرجه دي
*وأكتر، يمكن لسه في جزء من قلبي بيحبك وأنا علي ثقه إني لو سبت نفسي هرجع أقع في حبك تاني بمنتهي الأراده مني بس مبقاش ينفع
_ليه
*علشان خلتني وقفت قدام مرايتي وأقولها إني خسرت 4 سنين من عمري علي مفيش، خلتني أخسر قدامهم، قولتلك متخذلنيش فيك وأنت عملتها، وعلشان مبقاش قاسيه لأن لسه قلبي مش مطاوعني أقسي عليك، يمكن وقتها بس مكنش الوقت في صالحنا أو مكنش وقتنا
_طب نحاول تاني
*نفسي أغمض وأقولك ماشي نحاول بس أنا مش مستعده أطلع خسرانه تاني، أنا براهن علي قلبي وأنا أتعلمت أغلي قلبي خلاص
_بس أنا لسه بحبك
*يعز عليا اقولك وأنا بطلت، بس مبقتش أحبك نفس حب زمان أو أقولك علشان أبقي واضحه جزء كبير من حبي ليك راح مع كسرتي، مع دموعي في حضن أمي وأنا بقولها خسرت، حبك راح لما قولتها أنت مستحيل تعمل فيا كده لكنك عملت، تعرف مكنش نفسي تبقي دي النهاية، كان حلمي أفتكر ذكرياتنا وأنا إيدي غرقانه في كفوف إيدك بس الحدوته كانت دي نهايتها
_ولو أنا خبط بابك المره دي
*مش هفتحلك، أنا بابي هيبقي مفتوح للي يقدرني ويغليني، فمش هيبقي ليك أبدًا مفتوح تاني.
{فكل نهاية حدوته في بداية جديدة، بس بداية مع شخص يستاهل قلوبنا وعلشان نعرف نحكم صح لازم نركن قلوبنا لأن اختياراتها مش أصح حاجه}
#فاطمه علي
أنت تقرأ
قصص قصيرة
Short Storyمجرد حكايات من أسوار عالمي، أتمني أن أنالها في يومٍ. حاصله علي المركز الأول للقصص القصيرة بتاريخ 19/4/2023
