#အပူအပင်မဲ့အင်မော်တယ်
Book 10
Chapter 1
ငါ့ကိုယ်ထဲ ဝင်နေလိုက်ပါတော့ကွယ်
ငါ့နာမည်က လေးလောင်ပါ။ နှစ်ပေါင်း ၃၆၇ နှစ် သက်တမ်း ရှိနေပါပြီ။ ကီလိုမီတာ တစ်ထောင်အတွင်းမှာ ငါဟာ အစွမ်းအထက်ဆုံး မိစ္ဆာသားရဲကြီးပါပဲ။ ငါက အလွန်အစွမ်းထက်တာကြောင့်လည်း တခြား မိစ္ဆာသားရဲတွေ အားလုံး ငါ့ကို လေးစားရိုသေခဲ့ကြရတယ်။
လေပြည်ညင်းဟာ ငါ့ရဲ့ သားမွေးတွေကို ပွတ်သပ်ကျီစယ်နေတယ်။ ဘာဖြစ်လို့လဲ သိလား။ သူက ငါ့ရဲ့ လှပမှုကို မနာလိုတဲ့ အတွက်ကြောင့်ပေါ့။
ဒီနေ့ နေမင်းဟာ တောက်ပလွန်းတယ်။ ကောင်းကင်အထက်မှာ တိမ်တိုက်ကင်းစင်နေတယ်။ အဆင့်တက်ဖို့အတွက် နေ့ကောင်းရက်မြတ် တစ်ရက်ပါပဲ။ ဟုတ်သားပဲ။ နှစ်ပေါင်း ၃၆၇ နှစ်လောက် ကျင့်ကြံအားထုတ်ပြီး နောက်ဆုံးတော့ ငါဟာ မြေကမ္ဘာ သူတော်စင်တစ်ဦး ဖြစ်လာတော့မယ်။
ဟား ဟား.. အဲဒီအချိန်ကျရင်တော့ မိစ္ဆာသားရဲ အမတွေနဲ့ မိတ်လိုက်ဖို့ ခွင့်ပြုချက် ရှိသွားပြီ။ မိစ္ဆာသားရဲ ဘ၀ရဲ့ အထွတ်အထိပ် အဆင့်ကို ငါရောက်ရှိတော့မယ်။
စဉ်းစားရင်း လေးလောင်တစ်ယောက် အဆင့်တက်ဖို့ နေရာရှာဖွေနေခဲ့ပါတယ်။
ဒီအချိန်မှာပဲ လူရိပ်နှစ်ခုကို သူ့ရဲ့ ဝိညာဉ်အာရုံထဲ မြင်တွေ့လိုက်ရပါပြီ။
“အင်း.. လူသားတွေ ဘာဖြစ်လို့ ဒီနေရာကို ရောက်လာခဲ့တာလဲ”
လေးလောင်လည်း ကိုယ်ကို ဆန့်လိုက်ပါပြီ။ သူ့မျက်နှာအထက် စိတ်ပျက်ရွံရှာမှု ပြည့်နေခဲ့ပါတယ်။
လူသားတွေကို သူသဘောမကျပါဘူး။ လူသားတွေဟာ သူ့အမြင်မှာတော့ အဆင့်နိမ့် သားရဲတွေပါ။ ဒါကြောင့်လည်း သူဟာ မူလတာအို သူတော်စင် အဆင့်ကို ရောက်နေခဲ့ပေမဲ့ ဘယ်တုန်းကမှ အသွင်ပြောင်းဖို့ မကြိုးစားခဲ့ပါဘူး။
“ဟမ့်.. ဘယ်သူက ဂရုစိုက်မှာလဲ။ မင်းတို့လည်း ဒီကိုမှ ရောက်လာတယ်ဆိုတော့ ငါဗိုက်ဖြည့်ရတော့မှာပေါ့”
လေးလောင် ကျေနပ်စွာ ပြုံးလိုက်ပါပြီ။
ဒီနေရာက မိစ္ဆာသားရဲ တောင်တန်းကြီးရဲ့ အလယ်ပိုင်း ဒေသလို့ ဆိုနိုင်ပါတယ်။ လူနည်းစုလောက်သာ ဒီကို လာရောက်ဝံ့တာပါ။ ဒီနှစ်ယောက်က ရူးနေလို့ ရောက်လာတာ ဖြစ်နိုင်ပါတယ်။
YOU ARE READING
တာအိုခဲတံ ( အပူအပင်မဲ့ အင်မော်တယ် ) (ချင်းကျူ) ( စ / ဆုံး )
Adventureedited April 18/2022 ၀တ္ထုလေးနဲ့ #တာအိုရေစက် ဆုံခဲ့တော့ review လေး တစ်ခုကို ဘာသာပြန် ရေးပေးလိုက်ပါတယ်ဗျ။ မူရင်း၀တ္ထုအောက်မှာ ပရိတ်သတ်တစ်ယောက် English လို ရေးထားတဲ့ review လေးပါ။ အပူအပင်မဲ့ အင်မော်တယ် ၀တ္ထုက အမျိုးမျိုးသော ရှန်းရှ သိုင်းလောကရဲ့ esse...
