زهرةٌ الغيث

بارت ١

– يلا stand by فاضل ديقتين على الهوا ، جاهزة يا زهرة ؟
- آه تمام .
– تمام .. يلا 3..2..1 ، هوا .

- السلام عليكم ورحمة الله وبركاته عاملين إيه أتمنى تكون حلقة النهاردة تحوز على إعجابكم .. هنتكلم النهاردة على التحفيز مستغربوش من ال topic عشان أغلبنا بيحفز غلط وبدل ما يوَصّل للنتيجة إللي عاوزينها ممكن يجيبها تحت الأرض ، والتحفيز الغلط سبب رئيسي بيأثر على سلوك الطفل زي مثلاً إبنك جاي من إمتحان وجايبلك الورقة تشوف درجته عشان تحفزه بلاش سؤال طب وصاحبك عمل إيه ، أنتَ ليك بإبنك مش بصاحبه عشان لا قُدراته زي قُدرات صاحبه ولا مستوى الاستيعاب والذكاء واحد فأنتَ لازم تكون فاهم حاجة زي دي وتزرع في إبنك إنه مينافسش حد عشان ساعتها المناسفة هتبقى ظالمه .. علمه ينافس نفسه ويقييم .. دلوقتي فتحنا المكالمات وناخد أول اتصال آلو سلام عليكم .

_ وعليكم السلام بصي حضرتك كلامك زي الفُلل بس لامؤاخذة يكون إبني مع إبن عمه في نفس الفصل وإبن عمه يجيب أعلى منه وعاوزني أحفزه .

- ما هو ده إللي أنا بتكلم فيه إن إحنا لازم نقضي على الجُملة المشهورة بتاعة كل الأُمهات ' شوف إبن خالتك جايب أعلى منك هو أنتَ ناقص إيد ولا رِجل ' هنا بدل ما بنبني إحنا بنهد ، جُملة في إعتقادك إنها هتحفز وكده هيذاكر أكتر وهيجيب درجات أعلى بالعكس ده أنتَ هدمت ثقته بنفسه وثقته فيك وبنيت بينكوا حاجز وكل شوية بكلامك بتزود فيه طوبة عشان كده شجّع إبنك وسقفله قوله شاطر حتى لو درجاته مش أعلى حاجة التشجيع هيديه ثقة إنه يحسن من نفسه وشكرًا لإتصالك .. هنطلع فاصل صغير ونرجعلكوا تاني .

– زهرة طريقتك حادة يازهرة مع المشاهدين ياريت نتمالك أعصابنا شوية مش كده .
- يعني أنتَ مش شايف التخلّف إللي هم فيه ، مش عارفين إن بسبب كلامهم ده وغيرة مرضية عقيمة بتهد مستقبل أطفال كتير ، يعني بسبب كلامهم ده في تجمُع عائلي بيوَلد تنمر والطفل بيلاقي نفسه قاعد وسط أهله غريب ومنها بنستغرب لما بنلاقيه بيكره التجمُعات وبينعزل ويظهر مرض الرُهاب الإجتماعي وبسبب كلام ملوش لازمة بنحبس الطفل جوا نفسه وكل شوية نحط ترباس فبنلاقيه كِبر لوحده مسجون جواه .
– ماشي يازهرة كلامك صح بس مش كل الناس عندهم الثقافة دي .

- يبقى نعلمهم ونفهمهم ، دلوقتي الدكاترة النفسيين أكتر دكاترة شغالة بسبب أمراض الناس إللي كترت .. رُهاب إجتماعي ، إكتئاب ، وسواس قهري ، إضطراب إنفجاري متقطع ، إضطراب ثُنائي القُطب ، نرجسية ، سادية أو حتى مازوشية ومنهم بيتولد السيكوباتي إللي هو أكتر شخصية مُعادية للمجتمع ونيجي نشوف السبب في كل ده هنلاقي أساسه البيت وناسه والخمسة ستة إللي إحنا منهم.
– طب يلا عشان الفاصل هيخلص وأهدي هاا أهدي ، يلا هوا .

- ثُبت علمياً إن الطفل بيحتاج من ٤ ل ٦ أحضان يوميًا عشان يكتمل نموه والصراحة أنا مقتنعة جدًا بالمقولة دي حتى لو غلط ، أنتَ بتُنقش في إبنك وهو صغير عشان تلاقي كلام تقراه لما يكبر .. أحضن إبنك سقفله شجعه قوله شاطر ، إبني ثقة إبنك بدل ما تبني سجنه بإيدك .