တာအိုခဲတံ ( အပူအပင်မဲ့ အင်မော်တယ် ) (ချင်းကျူ) ( စ / ဆုံး )

76 - 80

#အပူအပင်မဲ့အင်မော်တယ်
Chapter 76
ခရီးနှင်နေသော အဆိပ်

၀ူကျိလျှို့ဝှက်လောကကို ပိတ်ဆို့ထားတာ နှစ်ရာပေါင်းများစွာ ကြာမြင့်သွားခဲ့ပြီ ဖြစ်တာကြောင့် အပြင်လောကမှာ ကွယ်ပျောက်နေပြီဖြစ်တဲ့ ရတနာ တော်တော်များများ ဒီနေရာမှာ ရှိနေခဲ့ပါတယ်။ ဒါကြောင့် ရတနာတွေအတွက် တန်ခိုးရှင်တွေ အချင်းချင်း တိုက်ခိုက်သတ်ဖြတ်နေတာ မဆန်းကြယ်လှတော့ပါဘူး။

တချို့သော တန်ခိုးရှင်တွေဟာ ၀ူကျိလျှို့ဝှက်လောကထဲ ရောက်ရှိချိန်ကစလို့ ခြုံပုတ်တွေထဲ မလှုပ်မယှက် စောင့်ဆိုင်းပြီး အော်ရာအရှိန်အဝါတွေကို ဖုံးကွယ်ထားခဲ့ကြပါတယ်။ သူတို့ရှိရာ နေရာကို တစ်စုံတစ်ယောက် ဖြတ်သန်းသွားခဲ့မယ် ဆိုရင် ချက်ချင်း အလစ်ဖမ်း တိုက်ခိုက်သတ်ဖြတ်ပြီး ရတနာတွေကို လုယူပါလိမ့်မယ်။

တချို့တွေက ကံကောင်းထောက်မစွာနဲ့ အဆင့်မြင့် ရတနာတွေကို ရရှိခဲ့လို့ တိုက်ခိုက်ရေးစွမ်းရည် မြင့်မားလာခဲ့ကြပါပြီ။ သူတို့တွေ အနေနဲ့ ပိုပြီး အဆင့်မြင့်သူတွေကို ရင်ဆိုင်နိုင်စွမ်း ရှိနေပြီ ဆိုရင်လည်း မမှားပါဘူး။

ဝိညာဉ်ကျောက်တုံးတွေနဲ့ ဝိညာဉ်ဆေးပင်တွေ နေရာတိုင်းလိုလိုမှာ ရှိနေခဲ့ပါတယ်။ သူတို့တွေဟာ အမှိုက်တွေ ပြန့်ကျဲနေတဲ့ အလားပါပဲ။ အဆင့်မြင့် ဝိညာဉ်မှော်ရတနာ တချို့လည်း မြေပြင်ထက်မှာ ပြုတ်ကျနေတာ တွေ့ရပါလိမ့်မယ်။ ရှင်းရှင်းပြောရရင် မဟာဂိုဏ်းကြီး ၃ ဂိုဏ်းတောင်မှ ဒီလောက်အထိ မချမ်းသာခဲ့ပါဘူး။

ဒါပေမဲ့ မူလတာအို အဆင့် ဝိညာဉ်မှော်ရတနာတွေကို ဝမ်ရှင်းသူတော်စင် အထွတ်အထိပ် အဆင့် တန်ခိုးရှင်တွေသာ ယှဉ်ပြိုင်လုယူနိုင်ခဲ့ကြပါတယ်။ သူတို့ထဲမှာ ရှန်းကျီးဝမ်နဲ့ ဆုယန်တို့ တစ်ခုစီ ရရှိထားပြီးပါပြီ။

ဒီအချိန်မှာတော့ ၀ူကျိလျှို့ဝှက်လောက အစွန်ဖျားက တောအုပ်တစ်ခုမှာ ဇီဖူ တန်ခိုးရှင် တစ်ဦး ပတ်ဝန်းကျင်ကို သေချာ အကဲခတ်နေခဲ့ပါတယ်။ သူ့ကို ကြည့်ရတာ အစွမ်းထက်သူ တစ်ဦးဦး အလစ်ဖမ်း တိုက်ခတ်သတ်ဖြတ်လာမှာကို စိုးရိမ်ပူပန်နေသလိုပါပဲ။